ވިލާ ކޮލެޖްގެ ބިޒްނަސް ސޮސައިޓީ އަދި ފެކަލްޓީއޮފް ބިޒްނަސް މެނޭޖްމަންޓް ގުޅިގެން ކުރިއަށް ގެންދިޔަ ބިޒްނަސް ފެސްޓިވަލް ކާމިޔާބު ކަމާއެކު ނިންމާލައިފިއެވެ.

މިދިޔަ އާދީއްތަ ދުވަހު ކުރިއަށްދިޔަ މި ފެސްޓިވަލް ހުޅުވައިދެއްވީ ވިލާ ކޮލެޖްގެ ޑެޕިއުޓީ ވައިސް ރެކްޓަރ-ރިސަރޗް އެންޑް އިނޮވޭޝަން ޑރ. މުހައްމަދު އާދިލެވެ. މީގެ އިތުރުން، ހުޅުވުމުގެ ރަސްމިއްޔާތުގައި ފެކަލްޓީއޮފް ބިޒްނަސް މެނޭޖްމަންޓްގެ ޑީން އަބްދުالله ނާފިޒްއާއި ކޮލެޖްގެ އިސްވެރިން ބައިވެރިވެ ވަޑައިގެންނެވިއެވެ.

މި ފެސްޓިވަލްއަށް 300 އަށްވުރެ ގިނަ މީހުން ޒިޔާރަތް ކުރި ކަމަށް ވިލާ ކޮލެޖްގެ ބިޒްނަސް ސޮސައިޓީން މައުލޫމާތުދެއެވެ.

Advertisement

މިފަދަ ފެސްޓިވަލްއެއް ބޭއްވުމުގެ މައިގަނޑު މަގުސަދުގެ ތެރޭގައި ޒުވާނުން ވިޔަފާރި ކުރުމަށް ބާރުއަޅައި އެފަދަ ޕްލެޓްފޯމެއްގައި ކުދި ވިޔަފާރިތައް އިސްތިހާރު ކުރުމުގެ ފުރުސަތު ތަނަވަސްކޮށްދީ އިންވެސްޓަރުން ހޯދުމަށް މަގުފަހި ކުރުން ހިމެނޭ ކަމަށް ވިލާ ކޮލެޖްގެ ބިޒްނަސް ސޮސައިޓީގެ ރައީސް މޫސާ މީކާއިލް ވިދާޅުވިއެވެ.

އެގޮތުން މިއީ އެކަމަށް އެޅުނު ރަނގަޅު ބިންގަލެއް ކަމަށް މީކާއިލް ވިދާޅުވިއެވެ.

ވިލާ ކޮލެޖްގެ ބިޒްނަސް ފެސްޓިވަލްގެ ތެރެއިން -- ފޮޓޯ/ ވިލާ ކޮލެޖް

ވިލާ ކޮލެޖް ބިޒްނަސް ސޮސައިޓީގެ ނައިބުރައީސް އަހުމަދު އުވައިސް މުހައްމަދު ވިދާޅުވީ، މި ފެސްޓިވަލަށް އާއްމުން އަދި ޕާޓްނަރުންގެ ފަރާތުން ލިބުނު ބޮޑު ތަރުހީބަށް ބަލައި، މިފަދަ އިތުރު ބިޒްނަސް ފެސްޓިވަލެއްތަކެއް ކުރިއަށް އޮތް ތަނުގައި ބޭއްވުމަށް ގަސްދުކުރާ ކަމަށެވެ.

ބިޒްނަސް ފެސްޓިވަލް ނިންމުމުގެ ރަސްމިއްޔާތުގައި "ބެސްޓް ބިޒްނަސް އައިޑިއާ"، "ބެސްޓް ޕްރެޒެންޓަރ" އަދި "ބެސްޓް ނިއު ޕްރޮޑަކްޓް ކޮންސެޕްޓް" ހާސިލް ކުރި ދަރިވަރުންނާއި ގުރޫޕްތަކަށް އެވޯޑް ހަވާލުކޮށްފައި ވެއެވެ. އަދި ބޮޑީޓެކްގެ ފަރާތުން މި ފެސްޓިވަލްއަށް ހަދިޔާ ކުރި، ހަ މަސްދުވަހުގެ މެމްބަރޝިޕް ލިބޭ ފަރާތްވެސް ހޮވާފައިވެއެވެ.