ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲގެ އިތުބާރުނެތް ކަމުގެ މައްސަލަ ރައްޔިތުންގެ މަޖިލިހަށް ވައްދައިފިއެވެ.

50 މެމްބަރުންގެ ސޮޔާއިއެކު އެ މައްސަލަ ހުށައަޅައިފައިވާއިރު އޭގައި ސޮއި ކޮށްފައިވަނީ އެމްޑީޕީގެ 49 މެމްބަރަކާއި މިނިވަން މެމްބަރެއް ކަމަށްވާ ނިލަންދޫ ދާއިރާގެ މެމްބަރު އަބްދުލް މުހްސިން ހަމީދެވެ.

އެމްޑީޕީގެ ގަރާރުގައި ބުނެފައިވަނީ އީވާ މަޖިލީހުގެ ނައިބް ރައީސް ކަމުގެ މަޤާމަށް ގެނެވުނީ އެ ޕާޓީގެ ޕާލިމެންޓަރީ ގްރޫޕްގައި މެމްބަރުންގެ މެދުގައި ނެގުނު ވޯޓުން ފާސްވެ އެމްޑީޕީ އިން ހުށައަޅައިގެން ކަމަށެވެ. އަދި އީވާ އެމަޤާމަށް އިންތިޚާބު ވެފައި ވަނީ އެމްޑީޕީ ޕާލިމެންޓަރީ ގްރޫޕްގެ މެމްބަރުންގެ ވޯޓާއި އެކުގައި ކަމަށެވެ.

އަދި މިކަމުގައި އީވާ އަށް އެ މެމްބަރުން ވޯޓު ދީފައި ވަނީ އެޕާޓީއިން ރައްޔިތުންނަށް ވައުދުވެފައިވާ ކަންކަން ހާސިލް ކޮށްދިނުމަަށާއި، ރައްޔިތުންގެ މަޖިލީހުގެ ނައިބު ރައީސްގެ ހައިސިއްޔަތުން ފުރިހަމަ އަށް އެއްބާރުލުން ދިނުމާއި، އެމްޑީޕީގެ ސިޔާސަތުތައް ކުރިއެރުވުން މަތީ ދެމިހުރުމާއިއެކު، ޕާޓީއާއި ޕާޓީގެ ޕާލިމެންޓަރީ ގްރޫޕަށް އިޚްލާސްތެރިވާނެ ކަމަށް އިތުބާރު ކޮށްފައި ކަމަށެވެ.

އީވާ އަމިއްލަ ފުޅަށް އެދިވަޑައިގެން ޕާޓީ އިން ވަކިވެ ވަޑައިގެން ފައިވާތީ، ޕާލިމެންޓަރީ ގްރޫޕުން އީވާ އަށް ކުރަމުންދިޔަ އިތުބާރު ގެއްލިފައި ވާކަމަށް އެމްޑީޕީ އިން ހުށައަޅައިފައިވާ ޤަރާރުގައި ވެއެވެ.

މަޖިލީހުގެ ރައީސް ނުވަތަ ނައިބު ރައީސް، އެ މަޤާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެންބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާ އެކު ހުށަހަޅާ ގަރާރަކުންނެވެ. އެއީ 87 މެންބަރުންގެ ތެރެއިން 22 މެމްބަރުންގެ ސޮޔެވެ.

އަދި މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް ފާސްވާނީ 43 މެންބަރުންގެ ވޯޓުންނެވެ. އެއީ، މަޖިލީހުގައި ތިއްބަވާ 87 މެންބަރުންގެ ދެބައިކުޅަ އެއްބައި މެންބަރުންނެވެ.