ރައްޔިތުންގެ މަޖިލީހުގެ މިއަހަރުގެ ދެވަނަ ދައުރަށް ސަރުކާރުގެ ފަރާތުން ހުށައަޅާ ބިލުތަކުގެ ތެރޭގައި ޖުޑިޝަލް ސާވިސް ކޮމިޝަންގެ ކޮމްޕޮސިޝަން ބަދަލުކުރާ ބިލު ހުށައަޅާފައި ނުވާކަން ހާމަވެއްޖެ އެވެ.

ކޯޓުތަކަށް އޮންނަ ސިޔާސީ ނުފޫޒުތައް ނައްތާލާ މިނިވަން ޖުޑިޝަރީއެއް ޤާއިމްކުރުމަށް ޖޭއެސްސީ އެތުރިފައިވާ ގޮތް އިސްލާހުކުރުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ ވައުދުފުޅެކެވެ. 

އެހެން ނަމަވެސް ދައުރުގެ ފަހު އަހަރު ގުނަމުންދާއިރު އަދިވެސް ޖޭއެސްސީ އިސްލާހުކުރުމުގެ އަމަލީ މަސައްކަތް ފަށާފައެއް ނުވެއެވެ.

އެގޮތުން ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުނިމި ދެވަނަ ދައުރުގެ ޖަލްސާތައް ފަށާފައިވާއިރު، މި ދައުރުގައި ސަރުކާރުން މަޖިލީހަށް ފޮނުވާނެ ބިލުތައް ވަނީ އެކުލަވާލާފަ އެވެ.

ބަންޑާރަނައިބުގެ އޮފީހުން އެ ބިލުތަކުގެ ތަފްސީލުތައް ހާމަކޮށްފައިވާއިރު، އޭގެ ތެރޭގައި ޖޭއެސްސީ އިސްލާހުކުރާ ބިލު ހިމަނާފައެއް ނުވެއެވެ. މި ދައުރުގައި އެކު ޖުމްލަ 14 ބިލެއް ސަރުކާރުގެ ފަރާތުން ވަނީ މަޖިލީހަށް ހުށައެޅުމަށް ނިންމާފަ އެވެ.

އެގޮތުން ސަރުކާރުގެ ފަރާތުން ހުށަހަޅަން ގަސްދުކުރާ ބިލުތައް:
-ޙައްޖާއި ޢުމްރާގެ ބިލު
-ފޮރިން އިންވެސްޓްމަންޓްގެ ބިލު
-ވިޔަފާރި ރަޖިސްޓްރީކުރުމުގެ ޤާނޫނަށް އިޞްލާހު ގެެނައުމުގެ ބިލު
-ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނަށް އިޞްލާހު ގެެނައުމުގެ ބިލު
-މަސްތުވާތަކެއްޗާބެހޭ ޤާނޫނަށް އިޞްލާހު ގެެނައުމުގެ ބިލު
-ގޭންގު ކުށްތައް މަނާކުރުމާބެހޭ ޤާނޫނަށް އިޞްލާހު ގެެނައުމުގެ ބިލު
-ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނަށް އިޞްލާހު ގެެނައުމުގެ ބިލު
-މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނަށް އިޞްލާހު ގެެނައުމުގެ ބިލު
-ދިވެހިރާއްޖޭގެ ކަސްޓަމްސްގެ ޤާނޫނަށް އިޞްލާހު ގެެނައުމުގެ ބިލު
-ދިވެހިރާއްޖޭގެ ޤާނޫނުލްޢުޤޫބާތަށް އިޞްލާހު ގެެނައުމުގެ ބިލު
-ޖިނާއީ އިޖުރާއަތުގެ ޤާނޫނަށް އިޞްލާހު ގެެނައުމުގެ ބިލު
-ވަޒީފާ ގެއްލޭ ފަރާތްތަކުގެ އިންޝުއަރެންސްގެ ބިލު
-ވަޒީފާއާބެހޭ ޤާނޫނަށް އިޞްލާހު ގެެނައުމުގެ ބިލު
-ޒަކާތުގެ ބިލު

ޖޭއެސްސީ އިސްލާހުކުރާ ބިލު ހުށައަޅާފައި ނުވާތީ މީގެ ކުރިން 3 ފަހަރެއްގެ މަތިން އެ ބިލު މަޖިލީހަށް ހުށައެޅި މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވަނީ ނުރުހުން ފާޅުކުރައްވާފަ އެވެ.

އެކަމާއި ގުޅޭގޮތުން ތާރިގު ކުރެއްވި ޓްވީޓެއްގައި ވިދާޅުވީ މިދައުރަށް ވެސް ޖޭއެސްސީ އިސްލާހުކުރުމުގެ ބިލު މަޖިލީހަށް ހުށައަޅާފައި ނުވުމަކީ އެ ކޮމިޝަން އިސްލާހުކުރުމުގެ ނިޔަތް ސަރުކާރުގެ ނެތްކަން ހާމަވާ ކަމަށެވެ.

މީގެކުރިން 3 ފަހަރެއްގެ މަތިން ޖޭއެސްސީ އިސްލާހުކުރުމަށް މަޖިލީހަށް ހުށައަޅާފައިވާއިރު، ފެއިލްކޮށްލުމަށްފަހު، މި ދައުރަށް އެ ބިލު ހުށަނޭޅީ ރައީސް ޞާލިހު ވީ ވައުދު ފުއްދާ ދެވުމުންތޯ އައްސަވާ ތާރިގު ވަނީ ސުވާލު ވެސް ކުރައްވާފަ އެވެ.