އެމްޓީސީސީ ހުނަވަރު ޕްރޮގްރާމްގެ ދަށުން ވެލްޑަރުން ތަމްރީންކުރުމުގެ ޕްރޮގްރާމަށް ބައިވެރިން ހޮވުމަށް އޯޕަން ޑޭސެޝަންތަކެއް 3 އަތޮޅެއްގައި ބާއްވާގޮތަށް ހަމަޖެހިއްޖެއެވެ. 

އެމްޓީސީސީ އިން ބުނީ އޯޕަންޑޭ ބޭއްވުމަށް ހަމަޖެހިފައިވަނީ 18 މެއި އިން 27 މެއި ގެ ނިޔަލަށް ލާމު އަތޮޅާއި، އައްޑޫ ސިޓީ އަދި ފުވައްމުލަށް ސިޓީގައި ކަމަށެވެ. އަދި މުސްތަޤުބަލުގައި ރާއްޖޭގެ އެހެނިހެން އަތޮޅުތަކުގައިވެސް އެމްޓީސީސީ ހުނަވަރު ޕްރޮގްރާމަށް ބައިވެރިން ހޯދުމަށް އޯޕަންޑޭ ބޭއްވުމަށް ހަމަޖެހިފައިވާ ކަމަށެވެ.

އެމްޓީސީސީން ބުނީ އެ ކުންފުނީގެ އަމާޒަކީ މި ޕްރޮގްރާމް މެދުވެރިކޮށް "ވެލްޑަރ – ހުނަވަރު ޓްރޭނީ" މަޤާމުގެ 15 ވެލްޑަރުން ތަމްރީން ކުރުން ކަމަށެވެ.

Advertisement

އެމްޓީސީސީން އިތުރަށް ބުނީ މި ޕްރޮގްރާމްގެ މައިގަނޑު މަޤްސަދަކީ އެމްޓީސީސީގެ އިންޖިނިއަރިންގ އެންޑް ޑޮކިންގ ޑިވިޜަނަށް ބޭނުންވާ ވެލްޑަރުން ހޯދުން ކަމަށާ، ވޭތުވެދިޔަ އަހަރުތަކުގެތެރޭގައި، އެ ޑިވިޜަންގެ މަސައްކަތްތައް ވަރަށް ބޮޑަށް ފުޅާވެ ކުރިއަރައިގެން ގޮސްފައިވާ ކަމަށެވެ.

އެ ކުންފުނީގެ ބޭނުމަކީ މިފަދަ ޓްރެއިނިންގ ތަކުގެ ސަބަބުން މި ދާއިރާގައި ބިދޭސީންނަށް އޮތް ބަރޯސާވުން ވީހާވެސް ކުޑަކުރުމަށްވެސް އެ ކުންފުނިން ބުނެއެވެ.

3 މަސް ދުވަހުގެ މުއްދަތަށް ކުރިއަށްދާ މި ކޯހުގެ ތެރެއިން ރާއްޖޭގައި ތަމްރީންވުމަށްފަހު ވަޒީފާއަށް ހޮވޭފަރާތްތަކަށް ކުރިމަގުގައި ރާއްޖޭން ބޭރުގައި ތަމްރީންވުމުގެ ފުރުޞަތުވެސް ފަހިވެގެންދާނެ ކަމަށް އެމްޓީސީސީން މައުލޫމާތުދެއެވެ. އަދި މި ޕްރޮގްރާމްގައި ބޮޑަށް އަޙައްމިއްޔަތުކަން ދެވޭނީ އިންޑަސްޓްރިއަލް ވެލްޑިންގެ ފަންނު ތަރައްޤީކުރުމަށް ކަމަށާ، އެގޮތުން ކަނޑުގައި ދުއްވާ އުޅަނދުފަހަރު މަރާމާތުކުރުމާއި ބަނުމުގައި ކުރާ ވެލްޑިންގެ ހުނަރުތައް ބައިވެރިންނަށް ދަސްކޮއްދެވޭނޭ ކަމަށެވެ.

މި ޕްރޮގްރާމަށް ކުރިމަތި ލުމުގެ ފުރުޞަތު ދެ ޖިންސުގެ 25 އަހަރުން ދަށުގެ ބައިވެރީންނަށް ވަނީ ހުޅުވާލެވިފައެވެ. މި ޕްރޮގްރާމަށް ކުރިމަތިލާ ފަރާތަކީ ޖިސްމާނީ ގޮތުން ދުޅަހެޔޮ ސިއްޙަތެއްގައި ހުރި ފަރާތަކަށް ވާންޖެހެއެވެ. ހަމައެހެންމެ އެއްގަމާއި ކަނޑުމަތީގައި މަސައްކަތް ކުރުމަށް ޝައުގުވެރިކަންހުރި ކަނޑުމައްޗަށް ފަރިތަ މީހެއް ކަމުގައި ވާންޖެހެއެވެ. މީގެ އިތުރުން، ހިސާބު، ފިޒިކްސް، ކެމިސްޓްރީ ހިމެނޭހެން އޯ ލެވެލް 3 މާއްދާއިން ފާސްވެފައިވާ ފަރާތްތަކަށް އިސްކަން ދެވޭނެ ކަމަށް އެމްޓީސީސީ އިން ބުނެއެވެ. 

މި ޕްރޮގްރާމަށް ހޮވޭ ބައިވެރިންނަށް 5,000 ރުފިޔާގެ އެޕްރެންޓިސްޝިޕް އެލަވަންސަކާއި 3,000 ރުފިޔާގެ އެކޮމޮޑޭޝަން އެލަވަންސެއް ދޭ ގޮަތަށް ވަނީ ހަމަޖެހިފައެވެ.

މި ޓްރޭނިންގ ޕްރޮގްރާމް ކުރިއަށްދާނީ ތިލަފުށީގައި ހުންނަ އެމްޓީސީސީ ބޯޓުޔާރޑްގައެވެ.

އެެމްޓީސީސީ ހުނަވަރު ޕްރޮގްރާމް އިފްތިތާޙު ކުރީ 2018 ވަނަ އަހަރުއެވެ. އެގޮތުން އަހަރަކު ހަތަރު ފަހަރު ކުރިއަށް ގެންދާ ގޮތަށް މި ޕްރޮގްރާމް ވަނީ 2022 ވަނަ އަހަރު އިތުރަށް ފުޅާކުރެވިފައެވެ.