ފަަލަަސްޠީނުގެ މުޤައްދަސް ބިން ފޭރިގަނެގެން އެތަނަށް ބޭރުން އަރާތިބި ޒަޔަނިސްޓް ޔަހޫދީ ޖަމާޢަތަކަށް އެ ބިމުގައި ދައުލަތެއްގެ ޙައްޤު އޮތްކަމަށް ޤަބޫލުކުރުމީ އުންމަތުގެ ޙައްޤުގައި ވެވޭ ބޮޑުވެންވާ ޚިޔާނާތެއް ކަމަށް ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝެއިޚު އަހުމަދު ސަމީރު ވިދާޅުވެއްޖެއެވެ.
ފަލަސްޠީނުގެ ބިމަށް ގަދަކަމުން ވެރިވެގެންފައިވާ ޔަހޫދީން ޣައްޒާ އަށް ދެމުންދާ ހަމަލާތައް ކުށްވެރިކޮށް ދިވެހި ސަރުކާރުން އިއްޔެ ނެރުނު ބަޔާނުގައި ވަނީ، ފަލަސްޠީނު ގެ މައްސަލައަށް ދާއިމީ ސުލްހަވެރި ހައްލެއް ގެނެވޭނީ "ޓޫ ސްޓޭޓް ސޮލިއުޝަން" ނުވަތަ ފަލަސްޠީނާއި އިސްރާއީލަކީ ވަކި ދެ ދައުލަތެއްގެ ގޮތުގައި ޤާއިމުކުރެވިގެންކަން ބުނެފައެވެ.
އެކަމާއި ގުޅިގެން ޝެއިޚް ސަމީރު ފޭސްބުކުގައި ކޮށްފައިވާ ޕޯސްޓެއްގައި ވިދާޅުވީ، ފަލަަސްޠީނުގައި 2 ދައުލަތެއް ނޯންނާނެ ކަމަށާ އެއީ ހަމައެކަނި ފަލަސްޠީނު ކަމަށެވެ.
"ފަަލަަސްޠީނުގެ މުޤައްދަސް ބިން ފޭރިގަނެގެން އެތަނަށް ބޭރުން އަރާތިބި ޒަޔަނިސްޓް ޔަހޫދީ ޖަމާޢަތަކަށް އެ ބިމުގައި ދައުލަތެއްގެ ޙައްޤު އޮތްކަމަށް ޤަބޫލުކުރުމީ އުންމަތުގެ ޙައްޤުގައި ވެވޭ ބޮޑުވެންވާ ޚިޔާނާތެކެވެ. ފަލަސްޠީނުގެ ބިން ފޭރިގަނެގެން ބޭރުން އަރާތިބި ހަރުކަށި ޓެރަރިސްޓް ޖަމާޢަތަކަށް، ފަސްޠީނުގެ ބިމުގެ 78 އިން ސައްތަ ދޭގޮތަށް “ 2 ދައުލަތުގެ ޙައްލު” ގެ ނަމުގައި ހުޅަނގުން ހުށައެޅިމަކަރުވެރި ރޭވުމަކީ ޔަހޫދީ ދައުލަތް ފުޅާކޮށް އެއުރެންގެ ބާރު މުޅިތަނަށް ފަތުރަން މަޖްބޫރު ކުރުވި ދަންތުރައެކެވެ."
ޝެއިޚް އަހުމަދު ސަމީރު
މިއާއެކު ޝެއިޚު ވިދާޅުވީ، އެ މައްސަލާގައި “2 ދައުލަތުގެ ޙައްލު” ގެ ވާހަކައަކީ ސީދާ ކަމާގުޅުން ހުރި އެއްވެސް ބަޔަކު މިހާރު ޤަބޫލުކުރާ އެއްޗެއްވެސް ނޫން ކަމަށެވެ.
އަދި އެހުށައެޅުން މެދުވެރިކޮށް، އެ ހުށަހެޅުމުގެ ބައިވެރިން ކަމުގައިވާ ހުޅަނގާއި، އެމެރިކާގެ އެހީތެރިކަމާއެކު ޔަހޫދީން ފަލަސްތީނުުގައި ވަޒަންވެރި ކުރުވުމާއި، ހަމަ އެ ހުށައެޅުމުގައި ފަސްޠީނުގެ ސަރަޙައްދުގެ ގޮތުގައި ހުށައަޅާފައިވާ ޤުދުސްގައި އެމެރިކާއައި އެނޫންވެސް ހުޅަނގުގެ ޤައުމުތަކުގެ “އިޒްރޭލް އެމްބަސީ” ޤާއިމުކުރުމާއި، މިނޫންވެސް އެތައް ކަމެއްް ހިމެނޭ ކަން ޝެއިޚު ފާހަގަކުރެއްވިއެވެ. އެހެންކަމުން މިއަދު އެ ބުނާ “2 ދައުލަތުގެ ޙައްލަ”ކީ އަވާމެންދުރެއްކަން އެންމެންނަށްވެސް ސާބިތު ވެފައިވާ ކަމަށް ޝެއިޚް ވިދާޅުވި އެވެ.
މިއަދު ފަލަސްޠީނަށް އަރާތިބި ޒަޔަނިސްޓް ޔަހޫދީންނާއި އެމީހުންގެ މީހުންގެ ބާރު ކިތެއްމެ ގަދަވިޔަސް މުސްލިމެއްގެ ހިތުގައި އެބިމުން ކައިވަތެއްގެ މިންވަރުވެސް ޣާޞިބުންނަށް ޙައްޤު ކަމުގައި ދެކިގެން ނުވާނެ ކަމަށްވެސް ޝެއިޚު ވިދާޅުވި އެވެ.
ޝެއިޚް ސަމީރު ވިދާޅުވީ އަނިޔާވެރިކަމާއެކު ބިމަށް އަރައިގަނެވިދާނެ ކަމަށާ އެހެނަަސް އަހަރެމެންގެ ހިތުގެ ޢަޤީދާއަށް އަރައިގަތަދީގެން ނުވާނެ ކަމަށެވެ.
މި މައްސަލަ އަށް އޮތް ޙައްލަކީ ދީނަށް އެނބުރި އައިސް ޖިހާދުކޮށް ޤުދުސް މިނިވަން ކުރުން ކަމަށްވެސް ޝެއިޚު ވިދާޅުވި އެވެ.
"މާތް الله ޒަނިސްޓުންގެ އަނިޔާވެރިކަމުން އެބިންޠާހިރުކޮށް ދެއްވާށި! އެއުރެންގެ މަކަރުވެރި އަނިޔާވެރި ޢަމަލުތަކުން އަޅަމެެން ރައްކާތެރި ކުރައްވާށި! އާމިން" ޝެއިޚު ސަމީރުގެ ފޯސްޓުގައި ވެއެވެ.
Advertisement
This content is created and paid for by advertisers and does not involve Voice Journalists
