މި ހުކުރު 'ވޮއިސް' ގެ ބަދިގެއިން މި ގެނެސްދެނީ ސްޕައިސީ ގްރިލްޑް ޗިކަން ތައްޔާރު ކުރާނެ ގޮތެވެ. މިއީ ތައްޔާރު ކޮށްލަން ވެސް ފަސޭހަ ޑިޝްއެކެވެ. މި ޑިޝް ޗިކަން ޑިޕިންގ އާއި އެކު ނުވަތަ ފަރާޓާ ނޫނީ ބަތާއި އެކު ކާލަންވެސް ވަރަށް މީރު ވާނެއެވެ. 

1ކިލޯ ކުކުޅު (ހަން ނޮޅައި، މެދުން ފަޅާލާފައި)

1 ބޮޑު ފިޔާ

3 ލޮނު މެދު

ހިކަނދިފަތް

1/2 އިންޗި އިނގުރު

ގިތެޔޮ މިރުސް

4 މޭޒުމަތީ ސަމުސާ މުގުރި މިރުސް

1 ސައި ސަމުސާ މުގުރި އަސޭމިރުސް

1/2 ސައިސަމުސާ ދިރި

3 ކާށި ފޮތި (ފިހެފައި)

ނޫޑްލްސް ސޫޕް ޕެކެޓެއް

1 1/2 ލުނބޯ

1 މޭޒުމަތީ ސަމުސާ ސޯޔާ ސޯސް

1 ސައި ސަމުސާ އޮއިސްޓާ ސޯސް 

1 ސައިސަމުސާ ލޮނު

4 މޭޒުމަތީ ސަމުސާ ބަޓަރު

1) ފިޔާ، ލޮނުމެދު، ހިކަނދިފަތް، އިނގުރު، ގިތެޔޮ މިރުސް، މުގުރި މިރުސް، އަސޭމިރުސް، ދިރި، ކާށި އަދި ނޫޑްލްސް ސޫޕް ޕެކެޓް، އެއްކޮށް މިކްސަރުން ހިމުންކޮށް މުގުރާލާއި ލޮނު މިރުސް ގަނޑެއް ތައްޔާރު ކޮށްލާށެވެ. އެއަށްފަހު މިރުސްގަނޑު ތައްޓަކަށް އަޅާލައި ލޮނާއި ލުނބޯ ހުތް މިރުސް ގަނޑަށް އެޅުމަށްފަހު އެކުލަވާލާށެވެ.

2) ދެން ކުކުޅުގައި ސޯޔާ ސޯސް، އޮއިސްޓާ ސޯސް އަދި ބަޓަރު ރަނގަޅަށް އުނގުޅާލާށެވެ. 

3) އެއަށްފަހު އެ މިރުސް ގަނޑުވެސް ކުކުޅުގައި ރަނގަޅަށް އުނގުޅާލުމަށްފަހު 1 ގަޑި އިރު ވަންދެން ފްރިޖުގައި ނުވަތަ ފްރިޖުން ބޭރުގައި ނަމަވެސް މެރިނޭޓް ކުރަން ބަހައްޓާށެވެ. 

4) ދެން 200 ޑިގްރީސް ސެލްސިއަސްއަށް 10 މިނެޓް ވަންދެން އަވަން ޕްރީ ހީޓް ކުރާށެވެ. 

5) އެއަށްފަހު ކުކުޅު ޓްރޭއަށް ލުމަށްފަހު، އަވަނަށް ލައި ކުކުޅު ފިހެލާށެވެ. 

6) ގާތް ގަނޑަކަށް 30 މިނެޓް ފިހެވުމުން ކުކުޅު މެރިނޭޓް ކުރި ތަށީގައި އިތުރުވެފައި ހުރި ޕެސްޓް ކޮޅު ކުކުޅު މަތީގައި އުނގުޅާލުމަށްފަހު ރޯ ފިލަންދެން އަނެއްކާވެސް ފިހެލާށެވެ.