މާލެ ވޯޓަރ އެންޑް ސްވަރޭޖް ކޮމްޕެނީ ލިމިޓެޑްގެ ބޯޑުގެ ޗެއަރމަން އަދި މެންބަރުކަމުގެ މަޤާމުގައި އަހްމަދު މައުސޫމް އެ މަގާމުން އިސްތިއުފާ ދެއްވައިފިއެވެ.
މައުސޫމް އިސްތިއުފާ ދެއްވިކަން ޔަގީންކޮށްދެއްވަމުން ޕްރައިވެޓައިޒޭޝަން އެންޑް ކޯޕަރޭޝަން ބޯޑުން ބުނީ މައުސޫމް އިސްތިއުފާ ދެއްވަން ހުށަހަޅާފައި ވަނީ މިދިޔަ އާދީއްތަ ދުވަހު ކަމަށެވެ.
މައުސޫމްގެ އިސްތިޢުފާ އެ ބޯޑުން ޤަބޫލުކޮށް، އެ ތާރީހުން ފެށިގެން މާލެ ވޯޓަރ އެންޑް ސްވަރޭޖް ކޮމްޕެނީ ލިމިޓެޑްގެ ބޯޑުގެ ޗެއަރމަން ކަމުންނާއި ބޯޑުގެ މެންބަރުކަމުން މައުސޫމް ވަކިކޮށްފައިވާ ކަމަށާއި މަގާމުގައި ހުންނަވައިގެން މައުސޫމް، ކުންފުންޏަށް ކޮށްދެއްވި ޚިދުމަތްތައް ޝުކުރުވެރިކަމާއެކު ބަލައިގަންނަ ކަމަށް ފެންކުންފުނި ބޯޑުން ބުންޏެވެ.
ވެރިކަން ކުރާ އެމްޑީޕީ އިން ވަކިވެ އަލަށް އުފެއްދުމަށް މަސައްކަތް ކުރަމުން އަންނަ "ދަ ޑިމޮކްރެޓްސް" އަށް މައުސޫމް ސޮއިކުރެއްވީވެސް މި ހަފްތާގެ ތެރޭގައެވެ.
މައުސޫމް ވަނީ "ދަ ޑިމޮކްރެޓްސް" އަށް ސޮއި ކުރައްވާ މެންބާޝިޕް ފޯމް އެ ޕާޓީ އުފެއްދުމުގެ ހުއްދައަށް އެދިވަޑައިގެންނެވި ހަސަން ލަތީފަށް ހަވާލު ކުރައްވާފަ އެވެ.
މައުސޫމް އެމްޑީޕީގައި އެންމެ ފަހުން އަދާކުރައްވާފައިވާ މަގާމަކީ އެމްޑީޕީގެ ޤައުމީ މަޖިލީހުގައި މަކުނުދޫ ދާއިރާ ތަމްސީލް ކުރައްވާ އެ ދާއިރާގެ ރައީސް ކަމެވެ.
Advertisement
This content is created and paid for by advertisers and does not involve Voice Journalists
