މިއަހަރުގެ ފުރަތަމަ ކުއާޓާގެ ތެރޭގައި ވައްކަމާ ފޭރުމުގެ 964 މައްސަލައަކާއި މަސްތުވާ ތަކެތީގެ 153 މައްސަލައެއް ހުށައަޅައިފައިވާ ފުލުހުން އާންމު ކޮށްފައިވާ ތަފާސް ހިސާބުތަކުން ދައްކައިފިއެވެ.

އެގޮތުން މިއަހަރުގެ މިހާތަނަށް މާލެ ސަރަހައްދުން މިފަދަ 759 މައްސަލައެއް ހުށަހަޅާފައިވާއިރު އައްޑޫ ސިޓީ 24 މައްސަލައެއް އަދި ފުވައްމުލަކު ސިޓީއިން 32 މައްސަލައެއް ވަނީ އެ މުއްދަތުގެ ތެރޭގައި ފުލުހަށް ހުށަހަޅާފައެވެ.

އަދި ކުޅުދުއްފުށީ ސިޓީއިން 12 މައްސަލައެއް އަދި މީގެ އިތުރުން އެހެން އަތޮޅުތަކުން ހުށަހެޅި 137 މައްސަލައެއް ހިމެނެއެވެ.

Advertisement

މިފަދަ މައްސަލަތަކުގެ 27 ޕަސެންޓް މައްސަލައަކީ ފައިސާ ވަގަށް ނެގި މައްސަލަތަކެވެ. އަދި  34 ޕަސެންޓް މައްސަލައަކީ މޯބައިލް ފޯން ވަގަށް ނެގި މައްސަލަތަކެވެ. އަދި 39 ޕަސެންޓަކީ ވެހިކަލް ވަގަށް ނެގުމުގެ މައްސަލަތަކެވެ.

ފުލުހުން ވިދާޅުވެފައިވަނީވައްކަމާއި ފޭރުމުގެ  މައްސަލަތަކުގެ ތެރެއިން 3 ޕަސެންޓް މައްސަލަ ދައުވާކުރަން ފޮނުވާފައިވާ ކަމަށެވެ.

މި އަހަރުގެ މިހާތަނަށް އެންމެ ގިނައިން މަސްތުވާތަކެތީގެ މައްސަލަ ރިޕޯޓު ކުރެވިފައިވަނީ ސައުތު ރީޖަނުންނެވެ. ގއ، ގދ، ފުވައްމުލައް އަދި އައްޑޫ ސިޓީ ހިމެނޭ މި ރީޖަނުން ޖުމްލަ 57 މައްސަލައެއް ހުށައަޅައިފައިވެއެވެ.  އަދި އަޕާނޯތް ރީޖަން އާއި ނޯތް ރީޖަން އިން 40 މައްސަލައެެއް ހުށައެޅިފައިވެއެވެ.

އަދި ނޯތް ސެންޓްރަލް ޕޮލިސް ރީޖަންއިން 32 މައްސަލައަކާއި ސައުތު ސެންޓްރަލް އިން 24 މައްސަލަ އެއް ރިޕޯޓް ކޮށްފައިވެއެވެ.

މިމުއްދަތުގެ ތެރޭގައި 8.896 ކިލޯގެ ކެނަބިސް، 3.063 ކިލޯގެ ކޮކެއިން، 2.151 ކިލޯގެ ހެރޮއިން އަދި 2.183 ކިލޯގެ މަސްތުވާ ތަކެތި އެހެނިހެން ބާވަތްތަކުން ފުލުހުންގެ ބެލުމުގެ ދަށަށް ގެނެވިފައިވެއެވެ.