ބިދޭސީންގެ އެކައުންޓަށް ވިޔަފާރި ފައިސާ ޖަމާކުރާނަމަ ޖޫރިމަނާ ކުރާގޮތަށް ހަމަޖައްސައި "އަމިއްލަ ފަރުދުންގެ ވިޔަފާރި ގަވާއިދު" ގެޒެޓް ކޮށްފިއެވެ.

ދިވެހި ސަރުކާރުން އާއްމު ކޮށްފައިވާ މި ގަވާއިދުގައި ބުނާގޮތުން، އަމިއްލަ ވިޔަފާރީގެ މުއާމަލާތަކާ ގުޅިގެން، ބިދޭސީ ފަރާތެއްގެ ބޭންކް އެކައުންޓަށް ފައިސާ ޖަމާކުރާ ކަމުގެ ހެކި ހުރެއްޖެ ނަމަ، އެ ވިޔަފާރި އަކީ ސީދާ ގޮތުން ނުވަތަ ނުސީދާ ގޮތުން ބިދޭސީ ފަރާތަކަށް ވިޔަފާރީގެ މަންފާ ލިބިދިނުމަށްޓަކައި ހިންގާ ވިޔަފާރިއެއް ކަމަށް ކަނޑައަޅައި، ފިޔަވަޅު އެޅުމުގެ ބާރު ރަޖިސްޓްރާއަށް ލިބިގެންވާ ކަމަށެވެ.

އެފަދަ ކަމެއް ކުރާކަން ސާބިތުވެއްޖެ ނަމަ އެ ވިޔަފާރިއެއް ރަޖިސްޓްރީ ކޮށްފައިވާ މީހާ 100،000 ރުފިޔާއިން ޖޫރިމަނާ ކުރުމަށް ގަވާއިދުގައި ބުނެފައިވެއެވެ. އަދި އެ މީހާއަށް އާ ވިޔަފާރިއެއް ރަޖިސްޓްރީ ކޮށްދިނުން ފަސް އަހަރަށް މަނާކޮށް އެމީހެއްގެ ވިޔަފާރި ރަޖިސްޓްރީ ބާތިލު ކުރެއެވެ.

Advertisement

މިފަދަ ފިޔަވަޅެއް އަޅާއިފިނަމަ އެކަން އާއްމުކޮށް އިއުލާނު ކުރުމަށް ގަވާއިދުގައި ބުނެއެވެ.

މީގެ އިތުރުން، ވިޔަފާރި ކުރާ ތަނުގެ ނަން ރަޖިސްޓްރީ ކޮށްފައި ނެތުމާއި ނަގަންޖެހޭ ހުއްދަތައް ނަގާފައި ނެތް ނަމަ އަދި ވިޔަފާރި ކުރާ ތަނުގެ ބޭރުގައި މުދާ ބެހެއްޓުމަކީވެސް މި ގަވާއިދުގެ ދަށުން ޖޫރިމަނާ ކުރެވޭ ކަންކަމެވެ.

އިންސްޕެކްޓް ކުރާއިރު އެފަދަ ކަމެއް ފެނިއްޖެ ނަމަ 1000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް އެ ގަވާއިދުގައި ބުނެއެވެ.