އަވަށްޓެރި އިންޑިޔާގައި ތިން ރޭލު މުޑިއަރައި ނުރައްކާތެރި އެކްސިޑެންޓެއް ހިނގައި ގިނަ ބަޔަކު މަރުވެއްޖެއެވެ.

މިއެކްސިޑެންޓް ހިނގައިފައިވަނީ ހުކުރުދުވަހު އިންޑިޔާގެ އިރުމަތީގައި އޮންނަ އޮޑިޝާ ސްޓޭޓްގައެވެ. މިހާދިސާގައި މިހާތަނަށް 233 މީހުން މަރުވެފައިވާކަމަށް އަލްޖަޒީރާގައި ބުނެފައިވެއެވެ. އަދި ޒަޚަމްވީ މީހުންގެ ޢަދަދު 900 އަށްވުރެ މަތިވެފައިވާ ކަމަށްވެސް އަލްޖަޒީރާގައި ބުނެފައިވެއެވެ.

އޮޑިޝާގެ އިސް އޮފިޝަލަކު ބުނެފައިވަނީ މިހާދިސާގައި މަރުވާ މީހުންގެ ޢަދަދު އަދިވެސް ދާނީ މައްޗަށް ކަމަށް ލަފާ ކުރެވޭ ކަމަށެވެ.

ހާދިސާ ހިނގައިގެން އުޅޭ ސަރަހައްދަށް 200 އެމްބިޔުލާންސާއި ކުއްލި ފަރުވާ ދިނުމަށް 100 ޑޮކްޓަރުން ގެނައުމަށް ހަމަޖެހިފައިވާއިރު 80 ޑޮކްޓަރުން ވަނީ އެތަނަށް ގޮސް ޒަޙަމްވި މީހުންނަށް ފަރުވާ ދޭން ފަށައިފައެވެ.

އިންޑިޔާގެ ސިފައިންނާއި އެއަރ ފޯސްގެ ހެލިކޮޕްޓަރުތަކުންވެސް މިހާރު ވަނީ މީހުން ސަލާމަތްކުރުމުގެ މަސައްކަތުގައި ބައިވެރިވެފައެވެ.

މިހާދިސާ ހިނގައިފައިވަނީ ހުކުރުދުވަހުގެ ހެނދުނު 7:00 ހާއިިރުއެެެވެ.

އިންޑިޔާގެ ހަވްރާ އިން ބެންގަލޫރަށް ދަތުރު ކުރި ރޭލަކާއި، ކޮލްކަތާއި އިން ޗެންނާއީ އަށް ދަތުރު ކުރަމުންދިޔަަ ދެ ރޭލު ޖެހި، އެކްސިޑެންޓް ވެފައި ވަނިކޮށް ތިންވަނަ ރޭލެއް ވަނީ އެދެރޭލުގައި ޖެހިފައެވެ.

 މިހާދިސާ ހިނގި ގޮތާއި މެދު ސުވާލު އުފެދިފައި ވާއިރު އިންޑިޔާގެ ނޫސްވެރިޔަކު އަލްޖަޒީރާއަށް ބުނެފައިވަނީ އެކަން ހިނގިގޮތް އެއްވެސް މީހަކަށް ނޭނގޭ ކަމަށެވެ. އަދި ރޭލު ދުއްވަމުންދިޔައީ 100ކިލޯމީޓަރުގައި ކަމަށެވެ. އަދި ހާދިސާގެ ނުރައްކާތެރިކަން ބޮޑުވެގެންދިޔައީ ފުރަތަމަ ޖެހުނު ދެރޭލު ޖެހިގެން ނޫން ކަމަށާއި ތިންވަނަ ރޭލުގެ ސަބަބުން ކަމަށް ނޫސްވެރިޔާ އަލްޖަޒީރާއަށް ބުނެފައިވެއެވެ.

ހާދިސާގައި މަރުވި މީހުންގެ އާއިލާތަަކަށް އިންޑިޔާގެ ބޮޑުވަޒީރު ނަރެންދްރަ މޮދީ ވަނީ ތައުޒިޔާ ފޮނުއްވައިފައެވެ. އަދި ހާދިސާގައި މަރުވި މީހުންގެ އާއިލާތަކަށް އެހީތެރިކަން ފޯރުކޮށްދިނުމަށް ރެއިލްވޭ ތަކާއި ބެހޭ މިނިސްޓަރ އަޝްވިނީ ވައިޝްނަވް އަށް މޯދީވަނީ އަންގަވައިފައެވެ.

ރެއިލްވޭ ތަކާއި ބެހޭ މިނިސްޓަރ ވަނީ ހާދިސާގައި މަރުވި މީހުންގެ އާއިލާތަކަށް 12 ހާސް ޔޫއެެސް ޑޮލަރު، އަނިޔާވި ކޮންމެ މީހަކަށް 2400 ޑޮލަރު އަދި ކުޑަ އަނިޔާއެއް ލިބުނު މީހަކު ނަމަ އެމީހަކަށް 600 ޑޮލަރު ސަރުކާރުން ދިނުމަށް ނިންމާފައިވާކަން އިއުލާނު ކޮށްފައެވެ.

ހާދިސާ ހިނގި ސަރަހައްދުގައި މީހުން ސަލާމަތް ކުރުމުގެ މަސައްކަތުގައި އިންޑިޔާގެ ސިފައިންނާއި ފުލުހުން، އެއަރ ފޯސް އަދި ފަޔަރ އެންޑް ރެސްކިޔު ފަދަ ހުރިހާ މުއައްސަސާ އަކުންވެސް ދަނީ ހަރަކާތްތެރިވަމުންނެވެ. ރެސްކިޔު ޓީމް ތަކުން ލަފާކުރަނީ މަރުވި މީހުންގެ ޢަދަދު މަތިވެގެން ހިނގައިދާނެ ކަމަށެވެ.