ގުޅިފައިވާ ސިޔާސީ ޕާޓީތަކުން މަޖިލީހަށް ހުށަހަޅާފައިވާ، ބަންޑާރަނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލައިގައި ޖަވާބުދާރީ ވުމަށް ބުދަ ދުވަހު މަޖިލީހަށް ހާޒިރުވާން ޗިޓު ފޮނުވައިފިއެވެ.

ރިއްފަތުގެ އިތުބާރު ނެތްކަމަށް ކަނޑައަޅާ އޭނާގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅަން ނިންމާފައިވަނީ ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް މަޖިލީހުގައި ހަރަކާތްތެރިވާ ގިނަ ސިޔާސީ ޕާޓީތަކުން ވަނީ ބުނެފައެވެ. 

ފޯޅަވަހި މައްސަލައިގައި ސަރުކާރުން އަމަލުކޮށްފައިވަނީ ޤާނޫނު އަސާސިއާއި ޚިލާފަށްކަމަށް ޤަބޫލުކުރާ ސިޔާސީ ޕާޓީތައް ވަނީ އެ މައްސަލައިގައި ގުޅިގެން ކުރިއަށް ދިއުމަށް އިއްތިހާދެއް އެކުލަވާލާފަ އެވެ. އެ ޕާޓީތަކުގެ ތެރޭގައި ހިމެނެނީ ޕީޕީއެމް-ޕީއެންސީ ކޯލިޝަނާއި، ރައީސް މުޙައްމަދު ނަޝީދުއާއި ޖުމްހޫރީ ޕާޓީ އާއި އަދި އެމްއެންޕީއެވެ. 

Advertisement

ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅަން ނިންމާފައިވާކަން އިއުލާނުކުރުމަށް ގުޅިފައިވާ ސިޔާސީ ޕާޓީތަކުން އެކުލަވާލި ޕާލަމެންޓްރީ ގުރޫޕުން ބޭއްވި ބައްދަލުވުމުގައި މަޖިލީހުގެ މައިނޯރިޓީ ލީޑަރު އަދި އޭދަފުށީ ދާއިރާގެ މެމްބަރު އަހުމަދު ސަލީމު ވިދާޅުވީ ދިވެހިރާއްޖޭގެ ކަނޑުގެ ސަރަހައްދުން ބައެއް މި ސަރުކާރުން ވިއްކާލާފައިވާ ކަމަށެވެ. 

އިމުގެ ނުވަތަ ސަރަހައްދުގެ ވާހަކައަކީ ކުޅޭ ކުޅޭ ވާހަކައެއް ނޫން ކަމަށާއި، ރާއްޖޭގެ ސަރަހައްދުން އަކަ އިންޗިއެއްވެސް ގެއްލިގެން ދިއުމަކީ ރައްޔިތުންނަށް އޭގެ ގެއްލުން އެކި ސިފަސިފައިގައި ފޯރާނެ ކަމެއް ކަމަށެވެ. 

އެގޮތުން އެ މައްސަލައިގައި ރިއްފަތު އަމަލުކޮށްފައިވަނީ ދިވެހިންގެ މަސްލަހަތު ހިމާޔަތްކުރުމަށް ނޫންކަން ފެންނަން އޮތް އިރު އެފަދަ މަގާމެއްގައި އޭނާ ހުރެގެން ދެން ލިބޭނެ ގެއްލުން ބޮޑުކަން ސަލީމު ފާހަގަކުރެއްވި އެވެ.