މިދިޔަ މަހު ފެމެލީ ކޯޓުގައި ކޮށްފައި ވަނީ 76 ވަރި އާއި 114 ކައިވެނި ކަމަށް އެކޯޓުގެ ތަފާސްހިސާބުން ދައްކައިފިއެވެ.

މިދިޔަ މަހު ފެމެލީ ކޯޓަށް ހުށަހެޅިފައިވާ މައްސަލަތަކުގެ ތަފާސްހިސާބަށް ބަލާއިރު، ކުދިންނާ ގުޅުންހުރި އަށް މައްސަލައެއް ކޯޓަށް ހުށަހަޅާފައި ވެއެވެ. އަދި ކުރީމަހުގެ ބާކީ 38 މައްސަލައެއް ނުބެލި ވެއެވެ. އޭގެ ތެރެއިން މިދިޔަ މަހު ބަލާ ނިމުނީ 14 މައްސަލައެވެ. އެހެންކަމުން ކުދިންނާ ގުޅުންހުރި 32 މައްސަލައެއް ނުނިމި ކޯޓުގައި ވެއެވެ.

މީގެ އިތުރުން ވަރީގެ މައްސަލަތަކުގެ ތެރެއިން 107 މައްސަލައެއް މިދިޔަ މަހު ކޯޓަށް ހުށަހަޅާފައި ވެއެވެ. އަދި ކުރީ މަހުގެ ބާކީ 127 މައްސަލަ ކޯޓުގައި ވެއެވެ. އޭގެ ތެރެއިން ކޯޓުން ނިންމާފައި ވަނީ 101 މައްސަލައެވެ. އެހެންކަމުން ވަރީގެ 133 މައްސަލައެއް ނުނިމި ކޯޓުގައި ވެއެވެ.

Advertisement

މިދިޔަ މަހު ވަރި ކުރުމަށް 15 މައްސަލައެއް ހުށަހަޅާފައި ވާއިރު، ވަރިވުމަށް އެދި 36 މައްސަލައެއް ހުށަހަޅާފައި ވެއެވެ.

ދަރިން ނުދެއްކުމާއި ނަސަބު ސާބިތު ކުރުމުގެ އެއްވެސް މައްސަލައެއް މިދިޔަ މަހު ފެމެލީ ކޯޓަށް ހުށަހަޅާފައެއް ނުވެއެވެ. ނަމަވެސް ޙަޟާނަތުގެ ތިން މައްސަލައަކާއި ކުއްޖާ އިޚްތިޔާރު ކުރާ ފަރާތެއް ކަނޑައެޅުމުގެ އެއް މައްސަލަ ކޯޓަށް ހުށަހަޅާފައި ވެއެވެ.

ފެމެލީ ކޯޓުގެ ތަފާސްހިސާބުން ދައްކާ ގޮތުގައި، ކުޑަކުދިންގެ ހައްގިތައް ރައްކާތެރިކުރުމުގެ އަމުރަށް އެދި ހަތަރު މައްސަލައެއް މިދިތަ މަހު އެ ކޯޓަށް ހުށަހަޅާފައި ވެއެވެ.