އިޒްރާއިލުން ޣައްޒާ އަށް ދޭން ފެށި ހަމަލާ ތަކާއި، އޭގެ ރައްދުގައި ފަލަސްޠީން އިސްލާމިކް ޖިހާދުގެ ހަނގުރާމަވެރިން އިޒްރާއިލް ރައްޔިތުން އުޅޭ ސަރަހައްދަށް ދެމުންދިޔަ ހަމަލާތައް ހުއްޓާލުމަށް ދެފަރާތުން އެއްބަސްވުމަކަށް އަތުވެއްޖެއެެވެ.

5 ދުވަހަށް ދެމިގެން ދިޔަ ހަމަލާތައް ހުއްޓުމަކަށް އައިރު ފަލަސްޠީނުގެ 35 މީހަކު ވަނީ ޝަހީދުވެފައެވެ. އެންމެ ފަހުން އިޒްރާއިލުން ދިން ރޮކެޓް ހަމަލާތަކުގައި ވެސް ފަލަސްޠީނުގެ ތިން މީހަކު ވަނީ ޝަހީދުވެފައެވެ.

ހަމަލާތައް ހުއްޓާލައި މި ލިބުނި އަމާން ކަމަކި ޣައްޒާގެ 2 މިލިއަނެއްހާ މީހުންނަށާއި ފަލަސްޠީނުގެ ބިމުގައި ދިރިއުޅެމުންއަންނަ އެތައް ހާސް އިޒްރާއިލް ރައްޔިތަކަށް ހަމަޖެހުމެއް ގެނެސްދޭނެ ކަމަކަށް ވެގެންދާނެއެވެ. ދެފަރާތަުން ބަދަލު ކުރަމުން ދިޔަ ހަމަލާތައް ހުއްޓާލުމަށް މަޝްވަރާ އަށް ދިއުމަށް މެދުވެރިއެއްގެ ދައުރު އަދާކޮސްފައިވަނީ މިޞްރުންނެވެ.

ޣައްޒާގެ ރައްޔިތުން އެމީހުން ދިރިއުޅެމުންދިޔަ އެޕާޓްމެންޓްތައް ހުރި ސަރަހައްދު ތަކަށް އެނބުރި ގޮސްފައި ވާއިރު އެތަން ތަނުން ފެންނަން ހުރީ ހަލާކުވެ ގައު ކުންޏަށް ވެފައި ހުރި ފާރުތަކާއި ހަކާކުވެފައި ހުރި ފަރުނީޗަރު ފަދަ ތަކެއްޗެވެ. އިޒްރާއިލުން އެތަންތަނަށް ހަމަލާ ދީފައި ވަނީ އެތަންތަނަކީ އިސްލާމިކް ޖިހާދުގެ ހަނގުރާމަވެރިން  ފިލާ ތިބި އައްޑާތަކެއް ކަމަށް ބުނެއެެވެ.

ހަމަލާތައް ދެމުންދާތީ ޣައްޒައަށް މުދާ އެތެރެ ކުރާ މައި ދޮރު ބަންދު ކުރެވުނެވެ. އިޒްރާއިލުން ވަނި މިހާރު އެތަން ހުޅުވައިފައެެވެ. އަދި އެ މަގު ބަންދު ކޮށްފައި ބަހައްޓާނަމަ ޣައްޒާ އަށް ކަރަންޓު ދޫކުރާ ޕަވަރ ޕްލާންޓް ބަންދުކޮށް ކަރަންޓު ނެތި އުނދަގޫ ވާނެ ވަރަށް ދަތި ކުރާނެ ކަމަށް އިޒްރާއިލުން ވަނީ އިންޒާރު ދީފައެވެ.

އިޒްރާއިލް ސިފައިން ބުނެފައިވަނީ އިސްލާމިކް ޖިހާދުގެ ގިނަ ބަޔަކު ޝަހީދު ކޮށްލެވުމަކީ ލިބުނު ބޮޑު ހިތްހަމަ ޖެހުމެއް  ކަމަށެވެ. ނަމަވެސް ހަމަލާތަކުގައި ޝަހީދުވި މީހުންގެ ތެރެއިން 13 މީހުންނަކީ އާންމު ރައްޔިތުންނެވެ. އަދި އޭގެ ތެރޭގައި އަންހެނުންނާއި ކުޑަ ކުދިންވެސް ހިމެނެއެވެ. އޭގެ ތެރޭގައި 4 އަހަރުގެ ތުއްތު ކުއްޖަކާއި އުމުރުން ދުވަސްވި އަންހެނަކު ވެސް ހިމެނެއެެވެ.