ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހަށް ނިސްބަތްކޮށް "ޗޯރު އިބުރޭ" ގޮވާތީއޭ ކިޔައި ހަމައިން ނެއްޓިގެން ދިއުމަކީ ޑިމޮކްރަސީގައި ފަހަތަށް އަޅާ ފިޔަވަޅެއްކަމަށް މަޖިލީހުގެ ރައީސް އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވެފައިވަނީ ރައީސް ޞާލިހަށް "ކަނޑު ފޭރޭ ޗޯރު" އަދި "ޗޯރު އިބުރޭ" ނިސްބަތްކޮށް ޗެނަލް13 އިން ގެނެސްދޭ ލަވަތަކެއްގެ މައްސަލަ ބަލަން ފެށުމުން މަޖިލީހަށް ހުށައެޅި ކުއްލި މައްސަލަ ބޭރުކޮށްލުމާއި ގުޅިގެން ގަލޮޅު އުތުރު ދާއިރާގެ މެމްބަރު އީވާ އަބްދުالله ދެއްކެވި ވާހަކަތަކާއި އެމަނިކުފާނު އެއްބަސްވެވަޑައިގަތުމުގެ ގޮތުންނެވެ.
މެމްބަރުގެ އީވާގެ ވާހަކައިގައި ވަނީ އިދިކޮޅު ޕާޓީގެ ގޮތުގައި މަސައްކަތް ކުރާއިރު، ވެރިކަމުގައި ހުންނަ ފަރާތްތަކަށް ނިސްބަތްކޮށް ލަވަހެދުމާއި، ވަނަން ކިޔުމަކީ ކޮންމެ ވެރިކަމެއްގައި ގެންގުޅޭ ސިޔާސީ އުކުޅެއްކަމަށް ވިދާޅުވެފަ އެވެ.
އެހެންކަމުން ރައީސް ޞާލިހަށް ނިސްބަތްކޮށް ވަނަމަކުން މުޚާތަބުކުރުމަކީ ފިޔަވަޅުއަޅަން ޖެހޭ ކަމެއް ނޫން ކަމަށާއި، އެފަދައިން އެކަން ކުރުމަކީ ޑިމޮކްރަސީ ފަހަތަށް ސޮއްސާލުންކަމަށް އީވާ ވިދާޅުވި އެވެ.
އީވާގެ އެވާހަކަތަކާއި އެއްބަސްވެވަޑައިގަންނަވާ ކަން ފާހަގަކުރައްވާ ނަޝީދުު ވަނީ މީގެކުރީގެ ރައީސުންނަށް ކިޔާފައިވާ އެކި ނަންތައް ހަނދާންކޮށްދެއްވާފަ އެވެ.
"ކުރީގެ ރައީސް އިބްރާހިމް ނާސިރަށް ކަރު ކުރު ބައިސާ، ކުރީގެ ރައީސް މައުމޫނު އަބްދުލްގައްޔޫމަށް ގޮޅާބޯ، ކުރީގެ ރައީސް މުޙައްމަދު ނަޝީދަށް ގަންޖާބޯ، ކުރީގެ ރައީސް ވަހީދަށް ބާޣީ ވަހީދު، ކުރީގެ ރައީސް އަބްދުالله ޔާމިނަށް ރާގޮނޑި ރާޖާ.. މި ނަންތައް އަޅުގަނޑުމެން ވަނީ މި މަޖިލީހުގަޔާއި އެކި ތަންތަނުގައި އެކި ގޮތްގޮތަށް ކިޔާފައި"
ރައީސް މުޙައްމަދު ނަޝީދު
ނަޝީދު ވިދާޅުވީ ކުރީގެ ރައީސުންނަށް ތަފާތު ނަންތައް އެކި ތަންތަނުގައި ގޮވާފައިވާއިރު، އެކަންކަން ހުއްޓުވާފައި ވެސް ނުވާކަމަށެވެ.
ރައީސް ނަޝީދާއި ޞާލިހު ވިޔަވަތި ކޮންފަރެންސްގެ ތެރެއިން
އެހެންކަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ނިސްބަތްކޮށް "ޗޯރު އިބުރޭ" އޭ ގޮވުމަކީ ހަމައިން ނެއްޓެންޖެހޭ ކަމެއް ނޫން ކަަމަށާއި، އެފަދައިން ހަމައިން ނެއްޓޭނަމަ އެއީ ޑިމޮކްރަސީގެ ރޫހުގައި ފަހަތަށް އެޅޭ ފިޔަވަޅެއްކަމަށް ނަޝީދު ވަނީ ސިފަކުރައްވާފަ އެވެ.
"މިއަދު ޗޯރު އިބުރޭ ކީމާ، އެކަމާއި އަޅުގަނޑުމެން ހަމައިން ނައްޓައިގެންދާ މިންވަރަށް ކަންބޮޑުވުން އިތުކޮށްފިނަމަ އެއީ އަޅުގަނޑު ދަންނަވާނީ ޑިމޮކްރަސީގެ ރޫހުގައި ފަހަތަށް އެޅޭ ފިޔަވަޅެއް"
ރައީސް މުޙައްމަދު ނަޝީދު
Advertisement
This content is created and paid for by advertisers and does not involve Voice Journalists
