ރައްޔިތުން ކައުންސިލަށް ކުރާ އިތުބާރު ގެއްލުވާލާ ރުޅިއަރުވަން ސަރުކާރުން މަސައްކަތް ކުރަމުންދާ ކަމަށް މާލެ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.

ސަންގުޓީވީގެ "ޚަބަރަށްފަހު" ޕްރޮގްރާމްގައި ވާހަކަދައްކަވަމުން ޑރ. މުޢިއްޒު ވިދާޅުވީ ލާމަރުކަޒީ ގާނޫނަށް ފުރިހަމަ ގޮތުގައި ޢަމަލު ކުރާނަމަ، މަގުތަކާއި ޕާކުތަކާއި މިސްކިތް ތަކުގެ ކަންކަންވެސް ބަލަހައްޓަންޖެހޭނީ އެ ރަށެއްގެ ނުވަތަ ސިޓީއެއްގެ ކައުންސިލުން ކަމަށެވެ. އަދި ރާއްޖޭގެވެސް ރަށްރަށުގައި އެކަންކަން ކުރަމުން އަންނަނީ އެރަށްރަށުގެ ކައުންސިލްތަކުން ކަން މުއިއްޒު ފާހަގަކުރެއްވި އެވެ. 

ކަންމިހެން ހުރި ނަމަވެސް މާލެސިޓީ ގެ އެފަދަ ބައެއް ކަންކަން އަދިވެސް އޮތީ ސަރުކާރުގެ ބެލުމުގެ ދަށުގައި ކަމަށް މޭޔަރ ވިދާޅުވިއެެވެ. އަދި އެކަންކަން ރައްޔިތުންނަށް ނޭނގޭތީ އެފަދަ ކަންކަމާއި ގުޅިގެން ހުންނަ ކަންބޮޑުވުންތަކާއިއެކު ރުޅިވެރިކަން ރައްޔިތުން އަމާޒު ކުރަނީ ކައުންސިލަށްކަމަށްވެސް މޭޔަރ ވިދާޅުވިއެެވެ. 

Advertisement

“މަގުމަތީ ފެން ހިންދާ ޕަންޕު ޖައްސަން މިޖެހެނީ އެހެން މިނިސްޓްރީ އަކުން. ބައެއް މިސްކިތްތައް ހުރީ އިސްލާމިކް މިނިސްޓްރީގެ ދަށުގައި. ދެން ބިލު ނުދައްކައިގެން ފެނާއި ކަރަންޓް ކަނޑާލީމަ ހުރިހާ ދައްޗެއް މިވަނީ ރައްޔިތުންނަށް. އަދި މާލޭގައި ރަސްފަންނުގައި ހުންނަ ފެންވަރާ މާގަނޑުގެ މީޓަރު އަދިވެސް މި ހުންނަނީ ޕްލޭނިންގ މިނިސްޓްރީގެ ބެލުމުގެ ދަށުގައި. އެކަމަކު ރައްޔިތުން ސުވާލު ކުރަނީ ކައުންސިލާ. މާގަނޑުން ފެން ނައިސްގެން. އަޅުގަނޑުމެން ދެވަނަ މީޓަރެއް ހަރުކޮށްދޭން އެދިގެންވެސް ކުރީގެ މީޓަރ ބިލް ނުދައްކާތީ އިތުރު މީޓަރެއް ވެސް ހަރުކޮށްނުދޭ. “ މޭޔަރު ވިދާޅުވިއެވެ.

މިފަދަ ކަންކަމަކީ ސަރުކާރުން ވާހަކަދައްކައިގެން ހައްލު ކުރެވޭ ފަދަ ކުދި ކުދި ކަންކަން ކަމަށާ އެހެން ނަމަވެސް އެކަން ނުކުރަނީ ސަރުކާރުން ގަސްތުގައި ޖެއްސުން ކުރަން ކަމަށް މޭޔަރ ވިދާޅުވިއެވެ. 

މޭޔަރު ވިދާޅުވީ މިހުރިހާ ޖެއްސުމެއް ކައުންސިލަށް ސަރުކާރުން ކުރަމުންދާއިރުވެސް މާލެ ސިޓީ ކައުންސިލްގެ ފުރިހަމަ އެއްބާރުލުން ސަރުކާރަށް ދެމުންދާ ކަމަށެވެ.