ރަށްވެހިންނަށް ގިނަ ޕޮއިންޓް ލިބޭގޮތަށް އދ. ދިގުރަށުން ގޯތި ދިނުމުގެ އުސޫލު ބަދަލުކޮށްފިއެވެ.

ދިވެހި ކޮންމެ ރައްޔިތަކަށް ކުރިމަތިވެލޭ ގޮތަށް ދިގުރަށުން ގޯތި ދޫކުރުމަށް އެރަށުން ހުޅުވާލީ މިދިޔަ މަހުގެ ކުރީކޮޅުގައެވެ. އޭރު ރަށްވެހިންނަން ދިނުމަށް ކަނޑައަޅާފައި ވަނީ 20 ޕޮއިންޓް ކަމަށް ދިގުރަށު ކައުންސިލްގެ ރައީސް އިބްރާހިމް އުސްމާން "ވޮއިސް" އަށް ވިދާޅުވިއެވެ.

ނަމަވެސް އެ ނަންބަރު އިސްލާހުކޮށް، މިހާރު އެރަށު ރަށްވެހިންނަށް ދިނުމަށް ހަމަޖެހިފައި ވަނީ 65 ޕޮއިންޓެވެ.

Advertisement

މި ބުރުގައި އެރަށުން ދޫކުރުމަށް ހަމަޖެހިފައި ވަނީ 2000 އަކަފޫޓުގެ 77 ގޯއްޗެވެ.

ގޯއްޗަށް އެދި ހުށަހަޅާ މީހުންނަކީ ދިވެހި ރައްޔިތަކަށް ވާންޖެހޭ ކަމަށާއި، މީލާދީ ގޮތުން 18 އަހަރު ފުރިފައިވާ މީހެއްކަމަށް ވާންޖެހެއެވެ. 

ދިގުރަށު ކައުންސިލުން ބުނީ، ގޯއްޗަށް އެދުމުގެ ޝަރުތުހަމަވާ ފަރާތްތަކުން "ދިރިއުޅުމަށްޓަކައި އދ. ދިގުރަށުން ބަންޑާރަ ގޯއްޗަށް އެދޭ ފޯމް" ފުރިހަމަ ކުރުމަށްފަހު މި މަހުގެ ނުވަ ވަނަ ދުވަހުގެ މެންދުރު 13:00 ގެ ނިޔަލަށް އެރަށު ކައުންސިލް އިދާރާއަށް ފޯމު ހުށަހެޅޭނެ ކަމަށެވެ.     

"ރަސްމީ ބަންދު ނޫން ކޮންމެ ދުވަހަކު ގޯއްޗަށް އެދޭ ފޯމް ރަމަޟާން މަހުގެ ދުވަސްތަކާއި ޝައްވާލު މަހުގެ ފުރަތަމަ 07 ދުވަހާއި ހަމައަށް ދޫކުރުން އޮންނާނީ ހެނދުނު 09:30 އިން 10:30 އާ ދެމެދު އަދި ފޯމު ބަލައިގަތުން އޮންނާނީ ހެނދުނު 10:45 އިން މެންދުރު 12:30 އަށެވެ. ރަމަޟާން މަހާއި ޝައްވާލު މަހުގެ 07 ވަނަ ދުވަހުގެ ފަހުން ގޯއްޗަށް އެދޭ ފޯމު ދޫކުރުން އޮންނާނީ ހެނދުނު 08:30 އިން 10:00 އާ ދެމެދު އަދި ފޯމު ބަލައިގަތުން އޮންނާނީ ހެނދުނު 10:15 އިން މެންދުރު 13:00 އަށެވެ." އެ ކައުންސިލްގެ އިއުލާނުގައިވެއެވެ.

ގޯއްޗަށް އެދޭ ފޯމް ކައުންސިލްގެ ވެބްސައިޓް www.dhigurah.gov.mv އިން އަދި އެ އިދާރާއިން ކޮށްފައިވާ އިޢުލާނާއެކު ލިބެން ހުންނާނެ ކަމަށް ދިގުރަށު ކައުންސިލުން ބުންޏެވެ.