މޯލްޑިވްސް ރިފޯމް މޫވްމަންޓް (އެމްއާރުއެމް) އިއްޔެ އުވާލުމާއި ގުޅިގެން އެޕާޓީގެ ދަރަންޏެއްް ވާނަމަ އިލެކްޝަންސް ކޮމިޝަންސް އަށް އެންގުމަށް އިއުލާން ކޮށްފިއެވެ.

އެގުތުން އެ ކޮމިޝަނުން މިކަމާއި ގުޅިިގެން މިއަދު ކުރި އިއުލާންގައި ވަނީ އެމްއާރްއެމްގެ ދަރަންޏެއްވާ ނަމަ އެކަން އެންގުމަށް ކޮމިޝަނުގެ 3322241 ނަންބަރު ފޯނަށް ގުޅުއްވުމަށް ނުވަތަ [email protected] އަށް އީ މެއިލް ކުރެއްވުމަށް އެދިފައެވެ.

މައުލޫމާތު ލިބިފައިވާ ގޮތުގައި އެ ޕާޓީ އުވާލާފައިވަނީ ސިޔާސީ ޕާޓީތަކުގައި މަދުވެގެން ތިބެންޖެހޭ މެންބަރުން ކަމުގައިވާ 3000 މެންބަރުން ހަމަނުވުމުންނެވެ. 

Advertisement

އެ ޕާޓީގައި 3000 މެންބަރުން ހަމަނުވެގެން ދެފަހަރެއްގެ މަތިން ނޯޓިން ދީފައިވެއެވެ. އެގޮތުން 2022 ވަނަ އަހަރުވެސް މެންބަރުން ހަމަ ކުރަން ނޯޓިސް ދިނުމުން، މުއްދަތު ތެރޭގައި ޕާޓީން ވަނީ މެންބަރުން ހަމަ ކޮށްފައެވެ. އެއަށްފަހު، އަނެއްކާވެސް އެ ޕާޓީގެ މެންބަރުންގެ އަދަދު 3000 އަށްވުރެ ދަށްވެފައި ވަނިކޮށް، ސަރުކާރުގެ ވުޒާރާތަކުގައި ތިބި އެ ޕާޓީއަށް ނިސްބަތްވާ ގިނަ މެންބަރުންވެސް ވަނީ ޕާޓީން ވަކިވެފައެވެ. 

އެ މެންބަރުން ޕާޓީން ވަކިވެފައި ވަނީ މިދިޔަ ފެބުރުއަރީ މަހުގެ ތެރޭގައި އެ ޕާޓީއަށް މެންބަރުން ހަމަކުރުމަށް ނޯޓިސްވެސް ދީފައިވަނިކޮށެވެ. އެގޮތުން ޕާޓީއަށް ދިން ދެވަނަ ނޯޓިސްގެ މުއްދަތު ހަމަވީ މިދިޔަ ބުދަ ދުވަހަށެވެ. 

އިލެކްޝަންސް ކޮމިޝަނުގެ ވެބްސައިޓުގައިވާ މައުލޫމާތަށް ބަލާއިރު ފެބުރުއަރީއާ ހަމައަށް މެމްބަރުންގެ އަދަދަކީ 2،981 އެވެ.

ޕާޓީގެ ރައީސް ފާރިސް މައުމޫން އިލެކްޝަން ކޮމިޝަންގެ ނިންމުމާއި ގުޅިގެން މިއީ ކޮރަޕްޝަން އެކުލެވޭ ޒިންމާދާރުކަން ކުޑަ ނިންމުމެއް ކަމަށް ވަނީ ވިދާޅުވެފައެވެ.

"އިލެކްޝަންސް ކޮމިޝަނުން ނިންމަވާފައިވާ މި ނިންމެވުމަކީ، ކޮރަޕްޝަންގެ ނާޖާއިޒު ނުފޫޒު އެކުލެވިގެން، ޤާނޫނީ ތަރަހައިން ބޭރުން ނިންމަވާފައިވާ، ޒިންމާދުރުކަން ކުޑަ ނިންމުމެއް ކަމުގައި ދެކެން. މިކަމުން އަންގައިދެނީ، ޤައުމުގައި ފަސާދައާއި ކޮރަޕްޝަންގެ ވަކި ހިތްޕާލާފައިވާ މިންވަރު. ހަމައެހެންމެ، ޤައުމުގައި ޤާނޫނު ހިންގުމަށް ނުކުޅެދިފައިވާ މިންވަރު" ފާރިސް ވިދާޅުވިއެވެ.

މިިއާއިއެކު އެ ޕާޓީގެ ޒަޢީމް މައުމޫން އަބްދުލްޤައްޔޫމް ވިދާޅުވެފައި ވަނީ މިއީ ވަރަށް ކޮރަޕްޓް ނިންމުމެއް ކަމަށާއި އަދި އެ ނިންމުމާއި ދެކޮޅަށް ވަކާލާތު ކުރައްވާނެ ކަމަށެވެ.