އއ. އުކުޅަހު ބަނދަރުގައި އޮވެ ރާ ވިއްކާ ކަމަށް ތުހުމަތު ކުރެވޭ ސަފާރީ ފަޅުން ނެރުމަށް އެ ރަށު ކޯޓުން އަމުރުކޮށްފައި ވަނިކޮށް، އަނެއްކާވެސް އެ ސަފާރީ އެރަށު އިހުތިސޯސަށް ވަދެއްޖެއެވެ.

އުކުޅަހު ފަޅުން ބޭރުގައި އޮތް އިރުވެސް ރާ ވިއްކާ ކަމަށް މީގެ ކުރިން ތުހުމަތު ކުރެވިފައިވާ "ޒެޑް ކުރޫޒާ" ނަމަކަށް ކިޔާ މި ސަފާރީ މަރާމާތަށް ކަމަށް ބުނެ އެ ރަށު ބަނދަރަށް ވައްދާފައިވަނީ މިދިޔަ މަހުގެ 2 ވަނަ ދުވަހުގެ ރޭގައި ކަމަށް އުކުޅަހު ކައުންސިލްގެ ރައީސް ޝައުކަތު އިބްރާހިމް ވަނީ ވޮއިސް އަށް މައުލޫމާތު ދެއްވާފައެވެ.

އަދި އެ ސަފާރީ ބަނދަރަށް ވައްދާފައިވަނީ ކައުންސިލުން ހުއްދަ ނުވެސް ދެނިކޮށް ކަމަށާ، އެއިން ރަށަށް ރާ ވިއްކާ ކަމަށް އެރަށު ރައްޔިތުން ތުހުމަތު ކުރާ ކަމަށްވެސް އޭނާ ވިދާޅުވި އެވެ. 

Advertisement

އަދި އެ ސަފާރީ މީގެ ކުރިން ފަޅުން ބޭރުގައި އޮތް އިރުވެސް ވަރަށް ފާޅުކަން ބޮޑުކޮށް ރާ ވިއްކުމުގެ ކަންކަން ކުރިކަން އޭނާ އާއި އެރަށުގެ މީހުންނަށްވެސް އެނގޭކަން ކައުންސިލް ރައީސް ވަނީ ރައްޔިތުންނާއިއެކު ބޭއްވުނު ބައްދަލުމުގައި ފާހަގަކުރައްވާފައެވެ.

އެ މައްސަލާގައި ރައްޔިތުން ކަންބޮޑުވުން ފާޅުކޮށް އެ މައްސަލަ ކައުންސިލާއިވެސް ހިއްސާ ކުރުމުން ކައުންސިލުން ވަނީ ސަފާރީ ފަޅުން ނެރުމުގެ އަމުރެއް ނެރެދިނުމަށް އެދިފައެވެ. 

އެއަށްފަހު ކޯޓުން އެ މައްސަލަ ބެލުމަށްފަހު، މިދިޔަ މަހުގެ 14 ވަނަ ދުވަހު ވަނީ 24 ގަޑި އިރުތެރޭގައި އެ ސަފާރީ ބަނދަރުން ނެރުމަށް އަމުރުކޮށްފައެވެ. އަދި މޫސުން ގޯސްވެ އެލާޓެއް ނެރެފި ނަމަ، އެލާޓްގެ ވަގުތު ހަމަވަންދެން ސަފާރީ ބަނދަރުގައި ބޭއްވުމުގެ ހުއްދަވެސް ކޯޓުން ވަނީ ދީފައެވެ. 

މިކަމާ ގުޅިގެން އުކުޅަހުން "ވޮއިސް"އާ ވާހަކަ ދެއްކި މީހުން ބުނީ، ކޯޓު އަމުރުގައި ވަނީ، އުކުޅަހު ކައުންސިލްއިން އެދުނު ގޮތަށް، އުކުޅަހު އިހްތިސޯސުން ބޭރަށް ސަފާރީ ނެރުމަށް ފުލުހުންނަށް އަމުރު ކޮށްފައި ކަމަށެވެ.

ނަމަވެސް ކަނޑު ގަދަވާކަމަށް ބުނެ، އިއްޔެ މެންދުރުން ފެށިގެން ސަފާރީ އޮތީ ދަރުމައްޗަށް ނަގިލި އެއްލައި ބަނދަރުކޮށްގެން ކަމަށް އެރަށުން ވާހަކަދެއްކި މީހުން ބުންޏެވެ.

އެރަށު މީހުންގެ ޝަކުވާއަކީ ކޯޓު އަމުރު އޮތްއިރުވެސް ސަފާރީ ނެރުމަށް ފުލުހުން މަސައްކަތް ނުކުރުމެވެ.

ބައިނަލްއަގުވާމީ ތިމާވެށީގެ ދުވަސް ރާއްޖޭގައި ފާހަގަ ކުރުމަށް ހޯމަ ދުވަހު ރައީސް އިބްރާހިމް މުހައްމަދު ޞާލިހު އުކުޅަހަށް ދިއުމަށް ހަމަޖެހިފައިވާއިރު، ރައީސް ވަޑައިގަތުމުން މި މައްސަލައިގައި ރައްޔިތުން ސޮއިކުރަމުންދާ ޕެޓިޝަން ރައީސްއަސް އެރުވުމަށް އެރަށު އާއްމުން ދަނީ ތައްޔާރު ވަމުންނެވެ.