މިނިސްޓްރީ އޮފް އެޑިޔުކޭޝަނުން 30 ހަދިޔާ، ފޮށްޓާއި އެކު ގަތުމަށް 44,000 އަށްވުރެ ގިނަ ރުފިޔާ ޚަރަދު ކޮށްފައިވާ ކަން ހާމަވެއްޖެއެވެ.

އެޑިއުކޭޝަން މިނިސްޓްރީން 2023 އެޕްރީލް މަހު ކުރިއަށް ގެންގޮސްފައިވާ -/35,000ރ އިން މަތީގެ ޕްރޮކިއުމަންޓްތަކުގެ މަޢުލޫމާތު އެ މިނިސްޓްރީން ވަނީ މިއަދު ގެޒެޓުގައި އާއްމުކޮށްފައެވެ. 

އެގޮތުން، އޭގައި ވާގޮތުން، އެޑިއުކޭޝަން މިނިސްޓްރީން ވަނީ ފާއިތުވި އޭޕްރިލް މަހުގައި ކޭބީ މާޓް ނަމަކަށް ކިޔާ ފިހާރަ އަކުން، 30 ލެކުއާ ހަދިޔާ، ފޮއްޓާއި އެކު ގަނެފައެވެ. އަދި އެ ހަދިޔާ ގަނެފައިވަނީ 44,118ރ އަށް ކަމަށްވެސް އެ އިއުލާނުގައި ވެއެވެ. އެހެންކަމުން، މި މައުލޫމާތަށް ބަލާއިރު މިނިސްޓްރީން ވަނީ ކޮންމެ ހަދިޔާއަކަށް -/1470 ރުފިޔާ ޚަރަދު ކޮށްފައެވެ.

މިނިސްޓްރީން މިފަދަ ބޮޑު ޚަރަދެއް ހަދިޔާ ގަތުމަށް ކޮށްފައިވާއިރު، މިއީ ކޮންކަމަކު، ކޮންބަޔަކަށް ދޭން ގަނެފައިވާ ހަދިޔާއެއް ކަމެއް ހާމަކޮށްފައެއް ނުވެއެވެ. 

މީގެ އިތުރުން، އޯލެވެލް ޓޮޕް އެޗީވާސް އެވޯޑް އިވެންޓް މެނޭޖްމަންޓް އަށް 1,586،833 ރުފިޔާ އެޑިއުކޭޝަން އިން ޚަރަދު ކޮށްފައިވާއިރު، އެ ފައިސާ ދޫކޮށްފައިވަނީ، ތިންކް އެސޯސިއޭޓްސް ޕްރައިވެޓް ލިމިޓެޑް އާއެވެ.