މަސްވެރިއެއްގެ ލޮލަށް ބުޅިއެއް ހެރިގެން އެމްއެންޑީއެފްއިން އެހީތެރިކަން ފޯރުކޮށްދީފިއެވެ.
އެމްއެންޑީއެފްއިން ބުނީ، ބުޅި ހެރިފައި ވަނީ މަސްވެރިކަމަށް ނުކުމެ އުޅުނު "ސަމަކް" ނަމަކަށް ކިޔާ މަސް ދޯނީގައި ހުރި ފަޅުވެރިޔެއްގެ ލޮލަށް ކަމަށެވެ.
އަދި އަވަސްފަރުވާއަށް އެމީހާ ހޮސްޕިޓަލަށް ގެންދިއުމަށްޓަކައި އެމްއެންޑީއެފް ސަދަން އޭރިއާ ކޮމާންޑް ކޯސްޓްގާޑު ފޯތު ސްކޮޑްރަންއިން އެހީތެރިކަން ފޯރުކޮށްދީފައި ވާކަމަށެވެ.
މަސްވެރިކަން ކުރަމުން ދަނިކޮށް ފަޅުވެރިއެއްގެ ލޮލަށް ބުޅިއެއްހެރި އަވަސް ފަރުވާބޭނުންވާ ކަމުގެ މަޢުލޫމާތު ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ މިއަދު މެންދުރު ކަމަށް އެމްއެންޑީއެފްއިން ބުންޏެވެ.
މައުލޫމާތު ލިބުމާއެކު އެމްއެންޑީއެފް ސަދަން އޭރިއާ ކޮމާންޑް ކޯސްޓްގާޑު ފޯތު ސްކޮޑްރަންއިން، ސީ އެމްބިއުލާންސްގައި ބަލިމީހާ ވަނީ ގއ.ވިލިނގިލީ ހޮސްޕިޓަލަށް ގެންގޮސްދީފައެވެ.
މަސްވެރިންގެ ލޮލަށް ބުޅި ހެރުމަކީ މިފަހުން އާއްމުކޮށް ހިނގާ ހާދިސާއެކެވެ. އޭގެ ސަބަބުން މަސްވެރިންނަށް ބައެއް ފަހަރު އުމުރު ދުވަހަށް އެކަމުގެ އަސަރު ހުންނަ ފަދަ ހާލަތްތައްވެސް ދިމާވެފައިވެއެވެ.
Advertisement
This content is created and paid for by advertisers and does not involve Voice Journalists
