ދެ ދަރިންނަށް ހަރަދު ނުދިން މައްސަލައިގައި ބައްޕަގެ މަހު މުސާރަ، ވަޒީފާ އަދާކުރާ އިދާރާ މެދުވެރިކޮށް ކޯޓަށް ޖަމާ ކުރުމަށް މެޖިސްޓްރޭޓް ކޯޓަކުން ހުކުމް ކޮށްފިއެވެ.

މި މައްސަލަ އަކީ ދެ މީހުން ވަރި ވުމަށްފަހު ދެ ދަރިންގެ ހަރަދަށް ކޯޓު މެދުވެރިކޮށް ދޭންޖެހޭ 3000 ރުފިޔާ ކޮންމެ މަހަކު ދޭން ކުދިންގެ ބައްޕަ އެއްބަސްވެ 2019ގައި ހުކުމްކޮށްފައި އޮތް އޮތުމާ ހިލާފު ވުމުން، ހުށަހަޅާފައިވާ މައްސަލައެކެވެ. އެގޮތުން، ދެ ދަރިންނަށް ޖުމްލަ 70،000 އަށް ވުރެ ގިނަ ރުފިޔާ އެކުދިންގެ ބައްޕަ ނުދައްކާ ކަމަށް ރެކޯޑުތަކުން ދައްކައެވެ. ދަރިންގެ ޚަރަދަށް މިހާތަނަށް އޭނާ ކޯޓަށް ދައްކާފައި ވަނީ 68،000ރ. އެވެ.

އެ މައްސަލާގައި އެކުދިންގެ ބައްޕަ ވަނީ އޭނާ އަކީ ސަރުކާރުގެ ރަނގަޅު ވަޒީފާއެއްގައި ހުރި ފަރާތެއް ކަމަށާ، ނުދައްކާ އޮތް ފައިސާ ބަހާލައިގެން ދެއްކުމަށް އެއް އަހަރުގެ މުއްދަތެއް ދިނުމަށް ކޯޓުގައި އެދިފައެވެ.

އެއް އަހަރު ދުވަހުގެ ތެރޭގައި ފައިސާ ދެއްކުމަށް އިއުތިރާޒް ނުކުރާ ކަމަށް އަންހެން މީހާ ކޯޓުގައި ބުނި ނަމަވެސް އޭނާ އެދުނީ މުސާރައިން އެބައި އުނިކޮށް ލިބޭނެ ގޮތެއް ހަދައިދިނުމަށެވެ.

ނަމަވެސް މުސާރައިން އުނިކުރަން ފިރިހެންމީހާ އިންކާރު ކުރުމުން ގާޒީ ނިންމެވީ، އެ މައްސަލައަކީ ޝަރީއަތުން ގޮތެއް ކަނޑައަޅަން ޖެހޭ ކަމެއްގެ ގޮތުގަ އެެވެ.

އެހެންކަމުން، އާއިލާއާ ބެހޭ ގާނޫނާއި މެޖިސްޓްރޭޓް ކޯޓުތަކުގެ އާއިލީ އިޖުރާއަތުގެ އުސޫލްގެ 87 ވަނަ މާއްދާއާ ހަވާލާދީ ގާޒީ ވަނީ "ޚަރަދު ދޭން ޖެހޭ މީހާއަކީ ވަޒީފާއެއްގައި އުޅޭ މީހެއް ނަމަ އޭނާގެ މުސާރައިން ކެނޑުމަށް ފަހު ކޯޓަށް ފައިސާ ޖަމާކުރުމަށް އެ މީހާ ވަޒީފާ އަދާކުރާ އޮފީހަށް ނުވަތަ މަސައްކަތްކުރާ ތަނަށް އަންގައި އަމުރުކުރެވިދާނެ" ކަން އޮންނަކަން ފާހަގަކޮށް ދަރިންގެ ހަރަދަށް ދޭން ޖެހޭ ފައިސާ ފަސް މަހުގެ ތެރޭގައި އޭނާގެ މުސާރައިން އުނިކޮށް ނަގައިދިނުމަށް އޭނާ ވަޒީފާ އަދާކުރާ ތަނުގެ މައްޗަށް އަމުރުކޮށްފައެވެ.

އެއީ މަހަކު 5،847ރ އާއި ދެ ދަރިންނަށް ކޮންމެ މަހަކު ދޭން ޖެހޭ 3،000 ރުފިޔާއެވެ. އަދި ވަޒީފާއިން ވަކިވެއްޖެ ހާލަތެއްގައި ވެސް އެ ރުފިޔާ ދެއްކުމަށް އޭނާ މައްޗަށް ކުރި ހުކުމްގައި ވެއެވެ.