ކުރިއަށް އޮތް އަޟުހާ ޢީދުގައި، އުޟުހިޔާ ކަތިލުމުގެ ސުންނަތް ހެޔޮ އަގުގައި އަދާކުރުމުގެ ފުރުސަތު އިންޓަރނޭޝަނަލް އެއިޑް ކެންޕެއިން (އައިއޭސީ) އިން ހުޅުވާލައިފި އެވެ.

ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ މުސްލިމުންނަށް އެހީވުމުގެ މަސައްކަތް ކުރަމުންދާ އައިއޭސީން ބުނީ، އެ ޖަމިއްޔާގެ ގަނޑުކުރި އުޟުހިޔާ ބެހުމުގެ ޕްރޮގްރާމްގެ ދަށުން، އުޟުހިޔާގެ ޖަނަވާރުތައް އަގު ހެޔޮކޮށް ލިބި، އޭތި ކަތިލެވޭ ގައުމެއްގައި އިސްލާމީ އުސޫލުތަކުން ކަތިލުން ޝަރުޢުވެގެންވާ އުމުރު، ސިއްހަތު އަދި ބަރުދަނުގެ ބަކަރި/ ކަންބަޅި ނުވަތަ ގެރި، އިސްލާމީ އުސޫލުން ކަތިލައި ގަނޑުކުރުމަށްފަހު، ނިކަމެތި ފަގީރު ގައުމުތަކަށް އެތަކެތި ކާގޯ ބޯޓެއްގައި ޝިޕް ކުރެވި ރެފިއުޖީންނަށާއި، ފަގީރުންނަށް ބެހިގެންދާނެ ކަމަށެވެ. 

އައިއޭސީން ބުނީ، ގަނޑުކުރި އުޟުހިޔާ ކަތިލުންވެސް އޮންނާނީ އަޟުހާ ޢީދުގެ ދުވަސްތަކުގެ ތެރޭގައި ކަމަށެވެ. އެއީ ހައްޖު މަހުގެ 10 ވަނަ ދުވަހުން ފެށިގެން 12 ވަނަ ދުވަހުގެ އިރުއޮއްސުމާއި ދެމެދުގައި ހިމެނޭ 3 ދުވަހުގެ މުއްދަތުގައި ކަމަށާ، އަދި އުޟުހިޔާގެ މަސް ކަނޑުމަގުން ފޮނުވޭނެތީ، ފަގީރުންނާއި ހަމަޔަށް އެތަކެތި ފޯރާން ގާތްގަނޑަކަށް 60 ދުވަސް ނަގާނެ ކަމަށް އައިއޭސީން މައުލޫމާތު ދެއެވެ.  

Advertisement

މިއީ މިފަދަ ޕްރޮގްރާމެއް ހިންގާ ދެވަނަ ފަހަރު ކަމަށްވާއިރު، މީގެ ކުރިންވެސް މި ޕްރޮގްރާމްގެ އެހީގައި ނިކަމެތި ފަގީރުންނަށާއި ރެފިއުޖީންނަށް އުފާވެރިކަން ގެނެސްދެވިފައިވާ ކަން އައިއޭސީން ފާހަގަކުރެއެވެ. 

މިފަދައިން އުޟުހިޔާ ކަތިލުމުން މައިގަނޑު ތިންކަމެއް އެބަ ހާސިލްވެއެވެ.

🔸ޞަދަޤާތް ކުރުމުގެ އުފާ ލިބުން.

🔸 އުޟްޙިޔާގެ އަޅުކަން އަދާކުރެވުން.

🔸މަސްކޮޅެއް ނުލިބޭ ނިކަމެތިންނަށް އެ ކާންދެވުން.

އައިއޭސީއާއި އެކު އުޟްޙިޔާ ކަތިލުމަށް ބޭނުންވާ ފަރާތްތަކުން އަންނަނިވި ލިންކުގައިވާ ފޯމް ފުރާލުމަށް އެ ޖަމިއްޔާއިން އެދެއެވެ.

https://forms.gle/bvkfntjscN4gTExt8

މިޕްރޮގްރާމްއާއި ބެހޭ އިތުރު މައުލޫމާތު އެ ފޯމުންވެސް ލިބިގެންދާއިރު އިތުރު މައުލޫމާތު ބޭނުންވާނަމަ  9122121 އަށް ގުޅާލުމުން ނުވަތަ އެފްބީ/އިންސްޓައަށް މެސްޖު ކޮށްލުމުންވެސް ލިބިގެންދާނެ ކަމަށް އެ ޖަމިއްޔާއިން ބުނެއެވެ. 

އައިއޭސީގެ ޕްރޮޖެކްޓް އަގުތައް ހެދިފައިވަނީ ޕްރޮޖެކްޓް ހިންގުމާއި ބެލެހެއްޓުމާއި، ދެމެހެއްޓުމާއި، އިދާރީ ހިންގުމާއި ތަރައްގީއަށް ދާނެ ކަމަށް ލަފާކުރެވޭ ޚަރަދުތައް ހިމެނޭގޮތަށް އެވަރެޖް 12.5 ޕަސެންޓު ހިމެނޭގޮތަށް ކަމަށް އެ ޖަމިއްޔާ އިން ބުނެއެވެ.