އެމްޑީޕީގެ ރައީސް މުޙައްމަދު ނަޝީދު ބޭނުންފުޅުވީމާ މެމްބަރުން ޕާޓީން ވަކިކުރި ޒަމާން ނިމުމަކަށް އައިސް އެމްޑީޕީ އައު ލީޑަޝިޕަކަށް އަލިވިލިއްޖެ ކަމަށް ރޯޑް ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓާ މޫސާ އަލިމަނިކު (މޫކޭ) ވިދާޅުވެއްޖެ އެވެ. 

މޫކޭ މިފަދައިން ވިދާޅުވެފައި ވަނީ ފޯޅަވަހި މައްސަލައިގައި ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ސޮއި ކުރުމާއި ގުޅިގެން އެމްޑިޕީގެ ޕީޖީގައި ހިމެނިވަޑައިގަންނަވާ މެދު ހެންވޭރު ދާއިރާގެ މެމްބަރު އަލީ އާޒިމް ޕާޓީން ވަކިކުރުމާއި ގުޅިގެން ރައީސް ނަޝީދު ނުުރުހުން ފާޅުކުރައްވާ ޓްވީޓު ކުރެއްވި ޕޯސްޓަކަށް ރައްދުދެއްވަމުން ނެވެ. 

މޫކޭ ވިދާޅުވީ މިއީ ނަޝީދު ބޮޑުވަޒީރު ހެދިގެން ބޭނުންފުޅުވާ މެންބަރުން ޕާޓީންގެ ކެނޑި ޒަމާން ނޫން ކަމަށެވެ. އެ ޒަމާން ބަދަލުވެފައިވާ ކަމަށާއި، މިހާރު ޕާޓީ ހިންގުމަށް ތިއްބެވީ އައު ލީޑަޝިޕެއްކަން މޫކޭ ވަނީ ނަޝީދަށް ހަނދާންކޮށްދެއްވާފަ އެވެ. 

Advertisement

އެއާއެކު މޫކޭ ވިދާޅުވީ ޒަމާން ބަދަލުވެ އެމްޑީޕީ މިނިވަންވެއްޖެ ކަމަށެވެ. އަދި ދެން ނަޝީދަށް އެ ޕާޓީ ހިފަހައްޓާ ނުލެވޭނެކަމަށް އޭނާ ވިދާޅުވި އެވެ. 

މޫކޭ މިފަދައިން ވިދާޅުވެފައިވާއިރު، އެމްޑީޕީގެ ރިޔާސީ ކެންޑިޑޭޓު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ތާއީދު ކުރައްވާ މެންބަރުން ގެންދަވަނީ އާޒިމް ޕާޓީން ވަކިކުރި ކުރުން ދިފާއު ކުރައްވަމުން ނެވެ. 

އޭނާ ޕާޓީން ވަކިކޮށްފައިވަނީ ޕާޓީގެ އަސާސީ ޤަވައިދާއި ޚިލާފުވެފައިވާކަމަށް މައްސަލަ ބަލާ ކޮމެޓީއިން ނިންމި ނިންމުމާއި ގުޅިގެންނެވެ. 

ރައީސް ޞާލިހަށް ތާއީދު ކުރައްވާ އެމްޑީޕީގެ ޕީޖީ ގުރޫޕުގެ މެމްބަރުން ވިދާޅުވީ ފޯޅަވަހި މައްސަލައިގައި ހަދާފައިވާ "ކަނޑު ވިއްކާލުމާއި ދެކޮޅު" އިއްތިހާދުގެ މަސައްކަތްތަކާއި ބައިވެރިވެ ރައީސް ޞާލިހުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް މަސައްކަތް ކުރާ އެމްޑީޕީގެ މެމްބަރުންނާއި ދޭތެރޭ ފިޔަވަޅު އަޅަން ފަސް ނުޖެހޭނެ ކަމަށެވެ.