ފަހި ދިރިއުޅުން ކޯޕަރޭޝަންގެ ފުލެޓުތަކުގެ ފިނިޝިންގ މަސައްކަތް ނިންމުމަށްޓަކައި އިތުރު ލޯނެއް ނަގަން ނުޖެހޭކަމަށާއި، ފިނިޝިންގ މަސައްކަތް ނިންމުމަށްޓަކައި ލޯނެއް ނަގަން ނުވަތަ ފައިސާ ހަމަޖައްސަން އެއްވެސް ބޭންކަކަށް ނުދާކަމަށް އެ ކޯޕަރޭޝަނުން ބުނެފިއެވެ.

ފަހި ދިރިއުޅުން ކޯޕަރޭޝަނުން މިފަދައިން ބުނެފައިވަނީ ހުޅުމާލޭގައި އިންޑިއާއިން ލޯނު ނަގައިގެން އެ ޤައުމުގެ ދެ ކުންފުންޏަކާ ހަވާލުކޮށްގެން އަޅަމުންދާ 4،000 ހައުސިން ޔުނިޓުގެ ފިނިޝިން މަސައްކަތްކުރުމަށް ލޯނު ހޯދުމަށް އެ ކޯޕަރޭޝަނުން މަސައްކަތްކުރަމުން އަންނަކަމަށް ބުނެ "ދިޔަރެސް" ނޫހުން ލިޔެފައިވާ ޚަބަރަކާއި ގުޅިގެން ނެރުނު ނޫސް ބަޔާނެއްގައެވެ. 

ފަހިދިރިއުޅުން ކޯރޕަރޭޝަނުން ބުނީ، އެ ކޯޕަރޭޝަނުން އިމާރާތްކުރާ 4000 ހައުސިންގ ޔުނިޓުގެ 2 މަޝްރޫޢުގައި ފިނިޝިންގ މަސައްކަތް ހިމެނޭކަމަށާއި، މަޝްރޫޢުގައި ހިމެނޭ ހުރިހާ ޔުނިޓުތަކެއްގެ ފިނިޝިންގ މަސައްކަތްތައް ނިންމާނެކަމަށެވެ. އަދި މި މަޝްރޫޢުތައް ކުރިޔަށް ގެންދިޔުމަށް މިހާރު ނަގާފައިވާ 2 ލޯނުގެ ތެރެއިން ފިނިޝިންގ މަސައްކަތްތައް ނިންމޭނެ ކަމަށްވެސް ބުނެފައިވެއެވެ. މިގޮތުން ފްލެޓްގެ މަސައްކަތްތައް ނިމޭއިރު ހުންނާނީ ޓައިލްސް ޖަހާ، ދޮރުތައް ހަރުކޮށް، ކުލަލާ، ލައިޓް ތަކާއި، ފަންކާއާއި، ފާހާނާ ފިޓިންގްސް ފުރިހަމަކޮށް، އަދި މިނޫންވެސް އިތުރު ފިނިޝިންގ މަސައްކަތްތައް ނިންމާފައިކަން އެެ ކޯޕަރޭޝަނުން ފާހަގަކުރެއެވެ. 

"ފިނިގަގަޝިންގ މަސައްކަތް ނިންމުމަށްޓަކައި އިތުރު ލޯނެއް ނަގަން ނުޖެހޭކަމާއި، ފިނިޝިންގ މަސައްކަތް ނިންމުމަށްޓަކައި ލޯނެއް ނަގަން ނުވަތަ ފައިސާ ހަމަޖައްސަން މި ކޯރޕަރޭޝަންގެ ފަރާތުން އެއްވެސް ބޭންކަކަށް ނުދާކަން ކަށަވަރުކޮށްދެވެމެވެ." ފަހިދިރިއުޅުން ކޯޕަރޭޝަނުން ބުނެފައިވެއެވެ. 

މިއާއެކު އެ ކޯޕަރޭޝަނުން ބުނީ، މި ފްލެޓްތަކަކީ އެތައް ދިވެހީންނެއް އިންތިޒާރުކުރާ ތަންތަނަށްވާއިރު، ރައްޔިތުންނަށް އޮޅުވާލުމުގެ ނިޔަތުގައި ހަގީގަތާއި ޚިލާފު މަޢުލޫމާތު ދިނުމަކީ  ހިތާމަކުރާ ކަމެއް ކަމަށެވެ.