މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލަމެންޓްރީ ގުރޫޕު ހިންގަމުންދަނީ "ކަލްޓު" ގުރޫޕެއް އޮޕަރޭޓް ކުރަމުންދާ ގޮތަށް ކަމަށް އެމްޑީޕީން އިސްތިއުފާދެއްވި މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފު ވިދާޅުވެއްޖެ އެވެ. 

ޔާސިރު މިފަދައިން ވިދާޅުވެފައިވަނީ އެމްޑީޕީއިން ވަކިވެވަޑައިގެންނެވި މެމްބަރު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ. 

އޭނާ ވިދާޅުވީ ސިޔާސީ ޕާޓީއެއްގޮތަށް އެމްޑީޕީ އިޚްތިޔާރުކުރީ ޤަބޫލުކުރެވޭ އަސާސްތަކެއް ދަމަހައްޓާ ޕާޓީއަކަށް ވީތީ ކަމަށެވެ. 

އެހެން ނަމަވެސް އެމްޑީޕީގެ މެމްބަރެއްގެ ގޮތުގައި ރައްޔިތުންގެ މަޖިލީހުގައި މަސައްކަތް ކުރަން ފެށުމުން، ކުރެވެމުންދަނީ މުޅިން އެހެން ތަޖުރިބާއެއް ކަމަށާއި، ޕާޓީގެ ޕާލަމެންޓްރީ ގުރޫޕަކީ ވަކި މީހަކު ބުނާހާގޮތަށް ހިންގާ ގުރޫޕަކަށް ހަދާފައިވާކަމަށެވެ. އަދި ޕީޖީން ގާނޫނާއި ޚިލާފަށް ކަންކަން ކުރަމުންދާކަމަށް ޔާސިރު ވިދާޅުވި އެވެ. 

ޔާސިރު އިތުރަށް ވިދާޅުވީ ބަޔަކު އަނދަގޮނޑި ޖައްސައިގެން ޤައުމު ހިންގޭނެކަމަށް ދިވެހި ޒުވާނުން ގަބޫލު ނުކުރާކަމަށެވެ. 

އެގޮތުން ސަރުކާރު ޖަވާބުދާރީ ކުރުމަށްޓަކައި މަޖިލީހުގައި މަސައްކަތްތަކެއް ފެށި ހިސާބުން، އެމްޑީޕީގެ ޕާލަމެންޓްރީ ގުރޫޕުގެ ބާރުގައި އެ ގަރާރުތައް ބޭރުކޮށްލާ ގާނޫނު އަސާސީން މެމްބަރުންނަށް ލިބިދޭ ހައްގުތަކަށް އަރައިގަންނަމުން ދިޔަކަން ޔާސިރު ފާހަގަކުރެއްވި އެވެ. އޭނާ ވިދާޅުވީ އެއީ ބަލައިގަނެވޭ ކަމެއް ނޫން ކަމަށެވެ.

އާ ސިޔާސީ ޕާޓީއެއް އުފައްދަން ޖެހުނީ މިނިވަންކަމާއެކު ރައްޔިތުންގެ ހައްގުގައި މަސައްކަތް ކުރެވޭނެ ހާލަތު އެމްޑީޕީގައި ނެތުމުން ކަމަށާއި، އެ ބޭފުޅުން އުފައްދާ ސިޔާސީ ޕާޓީއަކީ ކަނޑައެޅޭ އަސާސްތަކާއި އެއްގޮތަށް ނުފޫޒެއް ނެތި މަސައްކަތް ކުރުމުގެ މަގު ފަހިކޮށްދޭނެ ސިޔާސީ ޕާޓީއެއްކަމަށް ޔާސިރު ވިދާޅުވި އެވެ. 

އެއާއެކު އޭނާ ވަނީ މިނިވަން ޚިޔާލުތަކާއެކު، ސިޔާސީ މަސައްކަތް ކުރަން ބޭނުންވާ ފަރާތްތައް ފިކުރެއްގެ ފިރުން ޕާޓީއާއި ގުޅިވަޑައިގަތުމަށް ދައުވަތުއަރުވާފަ އެވެ.