ޤައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަނަށް ޖެހިޖެހިގެން ފަސް ކުއާޓާގައި ގެއްލުންވެފައިވާކަން ހާމަވެއްޖެއެވެ. 

އައިލެންޑް އޭވިއޭޝަނަކީ 2018 ވަނަ އަހަރު ފައިދާ ލިބި ދައުލަތަށް ޑިވިޑެންޑުގެ ގޮތުގައި ފައިސާ ދައްކަމުން އައި ކުންފުންޏެކެވެ. ނަމަވެސް ސަރުކާރު ބަދަލުވެ ކުންފުނީގެ ހިންގުމަށް ގެނައި ބަދަލުތަކާއެކު އެ ކުންފުނީގެ މާލީ ހާލަތު އަހަރަކުން އަހަރުން ދަށަށްދާ ކަމަށް ރިޕޯޓް ތަކުން އަންނަނީ ދައްކަމުންނެވެ. 

އެގޮތުން، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ކުއާޓާއަކު އެއްފަހަރު އާންމުކުރާ ދައުލަތުގެ ކުންފުނިތަކުގެ ކުއާޓާލީ މާލީ ރިޕޯޓުތަކުގެ ތެރެއިން 2022 ވަނަ އަހަރުގެ 3 ވަނަ ކުއާޓާގެ ރިޕޯޓުން ދައްކާގޮތުން، އެ ކުއާޓާގައި އެ ކުންފުންޏަށް އާމްދަނީގެ ގޮތުގައި 489 މިލިއަން ރުފިޔާ ލިބުނެވެ. ނަމަވެސް ހިންގުމުގެ ޚަރަދުތައް ކެނޑުމަށްފަހު އެ ކުންފުންޏަށް 12.6 މިލިއަން ރުފިޔާގެ ގެއްލުންވިއެވެ. އަދި ހުރިހާ ޚަރަދެއް ކަނޑައި ނިންމުމުން ލިބުނު ގެއްލުންވަނީ 15.23 މިލިއަނަށް އަރާފައެވެ.

2022 ވަނަ އަހަރުގެ 2 ވަނަ ކުއާޓާގައިވެސް އަދި ފުރަތަމަ ކުއާޓާގައިވެސް އެ ކުންފުންޏަށް ވީ ގެއްލުމެވެ. އެގޮތުން ދެވަނަ ކުއާޓާގައި 76.6 މިލިއަން ރުފިޔާގެ ގެއްލުން އަދި ފުރަތަމަ ކުއާޓާގައި 47.2 މިލިއަން ރުފިޔާގެ ގެއްލުން ވަނީ ލިބިފައެވެ.

މީގެ އިތުރުން، 2021 ވަނަ އަހަރުގެ 3 ވަނަ ކުއާޓާގައި 9.60 މިލިއަން އަދި 4 ވަނަ ކުއާޓާގައި 24.7 މިލިއަން ރުފިޔާގެ ގެއްލުން އެ ކުންފުންޏަށް ވަނީވެފައެވެ.