ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސެކިޔުރިޓީއަށް ދައުލަތުގެ ބަޖެޓް ހުސްކުރިއަސް އެމަނިކުފާނަށް ތާއީދު ކުރައްވާ ފަރާތްތަކުގެ ހިތްހަމައެއް ނުޖެހޭނެކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.

ރައީސް ނަޝީދަށް މެއި 6, 2021 ގައި ދެވުނު ބޮމުގެ ހަމަލާއަށް ދެ އަހަރުވެފައިވާއިރުވެސް އެމަނިކުފާނަށް އިންސާފު ހޯދައި ނުދެވޭ ކަމަށާ، އަދި ސެކިޔުރިޓީވެސް ފޯރުކޮށްދިނުމުގައި ސަރުކާރުން ފަރުވާކުޑަކޮށްފައިވާ ކަމަށްބުނެ އެމަނިކުފާނަށް ތާއީދު ކުރައްވާ މެންބަރުން އަންނަނީ ކަންބޮޑުވުން ފާޅުކުރަމުންނެވެ. 

އެފަރާތްތަކަށް ރައްދު ދެއްވައި މަވޯޓާ ކުރެއްވި ޓުވީޓެއްގައި ވިދާޅުވީ، ނަޝީދުގެ ސެކިޔުރިޓީ ބަލަހައްޓަން ހިނގާ ޚަރަދު ދައުލަތުގެ ބާކީ ތިބި ހުރިހާ ވެރިންނަށް ވުރެވެސް ބޮޑު ކަމަށެވެ. އެހެން ނަމަވެސް އެމަނިކުފާނަށް ސެކިޔުރިޓީ ފޯރުކޮށްދޭ ކަމަށް ނުވާކަމަށް އޭނާ ވިދާޅުވި އެވެ.

Advertisement

މަވޯޓާ ވިދާޅުވީ، ނަޝީދުގެ މައްސަލަ ތަހުގީގު ކުރުމަށް ފުލުހުންގެ ހުރިހާ ވަސީލަތެއް ބޭނުންކޮށް، ޝަރީޢަތްވެސް ހިނގަމުންދާ ކަމަށެވެ. އެހެން ނަމަވެސް އެމަނިކުފާނަށް އިންސާފް ލިބޭ ކަމަށް ނުވާ ކަމަށެވެ. 

"ސެކިޔުރިޓީއަށް 52 މިލިއަން ޚަރަދުކޮށްގެން ކުރިއަށްގެންދާއިރު އެވަރުންވެސް ހިތްހަމަނުޖެހެންޏާ، މުޅި ދައުލަތުގެ ބަޖެޓް ހުސްކޮށް ޚަރަދުކުރިޔަސް ހިތްހަމައެއް ނުޖެހޭނެ." މަވޯޓާ ވިދާޅުވި އެވެ.

މީގެ އިތުރުންވެސް މަވޯޓާ ވަނީ، މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރަށް ހަމަލާ ދިނުމުން މަޖިލީހުން އޭނާއަށް ސެކިޔުރިޓީ ދީފައި ނުވާތީ ނުރުހުން ފާޅުކުރައްވައިފައެވެ.