މަގުމަތި އެޅުމާއި ކަނޑުމަތި އެޅުން، ނުވަތަ ވާވެއްދުމަކީ ޒަމާނުއްްސުރެ ވެސް އަހަރެމެންނަށް ކިޔައި އުޅޭ އަޑު އިވޭ ވާހަކަ ތަކެވެ. ޚާއްސަކޮށް މަހަށް ގޮސް އުޅޭ އިރު، މިހާރުވެސް މިފަދަ ހާދިސާތައް ދިމާވާކަން މަސްވެރިން ކިޔައިދެއެވެ. އަދި ބައެއް ފަހަރު އެއްގަމުގައި، މަގުމަތީގައި ހިނގާ އުޅޭއިރުވެސް ބައެއް މީހުންނަށް މިފަދަ ހާދިސާތައް ދިމާވެއެވެ. 

ވާވެއްދުމުން އެ މީހަކަށް ނުވަތަ އެ ބަޔަކަށް ދާން އުޅޭ މިސްރާބު ގެއްލޭގޮތް ވެއެވެ. އޭގެ ސަބަބުން ކިތަންމެ ގިނަވަގުތަކު ދުއްްވި ނަމަވެސް ނުވަތަ ހިނގި ނަމަވެސް އަބަދު އެއްތަނަކަށް އާދެވި، ނުވަތަ އެހެން މިސްރާބުތަކަށް ދެވި ދާން އުޅޭ މަންޒިލަށް ނުދެވޭގޮތް ވެއެވެ. މިފަދަ ހާދިސާތައް ކިޔައިދޭ މީހުން ބުނާ ގޮތުން މިއީ ވަރަށްވެސް ބިރުވެރި ވަގުތުކޮޅެކެވެ. ޚާއްސަކޮށް ރޭގަނޑުގެ ވަގުތު ތަކުގައި، ކަނޑުމަތީގައި އުޅޭ އިރު، މިފަދަ ހާދިސާތައް ދިމާވުމުން ރަށަށް ދެވޭނެ ކަމުގެ އުއްމީދު ކެނޑި، އިންޖީނުން ތެޔޮ ހުސްވެދާނެ ކަމުގެ ބިރު ހީވުން ފަދަ އެތައް ބިރުވެރިކަމެއްގެ ތެރެއަށް ވެއްޓިގެން ދެއެވެ. 

އިހުޒަމާނުގައި މީހުން ކަނޑުމަތި އެޅުމާއި ރެދަން ލުމާއިވެސް ގުޅުވައި އުޅެއެވެ. އެގޮތުން ރެދަން ލައިފި ނަމަ ކަނޑުމަތި އަޅާނެކަމަށް ނުވަތަ ކަނޑުމަތި އަޅައިފިނަމަ ރެދަން ލާނެ ކަމަށް ގަބޫލުކުރާ މީހުންވެސް އުޅުނެވެ. 

Advertisement

އަދި މީގެ އިތުރުން، އިހުގެ މީހުން ގަބޫލުކުރާ އެހެން ބޯދާ ގަބޫލު ކުރުމެއްވެސް އޮވެއެވެ. އެއީ ކަނޑުމަތި އަޅާފައިވާ ދޯންޏެއް ސަލާމަތް ކުރެވޭނީ ދޯނީގެ ކުނބުގައި ރިހާކުރު އުނގުޅައިގެންނެވެ. އެހެންކަމުން އޭރު ހުރިހާ ދޯންޏެއްގައި ހެންވެސް ރިހާކުރު ގެންގުޅޭ ކަމަށްވެ އެވެ. އެހެންނަމަވެސް، ރިހާކުރު ކުނބުގައި ހާކައިގެން، މި ފަދަ ބިރުވެރި ހާދިސާއަކުން ސަލާމަތް ވެދާނެ ކަމަށް ބުއްދިވެސް ގަބޫލެއް ނުކުރެއެވެ. އަދި ގަބޫލު ކޮށްގެންވެސް ނުވާނެއެވެ. 

ކަނޑުމަތި އެޅުމުގެ ހާދިސާތައް ގިނަ ބަޔަކަށް ދިމާވެފައިވާ ކަމަށް އެމީހުންގެ ދުލުން ކިޔައިދިން ނަމަވެސް މިއީ ހަގީގަތެއް ނޫން ކަމަށް ބައެއް މީހުން ބުނެއެވެ. އަދި، އެއީ މީހުންގެ ސަމާލުކަން ހޯދުމަށް ދައްކާ ވާހަކަ ކަމުގައިވެސް އެ މީހުން ބުނެއެވެ. ނުވަތަ އެއީ މާ ބިރު ގަތުމުން ހީވާ ހީވުމެއް ކަމަށްވެސް އަނެއް ބަޔަކު ދެކެއެވެ. 

ކަން މިހެން ހުރި ނަމަވެސް ވާވެއްދުމަކީ ހަގީގަތުގައިވެސް ވާނެ ކަމެއް ކަމަށާ، އަހަރެމެންގެ ލޮބުވެތި ރަސޫލާ ޞައްލައްالله ޢަލައިހި ވަސައްލަމް ގެ ޒަމާނުގައިވެސް އެފަދަ ކަންކަން ހިނގާފައިވާ ކަމަށް ރާއްޖޭގެ މަޝްހޫރު ދީނީ ޢިލްމުވެރިޔާ އައްޝެއިޚު ޢަލީ ޒާހިރު ވަނީ ވިދާޅުވެފަ އެވެ. 

އެގޮތުން، ރޭ ދާރިސް ޓީވީން ގެނެސްދިން "ސުވާލަކީ ކޮބާ؟" ޕްރޮގްރާމެއްގައި ބެލުންތެރިއެއް ވާވެއްދުމާއި ގުޅިގެން ކުރި ސުވާލަށް ޖަވާބު ދެއްވަމުން ޝެއިޚް ވިދާޅުވީ އެފަދަ ކަންކަމަކީ ޖިންނި ޝައިޠާނުންގެ ކިބައިން ދިމާވާ ކަންކަން ކަމަށެވެ. 

އަދި އެއްގަމުގައި ނަމަވެސް ކަނޑުގައި ނަމަވެސް އެފަދަ ކަމެއް ކުރިމަތި ވެއްޖެނަމަ، އާޔަތުލް ކުރުސި އާއި، ބަންގީގެ ކަލިމަތަކާއި، އަދި ޒިކުރުތައް ކިޔުމަށް ޝެއިޚު ވަނީ އިރުޝާދު ދެއްވާފައެވެ. އަދި އެފަދައިން ކަން ކުރުމުން މާތް اللهގެ އިރާދަފުޅުން އެކަމުން ސަލާމަތް ވާނެ ކަމަށްވެސް ޝެއިޚު ވިދާޅުވި އެވެ.