ރަށްރަށުގައި ސްޕާ ހިންގޭނީ ކައުންސިލުން އެއްބަސްވުމުންކަމަށް ކަނޑައަޅައި، "ސްޕާގެ ވިޔަފާރި ހަރަކާތް ރަޖިސްޓްރީކޮށް ހިންގުމުގެ ގަވާއިދު" އިސްލާހު ކޮށްފިއެވެ.
މި ހަވާއިދަށް ގެނައި ދެވަނަ އިސްލާހުގައި ވާގޮތުން، މީހުން ދިރިއުޅޭ ރަށްރަށުގައި ހިންގާ ޓޫރިސްޓް ގެސްޓަހައުސް ތަކާއި ޓޫރިސްޓް ހޮޓާތަކުގައި ހިންގާ ސްޕާގެ ހިދުމަތްދޭ ތަންތަނއް ފިޔަވައި ވަކި ރަށެއްގައި ސްޕާގެ ހިދުމަށް ދޭނަމަ އެކަމށް އެދި އިކޮނޮމިކް މިނިސްޓްރީއަށް ހުށަހަޅަން ޖެހެއެވެ.
އަދި އެއަށްފަހު މިނިސްޓްރީން އެ ރަށެއްގެ ރަށު ކައުންސިލަށް ސިޓީ ފޮނުވައި، އެރަށަކީ ސްޕާ ހިންގޭނެ ރަށެއްތޯޯ ކަނޑައަޅައި ދިނުމަށް އެދެއެވެ. މިނިސްޓްރީން ވަކިގޮތެއް ނިންމާނީ ކައުންސިލުން ދޭ ޖަވާބެއްގެ މައްޗަށް ބިނާކޮށް ކަމަށް ގަވާއިދުގައި ވެއެވެ.
މި ގަވާއިދުގައި ވާގޮތުން، ސްޕާގެ ހިދުމަތަށް އެދި ހުށަހަޅަން ޖެހޭނީ އޮންލައިން ކޮށެވެ.
ސްޕާގެ ވިޔަފާރި ހިންގާ ތަންތަނުގައި، ގަވާއިދުތަކާއި ޝަރުތުތައް ފުރިހަމަ ވޭތޯ އިންސްޕެކްޝަންއެއް ކުރިއަށް ގެންދާނެ ކަމަށާއި އެ އިންސްޕެކްޝަންއަށް 2000 ރުފިޔާގެ ފީއެއް ނަގާނެ ކަމަށް އާ އިސްލާހުގައި ވެއެވެ.
އާ ގަވާއިދާ އެއްގޮތަށް، ރިސޯޓް ނުވަތަ ގެސްޓްހައުސް ސްޕާތައް މޮނިޓަރ ކުރާނީ އިކޮނޮމިކް މިނިސްޓްރީގެ ފަރާތުންނެވެ.
Advertisement
This content is created and paid for by advertisers and does not involve Voice Journalists
