ޕާޓީ އުފައްދަން ފޯމު ލާނީ އަތޮޅުތެރެއިންވެސް ބޭނުންވާ މީހުން ހިމަނައިގެން ކަމަށް ދަ ޑިމޮކްރެޓްސްއިން ބުނެފިއެވެ.
ޕާޓީއަށް މީހުން ސޮއިކުރުމާ ބެހޭގޮތުން "ވޮއިސް"އާ ވާހަކަ ދައްކަވަމުން މާލެ ސިޓީ ކައުންސިލްގެ ގަލޮޅު އުތުރު ދާއިރާގެ މެމްބަރު މުހައްމަދު ސައިފް ފާތިހު ވިދާޅުވީ ރާއްޖޭގެ އެކި ކަންކޮޅުތަކުން ފޯމުތައް ފުރަމުން ދާ ކަމަށާއި އިދާރީގޮތުން ކުރަން ޖެހޭ ވަރަށް ގިނަ މަސައްކަތްތައްވެސް ކުރަމުންދާ ކަމަށެވެ.
ބޭނުންވަނީ ރާއްޖޭގެ ހުރިހާ ސަރަހައްދަކުންވެސް ބޭނުންވާ މީހުންނަށް ފުރުސަތު ދިނުމަށްފަހު އީސީއަށް ފޯމުތައް ހުށަހަޅަން ކަމަށް ސައިފް ވިދާޅުވިއެވެ.
"މިހާރު ވަރަށް މާލެ ސެންޓްރިކްކޮށް މި ޕްރޮސެސް ކުރަން ޖެހިފަ މި އޮންނަނީ، ގާނޫނާ ގަވާއިދުތައް އޮތް ގޮތުން. އެއީ މިސާލަކަށް އިލެކްޝަންސް ކޮމިޝަނަށް ފިޒިކަލް ކޮޕީއެއް ހުށަހަޅަން ޖެހޭ. އެހެންވީމަ އަޅުގަނޑުމެންނަށް ވަރަށް ބޮޑަށް ޝަކުވާ ފުރަތަމަ ދުވަސްކޮޅުގަ އަތުވެއްޖެ(ރަށްރަށުން)، ތިމަންނަމެންނާ ނުލާ ތިޔަ (ފޯމު) ލައިގެން ނުވާނޭ" ސައިފް ވިދާޅުވިއެވެ.
އެންމެ މުހިންމު ކަމަކީ މީހުންގެ ބައިވެރިވުންކަން ފާހަގަ ކުރައްވައި ސައިފް ވިދާޅުވީ ޕާޓީ އުފެދުމުގައި ބައިވެރިވާން ބޭނުން ވެގެން ރަށްރަށުން އާއްމު ފަރާތްތަކުން ގުޅާ ކަމަށެވެ. އަދި އެގޮތަށް އެފަރާތްތަކުން އެދެމުންދާއިރު، އެ ފަރާތްތައް ނުހިމަނައި ފޯމު ނުލާނެކަމަށް ސައިފް ވިދާޅުވިއެވެ.
"އައްޑޫއާ ދިއްދޫއާ ފޯއްމުލަކާ ތުޅާދޫއާ ހުވަދޫއާ މިތަންތަން ނުލާ ކޮން ސިޔާސީ ޕާޓީއެއްތޯ ރާއްޖޭގަ ހެދޭނީ" ސައިފް ވިދާޅުވިއެވެ.
މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވައިގެން އުފައްދެވި ފިކުރެއްގެ ދިރުން ގޮފިން އުފައްދަން ނިންމާފައިވާ ޕާޓީ ކަމުގައިވާ "ދި ޑިމޮކްރެޓްސް" އުފެއްދުމުގެ ހުއްދަ އިލެކްޝަންސް ކޮމިޝަން (އީސީން) ދީފައި ވަނީ މިދިޔަ ބުދަ ދުވަހުއެވެ.
އެ ހުއްދަ ދެމުން އީސީން ބުނެފައި ވަނީ ޕާޓީއަށް މަދުވެގެން 3000 މެމްބަރުން ހަމަކުރުމަށްޓަކައި ތިން މަސް ލިބިގެންދާނެ ކަމަށާއި އެ އަދަދަށް މެމްބަރުން ހަމަ ކުރުމުން ޕާޓީ އުފެއްދުމަށް ބާއްވާ ބައްދަލުވުމަށް އެ ޕާޓީއަށް ދައުވަތު ދޭނެ ކަމަށެވެ.
Advertisement
This content is created and paid for by advertisers and does not involve Voice Journalists
