އެޓަރނީ ޖެނެރަލް އަލްއުސްތާޛު އިބްރާހީމް ރިފްޢަތުގެ އިތުބާރު ނެތްކަމުގެ މައްސަލައެއް ރައްޔިތުންގެ މަޖިލީހަށް ލިބިފައިވާ ކަމަށާއި މި މައްސަލަ ޤާނޫނު އަސާސީއާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން ކުރިއަށްގެންދެވޭނެ ކަމަށް ރައްޔިތުންގެ މަޖިލީހުން ބުނެފިއެވެ.

ރިއްފަތުގެ އިތުބާރު ނެތްކަމުގެ މައްސަލަ ގުޅިފައިވާ ސިޔާސީ ޕާޓީތަކުން މަޖިލީހަށް ހުށަހަޅާފައި ވަނީ ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް ބުނެއެވެ.

Advertisement

ފޯޅަވަހި މައްސަލައިގައި ސަރުކާރުން އަމަލުކޮށްފައިވަނީ ޤާނޫނު އަސާސިއާއި ޚިލާފަށްކަމަށް ޤަބޫލުކުރާ ސިޔާސީ ޕާޓީތައް ވަނީ އެ މައްސަލައިގައި ގުޅިގެން ކުރިއަށް ދިއުމަށް އިއްތިހާދެއް އެކުލަވާލާފަ އެވެ. އެ ޕާޓީތަކުގެ ތެރޭގައި ހިމެނެނީ ޕީޕީއެމް-ޕީއެންސީ ކޯލިޝަނާއި، އެމްޑީޕީގެ ރައީސް މުޙައްމަދު ނަޝީދު ފިކުރެއްގެ ދިރުމާއި، ޖުމްހޫރީ ޕާޓީ އާއި އަދި އެމްއެންޕީއެވެ. 

ރިއްފަތުގެ އިތުބާރު ނެތްކަމުގެ މައްސަލަ ގުޅިފައިވާ ސިޔާސީ ޕާޓީތަކުން މަޖިލީހަށް ހުށަހެޅުމާއެކު، އެކަމާ ދެކޮޅަށް ތްރީލައިންވިޕެއް ނެރުމަށް އެމްޑީޕީން ވަނީ ތައްޔާރުވާން ފަށާފައެވެ.

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރ އަދި އެމްޑީޕީ ޕީޖީ ގްރޫޕްގެ ލީޑަރ މުހައްމަދު އަސްލަމް "ވޮއިސް" އަށް ވިދާޅުވީ، އެކަމާ ގުޅިގެން އެމްޑީޕީ ޕާލަމެންޓްރީ ގްރޫޕުގެ ބައްދަލުވުމެއް ނުބާއްވާ ކަމަށާއި ނަމަވެސް ތްރީލައިން ވިޕެއް ނެރޭނެ ކަމަށް ވަރަށް ބޮޑަށް އުންމީދު ކުރެވޭ ކަމަށެވެ.

"އެއީ އަބަދުވެސް ސަރުކާރުގަ ތިބޭ ސަރުކާރު ވަޒީރުންނާ ދެކޮޅަށް އަންނަ މައްސަލަތަކުގަ މީގެ ކުރީގެ އެމްޑީޕީ ސަރުކާރު 2008 ވަނަ އަހަރުން 2012 ވަނަ އަހަރާ ހަމަޔަށް އޮތް އިރުވެސް ވަޒީރެއްގެ އިރުބާރު ނެތްކަމުގެ މައްސަލައެއް ވެއްޖެއްޔާ ތްރީލައިން ވިޕް ނެރެފަ ހުރީ އެކަމާ ދެކޮޅަށް" އަސްލަމް ވިދާޅުވިއެވެ.

އެ އުސޫލުން ބަލާއިރު މިފަހަރުވެސް ތްރީލައިން ވިޕެއް ނެރޭނެ ކަމަށް ބެލެވޭ ކަމަށާއި ނަމަވެސް އެކަން ރަސްމީކޮށް ނިންމާނީ މެމްބަރުން ކަމަށާއި އެ މައްސަލައާ މެދު މަޝްވަރާ ކުރާނެ ކަމަށް އަސްލަމް ވިދާޅުވިއެވެ.