ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ފުރަތަމަ ޖަލްސާގައި އައްޑޫ މީދޫ ދާއިރާގެ މެންބަރު ރޮޒައިނާ އާދަމްގެ ނަން އިއްވާ މަޖިލިސްކުރާ މާލަމުން ނިކުމެ ވަޑައިގަތުމަށް ރިޔާސަތުން އެންގެވުމުން ވެސް ނުކުނިކުންނަވާ މަޑުކުރެއްވި މައްސަލައިގައި އަމާޒުވަމުންދާ ފާޑުކިޔުންތަކަށް ރޮޒައިނާ ރައްދުދެއްވައިފި އެވެ.
އިއްޔެ ރައްޔިތުންގެ މަޖިލީހުގެ ޖަލްސާ ކުރިއަށް ދިޔަ ވަގުތު މަޝްރަހު ހޫނުޗީ އެމްޑީޕީއިން ވަކިވި މެމްބަރުންނަށް އެމްޑީޕީއަށް ލިބިފައިވާ ވަގުތު ރިޔާސަތުން ދިނުމާއި ގުޅިގެންނެވެ. ވަކިވި މެމްބަރުންނަށް ޕާޓީއަށް ބަހުސްކުރުމަށް ކަނޑައެޅިފައިވާ ވަގުތުން ވަގުތު ދޭން ރިޔާސަތުގައި އިންނެވި މަޖިލީހުގެ ރައީސް މުޙައްމަދު ނަޝީދު ނިންމެވުމާއި ދެކޮޅަށް އެމްޑީޕީގެ މެމްބަރުން ވަނީ އިހުތިޖާޖުކޮށްފަ އެވެ.
އެގޮތުން މެމްބަރު ރޮޒައިނާވެސް ވަނީ އެކަމަށް އިއުތިރާޒުކޮށްފަ އެވެ. އަދި ގަވައިދާއި އެއްގޮތަށް މަޖިލިސް ކުރިއަށް ގެންދިއުމަށް ގޮވާލި މެމްބަރުންގެ ތެރޭގައި ރޮޒައިނާވެސް ހިމެނިވަޑައިގަންނައެވެ.
އެކަމާއި ގުޅިގެން ރިޔާސަތަކުން ވަނީ ރޮޒައިނާގެ ނަން އިއްވާ މަޖިލީހުން ނިކުމެވަޑައިގަތުމަށް އަންގާފައެވެ.
އެހެން ނަމަވެސް ރޮޒައިނާ ވިދާޅަމުން ގެންދެވީ ގަވައިދާއި ޚިލާފަށް އެ އެންގި އެންގުމަށް ބޯ ނުލަނބާނެކަމަށެވެ. މަޖިލީހުގެ ސެކިއުރިޓީން އޭނާ ބެރުކުރުމަށް ދިއުމުންވެސް ރޮޒައިނާ ވަނީ އޭނާ ގައިގައި އަތްލައިގެން ނުވާނެކަމަށް ވިދާޅުވެ އިންޒާރު ވެސް ދީފައެވެ.
ރޮޒައިނާ ސެކިއުރިޓީ އޮފިސަރަަށް އިންޒަރުދޭތަން ފެނިގެންދާ ވީޑިއޯއެއްވެސް މިހާރު ވަނީ ސޯޝަލްމީޑިއާގައި ދައުރުވާން ފަށާފައެވެ. އަދި އެ ވީޑިއޯ ޝެއާކުރަމުންދާ ފަރާތްތައް ގެންދަނީ ރޮޒައިނާއަށް ގިނަ ފާޑުކިޔުންތަކެއް އަމާޒުކުރަމުންނެވެ.
ސޯޝަލް މީޑިއާގައި ފާޑުކިޔުން އަމާޒުވާން ފެށުމުން، ރޮޒައިނާ ކުރެއްވި ޓްވީޓެއްގައި ވަނީ ރިޔާސަތުން އެންގުމުން ވެސް މަޖިލީސް ދޫކުރައްވާ ވަޑައިނުގެންނެވި ސަބަބު ތަފްސީލުކޮށްދެއްވާފަ އެވެ. އަދި އޭނާ ބޭރުކުރުމަށް އައި އޮފިސަރަށް އިންޒާރުދިން ސަބަބުވެސް ހާމަކުރައްވާފަ އެވެ.
ރޮޒައިނާ ވިދާޅުވީ އެންމެ ފުރަތަމަ ކަމަކަށް އިއްޔެ މަޖިލީހުގައި ރިޔާސަތުގައި އިންނަވާ މަޖިލީހުގެ ރައީސް މުހައްމަދު ނަޝީދު އަމަލުކުރައްވާފައިވަނީ ގަވައިދާއި މުޅިން ޚިލާފަށެވެ. އެކަމާއި އެމްޑީޕީގެ ވަރަށް ގިނަ މެމްބަރުން އިހުތިޖާޖުކޮށްފައިވާ ކަމަށެވެ.
އެހެން ނަމަވެސް ނަޝީދު ނަން އިއްވެވުމުން، އިހުތިޖާޖުކުރުން ހުއްޓާލިކަމަށް ރޮޒައިނާ ވިދާޅުވި އެވެ. މެމްބަރެއްގެ ނަން ފުރަތަމަ ފަހަރު އިއްވުމުން، އެ މެމްބަރު ރިޔާސަތުން އަންގާ ކަންކަމަށް ތަބާވެއްޖެ ހާލަތުގައި އެ މެމްބަރުގެ ނަން އިއްވާ ބޭރުކުރުމަކީ އާންމު އުސޫލު ނޫންކަން އޭނާ ފާހަގަކުރެއްވި އެވެ.
އެހެން ނަމަވެސް ފުލުފުލުގައި އޭނާގެ ނަން އިއްވާ މަޖިލީހުން ނިކުމެވަޑައިގަތުމަށް ނަޝީދު އެންގެވިކަމަށާއި، އަދި އޭނާ ނެރެން ފޮނުވީ ފިރިހެން ސެކިއރުރިޓީ އޮފިސަރެއްކަމަށް ރޮޒައިނާ ވިދާޅުވި އެވެ.
އަންހެން ސެކިއުރިޓީ އޮފިސަރުން ތިއްބާ ފިރިހެން ސެކިއުރިޓީ އޮފަސެއް ފޮނުވަން ޖެހޭ އެއްވެސް ސަބަބެއް ނޯންނާނެ ކަމަށާއި، ގަވައިދާއި ޚިލާފަށް އޭނާގެ ގައިގައި ފިރިހެން އޮފިސަރެއް އަތްލުމުގެ ފުރުސަތު ނުދެއްވާނެކަމަށް ރޮޒައިނާ ވިދާޅުވި އެވެ.
އޭގެ އިތުރުން އޭނާ ވިދާޅުވީ ފާޑުކިޔުންތައް އަމާޒުވިކަމުގައި ވީ ނަމަވެސް ގަވައިދާއި ޚިލާފަށް ކަންކަން ކުރުމަށްފަހު އޭނާއާއި ކުރިމަތިލުމަށް ފިރިހެން ސެކިއުރިޓީން ފޮނުވާ އެ ޒާތަށް ބުލީ ކުރުމަށް ފުރުސަތު ނުދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
