ދިވެހިރާއްޖޭގައި ދީނީ ހޭލުންތެރިކަން އިތުރުކުރުމަށް ބުރަ މަސައްކަތްތަކެއް ކޮށްދެއްވައި ދީނަށް ގިނަ ޚިދުމަތްތަކެއް ކޮށްދެއްވާފައިވާ ޝައިޚް މުޙައްމަދު އިބްރާހީމް، ނައިފަރީގެ ސިކުނޑީގެ ބޮޑު އޮޕަރޭޝަނެއް ކުރަން ތައްޔާވެއްޖެއެވެ. 

ޝެއިޚްގެ ޢާއިލާ އާއި ހަވާލާދީ ހެޔޮ އެދޭ ފަރާތަކުން "ވޮއިސް" އަށް މައުލޫމާތު ދެއްވި ގޮތުގައި، ޝެއިޚްގެ ހާލު ގޯސްވެގެން އެންމެ ފުރަތަަމަ ފަރުވާ ކުރެވުނީ ޅ. އަތޮޅު ހޮސްޕިޓަލުގައެވެ. އެއަށްފަހު އިތުރު ފަރުވާއަށް މާލެ ފޮނުވާލައި އައިޖީއެމްއެޗްގައި ވެސް ވަނީ ފަރުވާ ދީފައެވެ. 

އަދި ޝެއިޚްގެ ސިކުނޑީގައި ޓިޔުމަރެއް ހުރިކަން އެނގި އެ ޓިޔުމަރު ނެގުމަށް އޮޕަރޭޝަން ކުރަންޖެހޭތީ އިއްޔެގެ ވަގުތެއްގައި ވަނީ އޭޑީކޭ ހޮސްޕިޓަލަށް ޓްރާންސްފާ ކޮށްފައެވެ. އެއަާއެކު އޭޑީކޭގެ ނިއުރޯ ސާޖަން ޑރ. ޢަލީ ނިޔާފްގެ ޓީމުން މިހާރު ޝެއިޚްގެ އޮޕަރޭޝަނަށް ތައްޔާރުވަމުންދާއިރު, މިހާރު ކުރެވެމުންދަނީ އޮޕަރޭޝަންގެ ކުރިން ހަދަންޖެހޭ ޓެސްޓްތަކުގެ މަސައްކަތް ކަމަށް ޢާއިލާ އާއި ހަވާލާދީ އެ ފަރާތުން މައުލޫމާތު ދެއްވައެވެ. އަދި ޝެއިޚް މިވަގުތު އޮތީ ހައި ޑިޕެންޑެންސީ ޔުނިޓް (އެޗްޑީޔޫ) ގައި ކަމަށްވެސް މައުލޫމާތު ލިބިފައިވެއެވެ. 

ޝެއިޚްގެ އޮޕަރޭޝަން މިއަދުގެ ވަގުތެއްގައި ކުރުމަށް ނިންމާފައިވާއިރު، ސިކުނޑީގެ މި އޮޕަރޭޝަނަކީ 50/50 ގެ އޮޕަރޭޝަނެއްކަން ފާހަގަ ކޮށްލަން ޖެހެއެވެ. އެހެން ކަމުން ޝެއިޚަށް މި ވަގުތު އެންމެ ބޭނުންވާނީ އެންމެންގެ ހެޔޮދުޢާއެވެ. މާތް الله ޝެއިޚަށް ކެތްތެރިކަންދެއްވާ އަވަސް ޝިފާއެއް ދެއްވުމަށް އެދި ހުރިހާފަރާތްތަކުންވެސް ދުޢާކޮށްދިނުމަކީ ޝެއިޙަށްޓަކައި ކޮށްދެވޭނެ އެންމެ މުހިންމުކަންތަކެވެ.

أسأل الله العظيم رب العرش العظيم أن يشفيه ... أذهبِ البأسَ واشفِ أنت الشافِي لا شفاءَ إلا شفاؤُك، شفاءً لا يُغادرُ سَقمًا.

آمين

ޝެއިޚް މުޙައްމަދު އިބްރާހިމް (ނައިފަރީ) އަކީ ދީނީ ގޮތުން ދިވެހިން ހޭލުން ތެރިކުރުވުމަށް ރެއާއި ދުވާލު އަދި މިހާރުވެސް ބުރަ މަސައްކަތް ކުރަމުންގެންދަވާ ފަރާތެކެވެ. ލޮލުގެ ފެނުން ދަށްވުމުގެ ސަބަބުން 2022 ވަނަ އަހަރުގައި ލޮލޮގެ ދެ ސާޖަރީއެއް ހެދުމަށް ރާއްޖެއިން ބޭރަށް ވަޑައިގަތް ނަމަވެސް ޝެއިޚްގެ ދީނީ ދައުވަތު ދިނުމަށް ދެގޮތެއްނުވެއެވެ. 

ދީނީ ގޮތުން ދިވެހިން ހޭލުންތެރިކުރުމަށްޓަކައި އެތައް ދަރުސްތަކެއް ދެއްވައެވެ. ޚާއްސަކޮށް ތައުހީދާއި ގުޅިގެން ދީފައިވާ ގިނަ ގުނަ ދަރުސްތަކުން އެތައް ބަޔަކަށް ފައިދާ ކޮށްފައިވާނެ ކަމީ ޝައްކެއްވެސް އޮތް ކަމެއްނޫނެވެ.

ދަރުސް ތަކުގެ އިތުރުން ޝެއިޚް ވަނީ ދިވެހިބަހުން އެތަކެއް ފޮތްތަކެއް ލިޔުއްވިއެވެ. ޙިސްނުލް މުސްލިމް، ކިތާބުއް ޞިޔާމު، ނަބީބޭކަލުންގެ ތަރިކަ، ތައުޙީދުގެ ޚުލަސާ، ކިތާބުއް ޞަލާތު ފަދަ މުހިންމު އެތައްފޮތެއް ދިވެހިބަހުން ލިޔުއްވާފައިވެއެވެ.

ޝެއިޚް ލިޔުއްވާފައިވާ ބައެއް ފޮތްތައް-- ފޮޓޯ/ އަލް އަސްރު

މިނޫންވެސް ޝެއިޚް ނައިފަރީ، ދީނީ އެކިއެކި މުހިންމު މައުޟޫއު ތަކަށް ލިޔުއްވާފައިވާ އެކި ފޮތްތަކާއި ޝެއިޚްގެ ގިނަ ދަރުސްތައް އަންނަނިވި ލިންކުން ލިބޭނެއެވެ. 

https://drive.google.com/drive/mobile/folders/1zZI_uZJU3moqz5iNb6b8o_T0mMQFwOpV