ރައްޔިތުން މަޖްލިސްގެ މަތިވެރި ދާއިރާގެ މެމްބަރު ޙަސަން ޒަރީރު މަރާލަން އުޅުން ކަމަށް ތުހުމަތު ކުރާ އިބްރާހީމް ޢަބްދުالله (ގައްބަރޭ) ގެ ބަންދުގެ މުއްދަތު ކަނޑައަޅާފިއެވެ.

ކ. މާލެ / މއ. ނައިޓްވިލާ، އިބްރާހީމް ޢަބްދުالله (32އ) އަމިއްލައަށް ފުލުހުންގެ އިދާރާއަށް މިއަދު ހާޒިރުވުމުން ވަނީ ހައްޔަރުކޮށްފައެވެ. އަދި އޭނާގެ ބަންދަށް 30 ދުވަސް ކްރިމިނަލް ކޯޓުން ދީފައިވާ ކަމަށް ފުލުހުން ވަނީ ބުނެފައެވެ.

އެމްޑީޕީގެ ޤައުމީ މަޖިލީހުގެ މައްޗަންގޯޅި ދެކުނު ދާއިރާގެ މެންބަރުކަންވެސް ކުރާ ގައްބަރޭ ހޯދުމަށް މިދިޔަ ހަފްތާގެ ހޯމަ ދުވަހު ފުލުހުން އިއުލާން ކޮށްފައިވަނީ ގްރޫޕް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގައި، މީހަކު މަރާލަން އުޅުނުކަމަށް ތުހުމަތުކުރެވޭ މައްސަލައެއްގައި ކަމަށް ފުލުހުން އޭރު ވަނީ ބުނެފައެވެ.

Advertisement

މި މާރާމާރީގައި މަރާލަން މަސައްކަތް ކޮށްފައިވަނީ ރައްޔިތުން މަޖްލިސްގެ މަތިވެރި ދާއިރާގެ މެމްބަރު ޙަސަން ޒަރީރު ކަމަށް ބެލެވެއެވެ.

އެގޮތުން ޒަރީރަށް ތޫނު އެއްޗަކުން ޙަމަލާ ދިންކަމުގެ މައުލޫމާތު ފުލުހުންގެ އިދާރާއަށް ލިބިފައިވަނީ މި މަހު 1 ވަނަ ދުވަހުގެ ފަތިހު 05:08 ހާއިރު ކަމަށް ފުލުހުންގެ މީޑިއާ އޮފިޝަލަކު ވަނީ ވިދާޅުވެފައެވެ.

އަދި އޭރު ޒަރީރަށް ޙަމަލާ ދީފައިވަނީ ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށް ކަމަށާ ޙަމަލާ ދިނީ ކޮން ބައެއްކަމެއް ފުލުހުން ހާމައެއް ނުކުރެއެވެ.

ޒަރީރު ވަނީ މި ޙަމަލާއާ ގުޅިގެން ލިބުނު އަނިޔާއަށް އޭޑީކޭ ހޮސްޕިޓަލުގައި ފަރުވާ ހޯއްދަވާފައެވެ.