ތުރުކިޔޭވިލާތުގައި އިއްޔެ ބޭއްވި ރިޔާސީ އިންތިހާބު އެއްބުރުން އެއްވެސް ކެންޑިޑޭޓަކަށް ކާމިޔާބުނުވެ ދެވަނަ ބުރަކަށް ދާން ޖެހިއްްޖެއެވެ. 

އިއްޔެގެ ވޯޓަށްފަހު ތުރުކީގެ ސުޕްރީމް އިލެކްޝަން ކައުންސިލްއިން އާންމުކޮށްފައިވާ ވަގުތީ ނަތީޖާ ދައްކާގޮތުން އެގައުމުގެ މިހާރުގެ ރައީސް އުރުދޮޣާންއަށް ކާމިޔާބު ކުރެއްވިފައިވަނީ %49.49 ވޯޓެވެ. އަދި ކަމާލް ކިލިޗްޑަރޮގްލޫއަށާ ކާމިޔާބު ކުރެއްވިފައިވަނީ %44.79 ވޯޓެވެ.

އިންތިހާބު އެއްބުރުން ކާމިޔާބު ކުރަން %50 އަށް ވުރެ އިތުރަށް ވޯޓު ލިބެން ޖެހެއެވެ. ނަމަވެސް އެވަރަށް އެއްވެސް ކެންޑިޑޭޓަކަށް ވޯޓު ލިބިފައި ނުވާތީ އެންމެ ގިނަ ވޯޓު ލިބުނު ދެ ކެންޑިޑޭޓުން ކަމަށްވާ އުރުދޮޣާން އަދި އިދިކޮޅު ކެންޑިޑޭޓް ކަމާލް ކިލިޗްޑަރޮގްލޫ ވަނީ ދެވަނަ ބުރެއްގައި ވާދަކުރަން ޖެހިފައެވެ. 

Advertisement

އިންތިހާބު ގެ ދެވަނަ ބުރުގައި ވޯޓު ލުން އޮންނާނީ މި މަހުގެ 28 ވަނަ ދުވަހު އެވެ. މި އިންތިހާބުގައި 60 މިލިއަނަށް ވުރެ ގިނަ މީހުންނަށް ވޯޓުލުމުގެ ހައްގު ލިބިފައިވެއެވެ.

ތުރުކިުޭގައި ކުރިއަށްދާ ރިޔާސީ އިންތިހާބަކީ މި ފަހުގެ ތާރީހުގައި އެ ގައުމުގައި ކުރިއަށްދާ އެންމެ ވާދަވެރި އިންތިހާބެވެ. މި އިންތިޚާބުގައި 4 ކެނޑިޑޭޓަކު ވާދަކުރިނަމަވެސް، އިންތިޚާބު ކުރިޔަށް ގޮސްފައިވަނީ ރައީސް އުރުދޮޣާން އާއި އޭނާއާއި ވާދަކުރާ، ގިނަ އިދިކޮޅު ޕާޓީތައް އެކުވެގެން އުފައްދާފައިވާ، އިދިކޮޅު އިއްތިހާދުގެ ކެނޑިޑޭޓް ކަމާލްއާ ދެބޭފުޅުންގެ މެދުގައި ކުރިޔަށްދާ ވާދެވެރި އިންތިޚާބެއްގެ ގޮތުގައެވެ. 

ހިޔާލު ހޯދުމުގެ ވޯޓުން ދައްކާ ގޮތުގައި ތާއީދު ބޮޑީ އިދިކޮޅު ލީޑަރު އަދި ރިޕަބްލިކަން ޕީޕަލްސް ޕާޓީގެ ލީޑަރަށެވެ. އެހެންވެ، މި އިންތިހާބަކީ 2014 ވަނަ އަހަރު ވެރިކަމާ ހަވާލުވެވަޑައިގެންނެވި އުރުދޮޣާންގެ ވެރިކަން، އިތުރަށް ދެމިއޮންނާނެތޯ ކުރެވޭ ސުވާލުތަކަށް ނިމުމެއް އަންނާނެ އިންތިހާބެކެވެ.