ޣައްޒާ އަށް އިޒްރާއިލުން ދެމުންދާ ހަމަލާތަކުގައި މިހާތަނަށް 21 މީހަކު ޝަހީދުވެއްޖެއެވެ.
ޝަހީދުވި 21 މީހުންގެ ތެރޭގައި ކުޑަ ކުދިންވެސް ހިމެނެއެވެ. އަދި ހަމަ މިއާއި އެކު މިހަމަލާތަކުގެ ސަބަބުން 64 މީހަކަށް އެކު ވަރުގެ އަނިޔާ ލިބިފައި ވާކަމަށް ފަލަސްޠީނުގެ ހެލްތް އޮފިޝަލަކު ވަނީ ބުނެފައެވެ.
މިއަދުވެސް އިޒްރާއިލުން ވަނީ ވައިގެ މަގުން ޣައްޒާ އަށް ހަމަލާ ދިފައެވެ. މި ހަމަލާތަކުގެ ސަބަބުން މިއަދުވެސް މިހާތަނަށް 3 މީހަކު ވަނީ ޝަހީދުވެފައެވެ. އިޒްރާއިލުން ޣައްޒާ އަށް މިގޮތަށް ހަމަލާދެމުން ދާތާ މިއީ ދެވަނަ ދުވަހެވެ. މިއަދުވެސް އިޒްރާއިލުން ވަނީ ޣައްޒާގެ އާންމުން ދިރިއުޅޭ ހިސާބުތަކަށް އެތައް ރޮކެޓެއް ފޮނުވައިފައެވެ.
ޣައްޒާގައި ދިރިއުޅޭ ލިޔުންތެރިއެއް ކަމަށްވާ ރަނާ ޝުބައިރް އަލްޖަޒީރާ އަށް ބުނެފައިވަނީ އިޒްރާއިލްގެ މި ހަމަލާތަކުގެ ސަބަބުން މުޅިން ސިއްސުވައިލައިފި ކަމަށެވެ.
"އަހަރެމެން އެންމެން ތިބީ ނިދާފަ، ކުއްލިއަކަށް އިވުނީ ބާރުގަދަ އެއްްޗެއް ގޮވި އަޑު" ރަނާ ބުނެފައިވެއެެވެ.
"މިހަމަލާތަކަކީ އިސްލާމިކް ޖިހާދާއި ދެކޮޅަށް ދޭ ހަމަލާތަކެއް ނޫން، މިއީ ސީދާ ފަލަސްޠީނުގެ ނިކަމެތި ރައްޔުތުންނާއި ދެކޮޅަށް ދޭ ހަމަލާތަކެއް، ޣައްޒާ އަކީ މީހުން ފުރި ބާރުވެފައި އޮތް ތަނެއް، ޢިމާރާތް ތައް ހުރީ ޖެހިޖެހިގެން މާބޮޑު ދުރުމިނެއް ނެތި، ގިނަ ބަޔަކު އެއްފަހަރާ މަރާލުމަށް ހިންގާ ޖަރީމާއެއް މިއީ" ރަނާ ބުނެފައިވެއެވެ.
Advertisement
This content is created and paid for by advertisers and does not involve Voice Journalists
