އެފްރިކާގައި ހިފަހައްޓާފައި އޮތް ފިއުލްސަޕްލައި މޯލްޑިވްސް (އެފްއެސްއެމް)ގެ ދެ ބޯޓުގައި ތިބި ހަތަރު ދިވެހި ފަޅުވެރިން ރާއްޖެ ގެނެސްފިއެވެ.
އެފްއެސްއެމްގެ ދެ ތެޔޮ ބޯޓު 'ރާބުޅު' އާއި 'މާހެލި' އެފްރިކާގެ އެރިޓްރިއާގައި ހިފެހެއްޓީ ހުއްދަ ނުހޯދައި ބަނދަރު ކުރުމުންނެވެ.
އޭރު ބޯޓުގައި ހަތަރު ދިވެހިންނާއި މިސްރުގެ ހަތަރު މީހުން ތިއްބެވެ. އެފްރިކާގައި ބޯޓު ހިފެހެއްޓުމާ ގުޅިގެން އެފްއެސްއެމްއާއި ފޮރިން މިނިސްޓްރީގެ އޮފިޝަލުން ހިމެނޭ ޓީމެއް ވަނީ އެރިޓްރިއާއަށް ގޮސްފައެވެ.
އަދި ކުރެވުނު މަސައްކަތްތަކުން، ދެ ބޯޓު ދޫކޮށްލާފައި ނުވި ނަމަވެސް، މިސްރު ހަތަރު މީހުން އެމީހުންގެ ގައުމަށް ފޮނުވާލައި، ދިވެހި ފަޅުވެރިން ވަނީ އަނބުރާ ރާއްޖެ ގެނެވިފައެވެ.
ރާބުޅާއި މާރެހި ބޯޓަކީ މިސްރުގައި ބަނދެ، އޭޕްރީލްގެ ތެރޭގައި ދަތުރު ކުރަން ފެށި ދެ ބޯޓެވެ. އެ ބޯޓުގައިވެސް 250 ހާސް ލީޓަރުގެ ކެޕޭސިޓީ ހުރެއެވެ.
ދެ ބޯޓު ރާއްޖެއައި ދަތުރުމަތީގައި މޫސުން ގޯސްވެ، އެރިޓްރިއާގައި ބަނދަރު ކުރުމުގެ ހުއްދައަކަށް އެދުނީއެވެ. ނަމަވެސް ހުއްދަ ލިބުމުގެ ކުރިން ބޯޓުތައް ވަނީ އެރިޓްރިއާގައި ބަނދަރުކޮށްފައެވެ.
Advertisement
This content is created and paid for by advertisers and does not involve Voice Journalists
