ފިޝަރީޒް މިނިސްޓަރު ޑރ ހުސައިން ރަޝީދު ގެންދަވަނީ ރައްޔިތުންގެ މަޖިލީހުގެ މަސައްކަތަށް ހުރަސްއަޅުއްވަމުން ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު ފިޝަރީޒް މިނިސްޓަރު ޑރ ހުސައިން ރަޝީދާއި ކުރެއްވި 3 ސުވާލަކަށް މިނިސްޓަރު ވަނީ ލިޔުމުން ޖަވާބު ދެއްވާފައެވެ.
އެގޮތުން އިބްރާހިމް ރަޝީދުގެ 3 ސުވާލުގައި ކުރައްވާފައިވަނީ މިފްކޯއިން އެކްސްޕޯޓު ކުރެވޭ ކަންނެލި މަސް ރިޖެކްޓުވާ މިންވަރާއި އެކަމާއި ގުޅުން ހުރި މާލީ މުއާމަލާތްތަކާއި ގުޅޭ މައުލޫމާތާއިމެދުއެވެ. އޭނާ ގެ ސުވާލަށް ޖަވާބު ދެއްވައި މިނިސްޓަރު ވިދާޅުވީ، އެ މައުލޫމާތަކީ މިނިސްޓްރީއިން އެއްކޮށް ބަލަހައްޓާ މައުލޫމާތު ނޫންކަމަށާ، އެ މައުލޫމާތު މިފްކޯއަށް އެނގޭނެ ކަމަށް ދެކެވަޑައިގަންނަވާ ކަމަށެވެ. އަދި މިފްކޯ އަކީ މިނިސްޓްރީގެ ދަށުގައިވާ ކުންފުންޏެއް ނޫން ކަމަށްވެސް މިނިސްޓަރު ވިދާޅުވި އެވެ.
މިނިސްޓަރު ދެއްވި ޖަވާބާއިމެދު ހިތްހަމަނުޖެހުން ފާޅުކުރައްވައި ރައީސް ނަޝީދު ވިދާޅުވީ، ކުރެއްވި ސުވާލު އަދި މިފްކޯގެ ހިންގުމަކީ އެ ބޭފުޅާއާއި “ބެހޭ ކަމެއް ނޫންކަމަށް” ވަޒީރު ވިދާޅުވެފައިވާކަމަށާ، އެހެން ކަމުން، މަޖިލީހުން މިނިސްޓަރާއި ހަވާލު ކުރި މަސްއޫލިއްޔަތަކީ ކޮބައިކަން ދެނެގަތުމުގެ މަސައްކަތްތައް އެމަނިކުފާނު ކުރައްވަމުންދާކަމަށެވެ.
އަދި ކޮންމެ ވުޒާރާއަކާއިވެސް އެ ވުޒާރާއެއްގެ މަސައްކަތްތަކެއް ހަވާލު ކުރެވިފައިވާނެކަމަށާ، އެއީ އެ ވުޒާރާއިން ކަނޑައަޅާކަމެއް ނޫން ކަމަށް ނަޝީދު ވިދާޅުވިއެވެ. އެހެނެއްކަމަކު އެއީ މަޖިލީހުން ކަނޑައަޅާ ކަމެއްކަމަށެވެ.
"ވަޒީރު ވިދާޅުވީ އެބޭފުޅާއާއި ބެހޭ ކަމެއް ނޫން ކަމަށް. ދެން އަޅުގަނޑު މިހާރު މި ބަލަމުންދަނީ އެ ބޭފުޅާ އާއި މި މަޖިލީހުން ހަވާލުކޮށްފައިއޮތީ ކޮން މަސައްކަތެއްތޯ. އެ ބޭފުޅާއާ ބެހޭ ކަންތަކާއި ނުބެހޭ ކަންތަކާއި ކަނޑައަޅުއްވާނީ އެ ބޭފުޅާއެއްނޫން. ވަޒީރު އަމިއްލަ ފުޅަށް ކުރައްވާ ކަމެއް ނޫން. އެއީ މިތަނުން (މަޖިލީހުން) ކޮންމެ ވުޒާރާއަކަށް، އޮންނާނެ، ވާނެ އެ ވުޒާރާއެއްގެ މަސައްކަތް ހަވާލުކޮށްފައި. އެމަސައްކަތްތައް، ތަފާސްހިސާބު ބެލެހެއްޓުން، ހިމެނޭ ކަމަށް ވާނަމަ ވަޒީރަށް އެ ހުންނެވެނީ ނުބައި މަގެއްގައި."
ރައީސް މުހައްމަދު ނަޝީދު
މީގެ އިތުރުންވެސް ރިޖެކްޓް މަހުގެ ތަފާސްހިސާބުތައް ބެލެހެއްޓުމަކީ ފިޝަރީޒް މިނިސްޓްރީން ކުރަންޖެހޭ ކަމެއް ކަމުގައި ނަޝީދު ވިދާޅުވި އެވެ. އަދި އެއީ ވިޔަފާރީގެ މައުލޫމާތެއް ނޫން ކަމަށާ، ރިޖެކްޓް މަހާއި، ރާއްޖޭގެ މަހުގެ އެންމެހައި ތަފާސްހިސާބުތައް ބެލެހެއްޓުމަކީ ހުރިހާ ގޮތަކުން ބެލި ނަމަވެސް މިނިސްޓްރީން ބަލަހައްޓަންޖެހޭ ކަމެއް ކަމަށް ނަޝީދު ވިދާޅުވިއެވެ.
"މިނިސްޓަރު އެ ގެންދަވަނީ މަޖިލީހުގެ މަސައްކަތަށް ހުރަސް އަޅުއްވަމުން." ރައީސް ނަޝީދުގެ ނުރުހުންވެ ވަޑައިގެން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
