ފަލަސްޠީނުގެ 2 އަހަރުގެ ތުއްތު ކުއްޖެއްގެ ބޮލަށް އިޒްރާއިލް ސިފައިން ބަޑި ޖަހައި ޒަޚަމް ކޮށްލައިފިއެވެެ.

އުމުރުން 2 އަހަރުގެ މުޙައްމަދް ތަމީމީ އަށް އިޒްރާއިލް ސިފައިން  ހަމަލާދިފައިވަނީ ރާމައްاللهގެ އިރުއުތުރުން އޮންނަ ނަބީ ސަލާހް ކިޔާ އަވަށުގައި، އޭނާގެ ބައްޕަ އާއި އެކު ކާރުގައި ދަތުރު ކޮށްފައި ދަނިކޮށެވެ. އިޒްރާއިލް ސިފައިންގެ މި ޙަމަލާ ތަކުގައި މުޙައްމަދުގެ ބައްޕަ އަށް ވެސް ވަނީ އެކިވަރުގެ އަނިޔާ ލިބަފައިވެއެވެ.

އިޒްރާއިލް ސިފައިން ދިން ބަޑީގެ ހަމަލާތަކުގެ ތެރެއިން ވަޒަނެއް ވަނީ މުޙައްމަދުގެ ބޮލަށް އަރައިފައެވެ. ބޮލަށް ލިބުނު އަނިޔާ އާއި ގުޅިގެން މުޙައްމަދުގެ ޙާލު ވަނީ ވަރަށް ބޮޑަށް ގޯސްވެފައެވެ. އަދި އޭނާއަށް ދަނީ ހޮސްޕިޓަލުގައި ފަރުވާދެވެމުންނެވެ.

Advertisement

އަލްޖަޒީރާގައި ބުނެފައިވަނީ  އިޒްރާއިލްގެ މި ހަމަލާއަކީ އެމީހުން ރާވައިގެން ކުއްލިއަކަށް ހަމަލާދޭ އުސޫލުގެ ދަށުން އިޒްރާއިލް ސިފައިން ދިން ހަމަލާއެއް ކަމަށެވެ.

ފަލަސްޠީނުގެ ވަފާ ނޫހަށް ހަވާލަދެމުން އަލްޖަޒީރާގައި ބުނެފައިވަނީ އިޒްރާއިލް ސިފައިން ހަމަލާތަކުގެ ކުރިން ނަބީ ސަލާހް އަވަށަށް ވަދެ ނުކުމެވޭ ދޮރު ބަންދުކުރި ކަމަށެވެ. އަދި އެސަރަހައްދުން ދުއްވަމުން ދިޔަ ކާރަށް ބަޑީގެ ހަމަލޭ ދޭން ފެށި ކަމަށެވެ. އަދި އެކާރުން ދަތުރު ކުރަމުން ދިޔަ ކުޑަ ކުއްޖަކު ވަރަށް ބޮޑަށް ޒަޚަމްވީ ކަމަށް ވަފާ އަށް މަޢުލޫމާތު ދިން މީހަކު ބުނެފައިވާކަމަށް އަލްޖަޒީރާގައި ބުނެފައިވެއެވެ.

އިޒްރާއިލް ސިފައިން ބުނެފައިވަނީ އެމީހުން ބަޑީގެ ހަމަލާދިނީ އެމީހުންނަށް ހަމަލާދިން މީހެއްގެ ހަމަލާތަކުން ދިފާޢު ވުމަށް ކަމަށެވެ.
އިޒްރާއިލުން ނެރެފައިވާ ބަޔާނެއްގައި ބުނެފައިވަނީ ހަތިޔާރު ނެތް ކުޑަ ކުއްޖަކަށް ހަމަލާދެވިފައިވާތީ ހިތާމަކުރާކަމަށެވެ.

2023 ފެށުނު ފަހުން އިޒްރާއިލްގެ އަނިޔާވެރި ހަމަލާތަކުގެ ސަބަބުން ފަލަސްޠީނުގެ 158 މީހަކު ވަނީ ޝަހީދުވެފައެވެ. އޭގެ ތެރޭގައި 26 ކުޑަކުދިން ވެސް ހިމެނެއެވެ.