ކްރޮސް ސަބްސިޑީގެ ދަށުން ތިން އެއާޕޯޓެއް އަޕްގްރޭޑް ކުރުމަށްޓަކައި ފައިނޭންސް ކުރުމަށް ޝައުގުވެރިވާ ފަރާތްތަކަށް އެ ފުރުސަތު ޕްލޭނިންގް މިނިސްޓްރީން ހުޅުވާލައިފިއެވެ.

ޕްލޭނިންގް މިނިސްޓްރީން ކުރި އިއުލާނެއްގައި ބުނީ، ކްރޮސް ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް، ބިން ނުވަތަ ފަޅު ކުއްޔަށް ދިނުމާބެހޭ ޤަވާއިދުގެ ދަށުން ތިން އެއަރޕޯޓް އަޕްގްރޭޑް ކުރުމަށް ނިންމާފައިވާ ކަމަށެވެ.

މި މޮޑެލްގެ ދަށުން އަޕްގްރޭޑް ކުރާނީ މަޑިވަރު އެއާޕޯޓާއި ދާލު އެއާޕޯޓުގެ އިތުރުން މާފަރު އިންޓަނޭޝަނަލް އެއާޕޯޓެވެ.

މީގެ ތެރެއިން މަޑިވަރު އެއާޕޯޓަށް ހޭދަވާނެ ކަމަށް މިނިސްޓްރީން އަންދާޒާ ކުރަނީ 15،000،000 ޑޮލަރެވެ. އަދި ފައިނޭންސް ކުރުމަށް ހުށަހެޅޭނީ މަދުވެގެން 5،000،000 ޑޮލަރު ކަމަށް މިނިސްޓްރީން ބުނެއެވެ.

ދާލު އެއާޕޯޓަށް 50،000،000 ޑޮލަރު ހޭދަވާނެ ކަމަށް މިނިސްޓްރީން ލަފާކުރާއިރު، މި މަޝްރޫއަށް ފައިނޭންސް ކުރުމަށް ދަށްވެގެން ހުށަހެޅޭނީ 5،000،000 ޑޮލަރެވެ.

މާފަރު އިންޓަނޭޝަނަލް އެއާޕޯޓަށް 30،000،000 ޑޮލަރު ހޭދަވާނެ ކަމަށް މިނިސްޓްރީޏް އަންދާޒާ ކުރާއިރު، މި މަޝްރޫއަށްވެސް ފައިނޭންސް ކުރަން ދަށެވެގެން ހުށަހެޅޭނީ 5،000،000 ޑޮލަރެވެ.

މި އިޢުލާއާނާ އެކު އެއްކަރުދާސް ކުރެވޭ 'އެޕްލިކޭޝަން ފޯމް"ގެ ހުރިހައި ބައިތަކެއް ފުރިހަމަކުރަންވާނެ ކަމަށް މިނިސްޓްރީން ބުންޏެވެ.

އެއަރޕޯޓް ތަރައްޤީކުރުމަށް ނުވަތަ ފައިނޭންސް ކުރުމަށް ހުށަހަޅާ އިންވެސްޓްމަންޓް އަދަދު، އެ މަޝްރޫޢެއްގެ މުޤާބިލުގައި، ފަތުރުވެރިކަމަށް ކުއްޔަށް ދޫކުރާނެ ރަށް ނުވަތަ ބިން ނުވަތަ ފަޅުގެ އެކްއިޒިޝަން ކޮސްޓު އަދި އެތަނެއްގެ ބިމު ކުލީގެ ގޮތުގައި ކަނޑައެޅޭ ފައިސާގެ އަދަދާ އަޅައި ކަނޑައިދެވޭނެ ކަމަށް މިނިސްޓްރީން ބުންޏެވެ.