ދިވެހިރާއްޖެއިން ޢުމްރާއަށް މީހުން ގެންދަން ޝައުޤުވެރިވާ ފަރާތްތަކުން ޕްރޮޕޯސަލް ހުށަހެޅުމަށް މިނިސްޓްރީ އޮފް އިސްލާމިކް އެފެއާޒްއިން ފުރުސަތު ހުޅުވާލައިފިއެވެ.

އިސްލާމިކް މިނިސްޓްރީން ބުނީ، އަންނަ އާދީއްތަ ދުވަހުން ފެށިގެން މި މަހުގެ 23 ވާ އަންގާރަ ދުވަހުގެ ނިޔަލަށް، ޕްރޮޕޯސަލް ހުށަހެޅުމުގެ ފުރުސަތު ހުޅުވާލެވިފައި ވާކަމަށެވެ.

ޕްރޮޕޯސަލް ހުށަހެޅޭނީ "ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލު" ގެ ދަށުން، ޝަރުޠު ފުރިހަމަވާ ކުންފުނި ތަކަށް ކަމަށް އިސްލާމިކް މިނިސްޓްރީން މައުލޫމާތު ދެއެވެ.

Advertisement

ޢުމްރާއަށް މީހުން ގެންދިޔުމުގެ ހުއްދައަށް އެދި ހުށަހަޅަންޖެހޭ ޕްރޮޕޯސަލްފޮތް މިހާރު ފެށިގެން އިސްލާމިކް މިނިސްޓްރީގެ ވެބްސައިޓުއިން ލިބެން ހުންނާނެ ކަމަށާއި ޕްރޮޕޯސަލް ހުށަހަޅާނީ ސިޓީއުރައެއްގައި ބަންދުކޮށް، ސިޓީ އުރައިގެ ބޭރުގައި "ދިވެހިރާއްޖެއިން ޢުމްރާއަށް މީހުން ގެންދިއުމުގެ ހުއްދައަށް އެދި" މިހެން ލިޔެފައި ކަމަށް އިސްލާމިކް މިނިސްޓްރީން ބުންޏެވެ.

އުމްރާއަށް މީހުން ގެންދާ ކޮންމެ ކުންފުންޏަކުން ފީ އެއްގެ ގޮތުގައި 20،000 ރުފިޔާ ދައްކަން ޖެހެއެވެ.