ރާއްޖޭގެ ހާރިޖީ ވުޒާރާގައި 40 އަހަރަށް ވުރެ ގިނަ ދުވަހު މަސައްކަތް ކުރެއްވި އާބިދާ އަހްމަދުގެ ހަނދާނުގައި ތައުޒިޔާގެ ދަފްތަރެއް ހުޅުވުމަށް މިނިސްޓްރީ އޮފް ފޮރިން އެފެއާޒްއިން ނިންމައިފިއެވެ.

އާބިދާ ނިޔާވީ މިދިޔަ އާދީއްތަ ދުވަހުގެ ދަންވަރުގެ ވަގުތެއްގައެވެ. ނިޔާވިއިރު އުމުރަކީ 66 އަހަރެވެ.

ފޮރިން މިނިސްޓްރީން ބުނީ ތައުޒިޔާގެ ދަފްތަރު ހުޅުވުމަށް ހަމަޖެހިފައި ވަނީ އަންނަ އާދީއްތަ ދުވަހުން ފެށިގެން، މި މަހުގެ 18 ވަނަ ދުވަހުގެ ނިޔަލަށް ރަސްމީ ކޮންމެ ދުވަހެއްގެ ހެނދުނު 10:00 އިން މެންދުރުފަހު 2:00 އަށް ފޮރިން މިނިސްޓްރީގެ އަލްއަމީރު ޙަސަން ފަރީދު މާލަމުގައި (ގްރައުންޑް ފްލޯ) ކަމަށެވެ.

Advertisement

އާބިދާ ނިޔާވުމާއި ގުޅިގެން ޚާރިޖީ ވަޒީރު އަބްދުالله ޝާހިދު ކުރެއްވި ޓުވީޓެއްގައި ވިދާޅުވީ، އާބިދާ އަކީ ޚާރިޖީ ޓީމުގެ އެއް ތަނބު ކަމަށެވެ. 

"ވަފާތެރިކަމާއި، ލޯތްބާއި، ޝައުގުވެރިކަމާއެކު 40 އަހަރަށްވުރެ ގިނަ ދުވަހު މިނިސްޓްރީއަށް ޚިދުމަތްކުރައްވާފައިވޭ. އާބިއަކީ އެންމެންގެ އެކުވެރިއެއް." ޝާހިދު ވިދާޅުވި އެވެ. 

ޝާހިދު ވިދާޅުވީ، އާބިގެ ހަނދާން އެ މިނިސްޓްރީގެ މުވައްޒަފުންގެ ހިތްތަކުން ދުވަހަކުވެސް ފިލައިގެންނުދާނެ ކަމަށާ އޭނާ ނެތްކަމުގެ އިހުސާސް އަބަދުވެސް ވާނެ ކަމަށެވެ. މިއާއެކު ޝާހިދު ވަނީ އާބިދާގެ ފާފަފުއްސަވައި ސުވަރުގޭގެ ދާއިމީ ނިޢުމަތް މިންވަރުކުރެއްވުމަށާ، އާއިލާއަށާއި ގާތްތިމާގެ އެންމެނަށް މި ހިތްދަތި ދަނޑިވަޅުގައި ކެތްތެރިކަން ދެއްވުމަށް އެދި ދުޢާ ކުރައްވާފައެވެ.