25 މީހަކު ކުރިމަތިލާފައި ވަނިކޮށް ފެމިލީ ކޯޓް ޤާޟީ މަޤާމުގެ ފުރުޞަތު ހުޅުވާލާ ކޮށްފައިވާ އިޢުލާން ޖުޑީޝަލް ސަރވިސް ކޮމިޝަން (ޖޭއެސްސީ) އިން ބާޠިލް ކޮށްފިއެވެ.

އެގޮތުން ޖޭއެސްސީ އިން މިއަދު ކުރި އިއުލާނުގައި ބުނެފައިވަނީ ފެމިލީ ކޯޓް ޤާޟީ މަޤާމަށް ކުރި އިއުލާން އާއި މި މަޤާމަށް ކުރިމަތިލާ ހުށަހަޅާފައިވާ އެޕްލިކޭޝަންތައްވެސް ބާޠިލްކުރެވިފައިވާ ކަމަށެވެ.

މި އިއުލާން ބާޠިލް ކޮށްފައިވާ ސަބަބެއް ޖޭއެސްސީ އިން ހާމަ ކޮށްފައި ނެތް ނަމަވެސް މީގެ ކުރިން ޖޭއެސްސީއިން ވަނީ މި މަޤާމަށް 25 ބޭފުޅަކު ކުރިމަތިލާފައިވާކަން ހާމަ ކޮށްފައެވެ.

Advertisement

މި މަޤާމަށް މުސާރައާއި ލިވިންގ އެލަވަންސް އާއި ރިސްކް އެލަވަންސް އާއިއެކު ޖުމްލަ 46375 ރުފިޔާ ލިބިގެން ދާނެ ކަމަށް ޖޭއެސްސީއިން ޤާޟީ ހޯދުމަށް ކުރި އިއުލާނުގައި ވަނީ ބުނެފައެވެ.

މިއާއިއެކު ރައްޔިތުން މަޖްލިސްގެ އިދާރާއިން ކަނޑައަޅާ ގޮތުގެ މަތިން ފޯން އެލަވަންސްއާއި މެޑިކަލް އެލަވަންސް ލިބިގެން ދާނެ ކަމަށްވެސް އެ އިއުލާނުގައި ވަނީ ބުނެފައެވެ.