ޕޯލްޓްރީ ދޫންޏާއި ލައިވްސްޓޮކް އެތެރެކުރުމުގެ ހުއްދަ މީގެފަހުން ދޫކުރާނީ އެފަދަ ތަކެތި ގެންގުޅެވޭނެ ފާމެއް މިނިސްޓްރީގައި ރަޖިސްޓްރީކޮށްފައިވާ ފަރާތްތަކަށް ކަމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ހާމަކުރައްވައިފިއެވެ.
އެމިނިސްޓްރީން މިގޮތަށް ހާމަކުރެއްވީ ޕޯލްޓްރީ ފާމްތަކުގައި ގެންގުޅުމަށް އެފަދަ ދޫނި އެތެރެކުރުމަށް ދޫކުރާ ހުއްދައިގެ ދަށުން އޮސްޓްރިޗް ނުވަތަ ގިނިކާމާދޫނި ފަދަ ބޮޑެތި ދޫނި އެތެރެކޮށް އޭގެ ދިރޭ ދޫނި ވިއްކަމުން ގެންދާތީ އެފަދަ ދޫނި ގަނެގެން ޕެޓްގެ ގޮތުގައި ބައެއް ފަރާތްތަކުން ގޭގައި މީހުންގެ ތެރޭގައި ގެންގުޅޭ ކަމުގެ ޝަކުވާ ލިބުމާއި ގުޅިގެންނެވެ.
މިގޮތަށް މިފަދަ ދޫނި ގެންގުޅޭ ވީޑިއޯތައް މީސް މީޑިއާގައިވެސްވަނި އާންމުވެފައެވެ.
އެކަމާއި ގުޅޭގޮތުން އެ މިނިސްޓްރީން ނެރުނު ބަޔާނުގައި ބުނެފައިވަނީ ޕޯލްޓްރީ ދޫންޏަށް ހުއްދަދެނީ އެފަދަ ދޫނި ގެންގުޅުމަށް މިނިސްޓްރީން ކަނޑައަޅާފައިވާ މިންގަނޑުތަކަށް ފެތޭ ފާމުތަކުގައި ގެންގުޅުމަށް ކަމަށެވެ.
އެ މިންގަނޑު ބިނާވެފައިވަނީ ޖަނަވާރު ގެންގުޅުމުގައި ބައިނަލްއަޤުވާމީގޮތުން ޢަމަލުކުރާ ދުޅަހެޔޮކަމުގެ މިންގަނޑުތަކާއި، އަދި ޙަޔަވީ ރައްކާތެރިކަން ނުވަތަ ބަޔޯ ސެކިއުރިޓީގެ މިންގަނޑުތަކުގެ މައްޗަށް ކަމަށް އެމިނިސްޓްރީން ވިދާޅުވެއެވެ. އެހެންކަމުން ޢާއްމުންގެ ސަލާމަތާއި ރައްކާތެރިކަމަށްޓަކައި ގިނިކާމާދޫނި ފަދަ ބޮޑެތި ދޫނި ގެންގުޅެންޖެހެނީ މީހުން ދިރިއުޅޭ ސަރަޙައްދާއި ދުރުގައި އެކަމަށް ޚާއްސަ ފާމުތަކުގައި ކަމަށް މިނިސްޓްރީން ބުނެފައިވެއެވެ.
ރާއްޖެއަށް މިފަދަ ބޮޑެތި ޖަނަވާރު އެތެރެކޮށް ގެންގުޅުމުގެ ހުއްދަ ދޫކުރަންފަށާފައިވަނީ، ރާއްޖޭގައި ޒިރާޢީ ބޭނުންތަކަށް ދިރޭ ޖަނަވާރު ގެންގުޅުމުގެ ސިނާޢަތް ކުރިއެރުވުމުގެ މަޤުސަދުގައި ކަމަށް ފިޝަރީޒް މިނިސްޓްރީން ވަނީ ބުނެފައެވެ.
ޖަނަވާރު އެތެރެކުރުމުގެ ހުއްދަ ދެނީ ވަކި މިންގަނޑުތަކަށް ރިޢާޔަތް ކުރެވިގެން ކަމަށްވާއިރު، އެފަދަ ޖަނަވާރުތަކުގެ ރައްކާތެރިކަމާއި ޢާއްމުންގެ ސަލާމަތާއި ރައްކާތެރިކަމަށްޓަކައި ހެދިފައިވާ އުސޫލުތަކަށް ޖަނަވާރު އެތެރެކުރާ ފަރާތްތަކުން ބޯލަނބާ އެކަމުގައި ޒިންމާދާރުވާންޖެހޭނެކަމަށް މިނިސްޓްރީން އަންގާފައިވެއެވެ.
އެހެންކަމުން މިއަދުން ފެށިގެން މިފަދަ ދޫނި އެތެރެކުރުމުގެ ހުއްދަ ދޫކުރާނީ އެފަދަ ތަކެތި ގެންގުޅެވޭނެ ފާމެއް މިނިސްޓްރީގައި ރަޖިސްޓްރީ ކޮށްފައިވާ ފަރާތްތަކަށް ކަމަށް ފިޝަރީޒް މިނިސްޓްރީން ވަނީ އަންގާފަ އެވެ.
Advertisement
This content is created and paid for by advertisers and does not involve Voice Journalists
