ފެނުމުން މަހްރޫމް ވެފައިވާ ފަރާތްތަކަށް ވޯޓުލުމުގެ ފުރުސަތު ފަހި ކޮށް ދިނީ އެމްޑީޕީއިން ކަމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެއެވެ.
މީކާއިލް މިހެން ވިދާޅުވީ މިއަދުގެ މަޖިލިސް ޖަލްސާގައި އިންތިޚާބާއި ބެހޭ ޤާނޫނަށް އިސްލާޙު ގެނައުމަށް ހުށަހަޅާފައިވާ ބިލަށް ވާހަކަފުޅު ދައްކަވަމުންނެވެ.
މީކާއިލް ވިދާޅުވީ މީގެ 15 އަހަރު ކުރިން ޕީޕީއެމް ފިކުރު، އޭރުގެ ޑީއާރްޕީ ފިކުރުން އޭރުގެ 18 އަހަރުން މަތީގެ ޒުވާނުންނަށް ވޯޓު ލުމުގެ ހައްޤުން އެޒުވާނުން މަހްރޫމް ކުރުމަށް ހިފައިފައި ތިބެނިކޮށް އެމްޑީޕީ އިން ނުކުމެ އެ ހައްޤު ކަށަވަރު ކުރި ކަމަށެވެ.
"މިއަދު އޭގެ ފަނަރަ އަހަރު ފަހުން އަނެއްކާވެސް ބައެއްގެ އަސާސީ ހައްޤު ކަށަވަރު ކުރަން، ބައެއްގެ އިލެކްޓޯރަލް ހައްޤު، ޒަމާނުއްސުރެ އެތައް ބަޔަކު އެކަމަކުން މަހްރޫމްވެފައިވާ، އެހައްޤު ކަށަވަރު ކުރަންވެސް މިނުކުތީ އަނެއްކާވެސް، ދިވެހި ރައްޔިތުންގެ ދިމޮކްރެޓިކް ޕާޓީ، މި ޕާޓީގެ މިސަރުކާރު" މީކާއިލް ވިދާޅުވިއެވެ.
މީކާއިލް މަޖިލީހުގައި މިވާހަކަ މިގޮތަށް ދެެއްކެވީއިރު، ފެނުމުން މަހްރޫމް ވެފައިވާ މީހުންނަށް މިނިވަން ކަމާއިއެކު ވޯޓު ލުމުގެ ހައްޤު ކަށަވަރު ކުރުމުގެ މަސައްކަތަކީ ބްލައިންޑް އެންޑް ވިޝުއަލީ އިމްޕެއަރޑް ސޮސައިޓީ އޮފް މޯލްޑިވްސް އިން ކޮށްފައިވާ ބުރަ މަސައްކަތެކެވެ. އެއީ ރަށްރަށުގައި ތިބި ލޯފަން ބޭފުޅުން ވަޒީފާއިން ޗުއްޓި ނަންގަވައިގެން މާލެ ވަޑައިގެން ކުރެެއްވި ބުރަ މަސައްކަތުގެ ނަތީޖާއެވެ. އެގޮތުން، އެބޭފުޅުން އެ މަސައްކަތުގައި އެތައް ސިޔާސީ ޕާޓީތަކާއި، އިިލެކްޝަންސް ކޮމިޝަނާއިވެސް މިފަހުން ބައްދަލު ކޮށްފައިވާއިރު، ލޯފަން މީހުން ވޯޓުލުމަށް ބޭނުން ކުރެވިދާނެ ޓެމްޕްލޭޓް ޚިޔާލާއި، އޭގެ ސާމްޕަލް ވެސް އެންމެ ފުރަތަަމަ ހުށަހަޅާފައިވަނީ އެ ޖަމިއްޔާ އިންނެވެ.
Advertisement
This content is created and paid for by advertisers and does not involve Voice Journalists
