ނަރުހުން ތަމްރީނު ކުރުމަށް ވިލާ ފައުންޑޭޝަނުން މޯލްޑިވްސް ނަރސަސް އެސޯސިއޭޝަނަށް ކޮންމެ އަހަރަކުވެސް ސްކޮލަޝިޕް ދިނުމަށް ނިންމައިފިއެވެ.
ވިލާ ފައުންޑޭޝަނުން ސްކޮލަޝިޕް ދޭން ފެށުން ލޯންޗް ކުރުމަށް މިއަދު ވިލާ ހައުސްގައި ބޭއްވި ރަސްމިއްޔާތުގައި ނަރސަސް އެސޯސިއޭޝަނަށް ތިން ސްކޮލަޝިޕް ވަނީ ހަވާލުކޮށްފައެވެ. އަދި ކޮންމެ އަހަރަކުވެސް ތިން ސްކޮލަޝިޕް ދިނުމަށް ވަނީ ނިންމާފައެވެ.
މި ސްކޮލަޝިޕަށް ނަގާނީ ދެ އަންހެން ދަރިވަރުންނާއި އެއް ފިރިހެން ދަރިވަރެކެވެ.
އެގޮތުން ވިލާ ފައުންޑޭޝަނުން މިއަހަރު ދޭ ސްކޮލަޝިޕް ހަވާލު ކޮށްދެއްވީ ވިލާ ފައުންޑޭޝަންގެ އެގްޒެކެޓިވް ޑިރެކްޓަރ މުހައްމަދު ހަމީދެވެ. މި ސްކޮލަޝިޕް ހަވާލު ކުރައްވާފައި ވަނީ ނަރސަސް އެސޯސިއޭޝަންގެ ސެކްރެޓަކީ ޖެނެރަލް މަރިޔަމް ޝިފާނާއާއެވެ.
މި ސްކޮލަޝިޕްގެ ދަށުން، ވިލާ ކޮލެޖްގައި ޑިޕްލޮމާ އިން ނަރސިންގް ކިޔެވުމަށް ޓިއުޝަންފީ ދައްކައިދޭނީ ވިލާ ފައުންޑޭޝަނުންނެވެ. އަދި ސްކޮލަޝިޕްގެ ލިޔެކިޔުންތަކުގެ ބައި ހަމަޖައްސާނީ ނަރސަސް އެސޯސިއޭޝަނުންނެވެ.
ނަރސަސް އެސޯސިއޭޝަންގެ އަގު ވަޒަން ކުރުމަށް ވިލާ ފައުންޑޭޝަނުން ހަނދާނީފިލާއެއް ދެނީ -- ފޮޓޯ/ ވޮއިސް
މި ރަސްމިއްޔާތުގައި ވިލާ ފައުންޑޭޝަންގެ ފަރާތުން ވާހަކަ ދައްކަވަމުން މުހައްމަދު ހަމީދު ވިދާޅުވީ، މިއީ ރާއްޖޭގައި ނަރުހުންގެ ޚިދުމަތް ދޭން ފެށިތާ 75 އަހަރު ފުރުމާ ގުޅުވައިގެން ދޭ ސްކޮލަޝިޕެއް ކަމަށެވެ.
ރާއްޖޭގެ ސިއްހީ ދާރިއާގައި ނަރުހުންނަނީ މުހިންމުބައެއްކަން ފާހަގަ ކުރައްވައި ހަމީދު ވިދާޅުވީ އެ ޚިދުމަތުގެ އަގު ވަޒަން ނުކުރެވޭނެ ކަމަށެވެ. ނަމަވެސް ބޭނުންވާ ވަރަށް ނަރުހުން ތަމްރީނު ނުކުރެވޭ ކަމަށް ހަމީދު ވިދާޅުވިއެވެ.
މި އަހަރުގެ މޭ އިންޓޭކަށް ވިލާ ކޮލެޖުން މިހާރު ވަނީ ފުރުސަތު ހުޅުވާލާފައެވެ. ކޯހަށް ފުރުސަތު ލިބުމާއެކު ކޯހުގެ އޮފަރ ލެޓަރ އާއެކު ނަރސަސް އެސޯސިއޭޝަނަށް ހުށަހެޅުމުން ކުދިން ނެގުމުގެ މަސައްކަތް ކުރިއަށް ގެންދާނެ ކަމަށް އެ އެސޯސިއޭޝަނުން މައުލޫމާތު ދެއެވެ.
Advertisement
This content is created and paid for by advertisers and does not involve Voice Journalists
