ފީފާގެ ރައީސް ޖިއާނީ އިންފެންޓީނޯގެ އެދުމާއި އެއްގޮތަށް ރާއްޖޭގައި ޕެލޭ ސްޓޭޑިއަމް ގެ ނަމުގައި ފުޓުބޯޅަ ސްޓޭޑިއަމްއެއް ހުޅުވުމުން އދ. މަހިބަދޫގެ ރައްޔިތުންނާއި، އެފްއޭއެމްގެ ރައީސް ބައްސާމް އަދީލް ޖަލީލަށް ޝުކުރު އަދާކުރައްވައިފިއެވެ. 

ބްރެޒިލުގެ ފުޓްބޯޅަ ލެޖެންޑް ޕެލޭ މަރުވުމާއި ގުޅިގެން، ފީފާއިން ކޮންމެ މެންބަރު ގައުމެއްގެ އެއް ދަނޑަށް ޕެލޭގެ ނަމުން ނަން ދިނުމަށް ވަނީ އެދިފައެވެ. 

އެގޮތުން ފީފާގެ އެ އެދުމާއި އެއްގޮތަށް، ކުރީ ސަރުކާރުން އދ. މަހިބަދޫގައި އަޅައި، ހުޅުވާފައިވާ، މަހިބަދޫ ފުޓްބޯލް ސްޓޭޑިއަމްގެ ނަން، ޕެލޭ ސްޓޭއަށް އިއްޔެ ވަނީ ބަދަލުކޮށް ހުޅުވާފައެވެ. މަހިބަދޫގެ އެ ފުޓްބޯޅަ ސްޓޭޑިއަމްއަކީ ފީފާގެ ސްޓޭންޑަޑް ތަކަށް ފެތޭ، ފީފާއިން ގަބޫލުކުރާ ޕިޗެއް ހިމެނޭ ދަނޑެކެވެ.

Advertisement

ޕެލޭ ސްޓޭޑިއަމް ހުޅުވުމަށް އިއްޔެ ހަވީރު މަހިބަދޫގައި ބޭއްވި ރަސްމިއްޔާތެގައި ދަނޑު ހުޅުއްވައިދެއްވީ ފުޓްބޯލް އެސޯސިއޭޝަން އޮފް މޯލްޑިވްސްގެ ރައީސް ބައްސާމް އަދީލް ޖަލީލާއި، މަހިބަދޫ ކައުންސިލުގެ ރައީސް ރަޝާދު އަލީގެ އިތުރުން މަހިބަދޫ ދާއިރާގެ މަޖިލިސް މެންބަރު އަދި ކުރީގެ ތަޖުރިބާކާރު ފޯވާޑް އަޙްމަދު ތޯރިގް (ޓޮމް) އެވެ.

ޕެލޭ ސްޓޭޑިއަމް ހުޅުވުމުގެ ރަސްމިއްޔާތުގެ ތެރެއިން--

ދަނޑު ހުޅުވުމުގެ ގޮތުން، ރާއްޖޭގެ ގައުމީޓީމާއި މަހިބަދޫ ފުޓްބޯޅަ ޓީމާ ދެމެދު މެޗެއްވެސް ވަނީ ކުޅެފައެވެ. އެ މެޗް 5-0 އިން ފަސޭހަ ކަމާއިއެކު ކާމިޔާބު ކޮށްފައިވަނީ ރާއްޖޭގެ ގައުމީ ޓީމުންނެވެ. 

ޕެލޭ ސްޓޭޑިއަމް ހުޅުވުމުގެ ރަސްމިއްޔާތުގެ ތެރެއިން--

ފީފާގެ އެދުން ގަބޫލުކޮށް ރާއްޖޭގައި ޕެލޭ ސްޓޭޑިއަމްގެ ނަމުގައި ސްޓޭޑިއަމްއެއް ހުޅުވުމާއި ގުޅިގެން، ފީފާގެ ރައީސް ވަނީ، ދިވެހިރާއްޖެ އަށާއި ޚާއްސަކޮށް، އެ ސްޓޭޑިއަމް ހުޅުވި ރަށް، މަހިބަދޫގެ ރައްޔިތުންނާއި ބައްސާމްއަށް ޚާއްސަ ޝުކުރެއް އަދާކުރައްވާފައެވެ. 

"ޕެލޭގެ ނަމުގައި ފުޓުބޯޅަ ސްޓޭޑިއަމްއެއް ހުޅުވި ކަމަށްޓަކައި އަހަރެން ރާއްޖޭގެ ފުޓްބޯޅަ އެސޯސިއޭޝަންގެ ރައީސް ބައްސާމް އަދީލް ޖަލީލަށާއި، މަހިބަދޫގެ ރައްޔިތުންނަށް ހިތުގެ އަޑިން ޝުކުރު އަދާކުރަން ބޭނުން." އިންފަންޓީނޯ ވިދާޅުވެފައިވެއެވެ.