މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ބޮމުގެ ހަމަލާއެއް ދިނުމުގައި ބައިވެރިވި، އުމުރުދުވަހަށް ޖަލަށްލުމަށް ހުކުމްކޮށްފައިވާ އަބްދުالله އަލިމަނިކު މާފުދިން ގޮތެއް މިހާތަނަށް ވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ހާމަކޮށްދީފައި ނުވާކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 4 ވަނަ ޖަލްސާގައި ވާހަކަދައްކަވަމުން އިލިޔާސް ވަނީ ރައީސް ނަޝީދަށް ދިން ހަމަލާއަކީ ސަރުކާރު އަޑީގައި އޮވެގެން ދިން ހަމަލާއެއްކަން ފާހަގަކޮށް ބޮޑެތި ތުހުމަތުތަކެއް ކުރައްވާފަ އެވެ.
ނަޝީދަށް ބޮމުގެ ހަމަލާދިނުމުގައި ބައިވެރިވި ބައެއް މީހުން
"މި ކަމުގައި (ބޮމުގެ ހަމަލާ ދިނުމުގައި) ބައިވެރިވި އެކަކި އަބްދުالله އަލިމަނިކު، އޭނާ އަކީ އުމުރުދުވަހަށް ޖަލުގައި ބަހައްޓާފައި ހުރި މީހެއް. 2019 ވަނަ އަހަރު އޭނަ ޖަލުން ދޫކުރީ ކީއްވެގެންތޯ؟ ކިހެނެއްތޯ؟ މިއަދާއި ހަމަޔަށްވެސް އެ ކޮމެޓީއަށް މައްސަލަ ލައިގެންވެސް އަދި އެ ނޫން ގޮތްގޮތުން ވެސް ބަލަބަލާ މި މީހާ ދޫވި ސަބަބަެއް ނޭނގޭ، ރައީސުލްޖުމްހޫރިއްޔާ އޮފީހަށް ސިޓީވެސް ލިޔެފިން. ކިހެނެއް ވެގެންތޯ މާފުދީފަ ދޫކުރީ؟ ކޮން އުސޫލަކުން ތޯ؟ މިއަދާއި ހަމަޔަށް ވެސް ރައީސް އޮފީހަކުން ޖަވާބެއް ނުދިން"
މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު
އޭގެ އިތުރުން އިލިޔާސް ވިދާޅުވީ އެކަން ފެށިގެން އައި ހިސާބަށް ބަލާލާއިރު ރައީސް ނަޝީދަށް ހަމަލާ ދިނުމުގެ ކުރިން ޔާގޫތު ގެ ކައިރީގައި ބޮމެއް ގޮއްވާލަން މަސައްކަތް ކޮށްފައިވާކަން ވެސް އެ ހަމަލާއާއި ގުޅިގެން ކުރެވުނު ތަހުގީގަށްފަހު އެކުލަވާލާފައިވާ ރިޕޯޓުން ސާފުކޮށް ފެންނަން އޮތް ކަމަށެވެ.
ރައީސް ނަޝީދު ޔާގޫތު ގެއަށް ވަދެވަޑައިގަންނަވާ ވަގުތާއި، ނިކުމެވަޑައިގަންނަވާ ވަގުތު ފާރައަށް މީހުން ތިބޭކަން ދެނެގަނެވިފައިވާކަމަށާއި، ރައީސް ޞާލިހު ޖަލުހުކުމް މާފުކޮށްދެއްވި އަބްދުالله އަލިމަނިކަކީ، ރައީސް ނަޝީދަށް ފާރަލާން ޔާގޫތިގެ ކައިރީގައި ހުއްޓާ ފެނުނު މީހެއް ކަމަށާއި، އެކަން ރައީސް ނަޝީދުގެ ބޮޑީގާޑުން ރިޕޯޓުކޮށްފައިވާކަން ވެސް ތަހުގީގު ރިޕޯޓުގައި ބަޔާންކޮށްފައިވާކަމަށް އިލިޔާސް ވިދާޅުވި އެވެ.
އެހެންކަމުން، އެފަދަ ނުރައްކާތެރި މުޖުރިމަކަށް މާފުކޮށް ދޫކޮށްލި ސަބަބާއި ގުޅިގެން ބޮޑެތި ސުވާލުތަކެއް އުފެދޭކަމަށް އިލިޔާސް ވިދާޅުވި އެވެ.
ނަޝީދަށް ބޮމުގެ ހަމަލާ ދިނުމުގައި ބައިވެރިވި ކަމަށް ތުހުމަތު ކުރެވޭ އިތުރު ބައެއް މީހުން
"ކުރީ ބައިގަ ރާވާ ބަޔަކަށް މިކަން ހިންގަން ޖާގަ ދީފައި އޮތްކަނަށް އެބަ އެނގޭ. އަދި އެމީހުން މިކަން ކުރަމުން ދިޔަ އިރުވެސް އެކިއެކި ތަންތަނުން މީހުން މިކަމަށް ތައްޔާރުވަމުން ދާކަން އެބަ އެނގޭ. މި މީހުން ބައްދަލުވުންތައް ވެސް އެކި ތަންތަނުގައި ބާއްވާކަން ސަރުކާރަށް އެނގި ތިބެ އަޅާނުލާ ތިބެ އެންމެ ފަހުން މި ޖާގަ އާއި ފުރުސަތު މިކަން ހިނގާނެ ގޮތަށް ދީގެން ބަލަހައްޓައިގެން ތިއްބާ ބޮމެއް ގޮއްވާލީ"
މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު
އިލިޔާސް ވިދާޅުވީ ރައީސުލްޖުމްހޫރިއްޔާގެ ސިޔާސީ ވާދަވެރިޔެއްގެ ފުރާނަ ދުއްވާލުމަށް ފަސްޖެހުމެއް ނެތި ފުރުސަތު ދެއްވައިގެން ހުންނަވާފައިވާކަން ފެންނަން އޮތް އިރު، މިފަދަ ބޭފުޅަކު ވެރިކަމުގައި ބަހެއްޓުމަކީ ހެޔޮވާވަރުގެ ކަމެއް ނޫން ކަމަށެވެ.
އިލިޔާސްގެ އިތުރުން ރައީސް ނަޝީދަށް ތާއީދުކުރައްވާ، އަދި އެމްޑީޕީން ވަކިވެވަޑައިގެން ބައެއް މެމްބަރުން ވަނީ ރައީސް ނަޝީދަށް ދިން ހަމަލާއާއި ސަރުކާރާއި ގުޅުވާ ގިނަ ތުހުމަތުތަކެއް ކޮށްފައެވެ.
އެގޮތުން ރައްޔިތުންގެ މަޖިލީހުގެ މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވަނީ އެ ހަމަލާއަކީ ސީދާ ރައީސް ޞާލިޙު އަޑީގައި ހުންނަވައިގެން ދިން ހަމަލާއެއްކަމަށް ޔަގީންކުރެވޭކަމަށް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
