ތުރްކިޔޭގައި އެންމެ ފަހުން ބޭއްވުނު ރިޔާސީ އިންތިޚާބުގެ ދެވަނަ ބުރު ކާމިޔާބު ކުރައްވައި ރައީސް ކަމުގެ އިތުރު ދައުރަކަށް އިންތިހާބުވެ ވަޑައިގެންނެވި އެ ގައުމުގެ މިހާރުގެ ރައީސް ރަޖަބް ޠައްޔިބް އުރްދޮޣާން ވަނީ މީގެ އަހަރުތަކެއް ކުރިން ޖަލަށް ލެވިފައެވެ. 

އެގޮތުން އުރުދޮޣާން ޖަލަށް ލެވިފައިވަނީ 1999 އަހަރު ތެރޭގައެވެ. އޭރު އެމަނިކުފާނު ދިޔައީ އިސްތަންބޫލްގެ މޭޔަރު ކަމުގެ މަގާމު އަދާކުރައްވަމުންނެވެ. އެ މަގާމުގައި ހުންނަވައިގެން ކިޔުއްވި ޅެމެއްގެ ސަބަބުން 4 މަސްދުވަހަށް އެމަނިކުފާނު ޖަލަށް ލާފައިވާއިރު, ސިޔާސީ އެއްވެސް ކަމެއްގައި ހަރަކާތްތެރިވެ އުޅުންވެސް އުރުދޮޣާންގެ މައްޗަށް އޭރު ވަނީ މަނާކޮށްފައެވެ. 

އުރުދޮޣާން ތުރުކިޔޭގެ ޖަލުގައި 

ޅެމެއް ކިޔުއްވި ކަމަށްޓަކައި އެ އަދަބު އުރުދޮޣާން އަށް ދީފައިވާއިރު، އެ ޅެމުގައި އެއްވެސް ބޭ އަދަބީ ބަހެއް ނުވަތަ މީހަކަށް އަނިޔާއެއް ދިނުމަށްވެސް ހިތްވަރުދެއްވާފައެއް ނުވެއެވެ. 

އެ ޅެމުގެ މާނައިގައި ވަނީ؛ 

މިސްކިތް ތަކަކީ އަހަރެމެންގެ "ބެރެކްސް" ނުވަތަ ހަނގުރާމަވެރި ސިފައިންގެ ހިޔާވައްސެވެ. 

އެ މިސްކިތް ތަކުގެ ގުއްބަކީ އަހަރެމެންގެ ހެލްމެޓެވެ. 

އެ މިސްކިތް ތަކުގެ މުންނާރަކީ އަހަރެމެންގެ ކަނޑިއެވެ. 

އަދި މުސްލިމުންނަކީ އަހަރެމެންގެ ހަނގުރާމަވެރި ސިފައިންނެވެ. 

ހަތަރުމަސް ދުވަސް ޖަލުގައި ހޭދަކުރައްވައި، ޖަލުން މިނިވަންވެވަޑައިގަތުމަށްފަހުގައިވެސް އުރުދޮޣާން ވަނީ ސިޔާސީ މައިދާނަށް އަލުން ނުކުމެ ވަޑައިގެންފައެވެ. 

އެގޮތުން ނުކުމެ ވަޑައިގެން ތުރުކިޔޭގެ ރައީސް ކަމުގެ މަގާމަށްވެސް އިންތިޚާބުވެ ވަޑައިގެންފައިވާއިރު، އަދި އަދާ ޖެހެންދެންވެސް އެ މަގާމުގައި ހުންނެވީ އެމަނިކުފާނެވެ. އެގޮތުން މިމަހު ނިމިގެން ދިޔަ ތުރުކިޔޭގެ ރިޔާސީ އިންތިހާބު ކާމިޔާބު ކުރެއްވުމާއި އެކު އުރުދޮޣާންގެ 20 އަހަރުގެ ދައުރަށް އިތުރު 5 އަހަރު ވަނީ އިތުރު ވެގެން ގޮސްފަ އެވެ. 

ތުރުކިޔޭވިލާތުގެ ރައީސް ކަމުގެ މަޤާމަށް އޭނާ އެންމެ ފުރަތަމަ ފަހަރަށް އިންތިޚާބުވެ ވަޑައިގަތީ 2014 ވަނަ އަހަރުގެ އޮގަސްޓު މަހުގެ 28 ވަނަ ދުވަހުއެވެ. އަދި، 2003 ވަނަ އަހަރުން ފެށިގެން 2014 ވަނަ އަހަރު ރައީސް ކަމުގެ މަގާމަށް އިންތިޚާބުވެ ވަޑައިގަންނަވަން ދެން އޭނާ ހުންނެވީ ބޮޑުވަޒީރު ކަމުގެ މަގާމުގައެވެ.