އިދިކޮޅު ކަނޑު ވިއްކުމާއި ދެކޮޅު އިއްތިހާދުން ރައްޔިތުންގެ މަޖިލީހަށް ހުށަހެޅި ބަންޑާރަ ނާއިބު އިބްރާޙީމް ރިފްޢަތުގެ އިތުބާރު ނެތް ކަމުގެ މައްސަލަ މަޖިލީހުގެ ތަޅުމުގައި ހުށަނާޅުއްވައިގެން މަޖިލިސް ހޫނުވެ މެދު ކަނޑާލަން ޖެހިއްޖެއެވެ. 

ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް ބުނެ ގުޅިފައިވާ އިއްތިހާދުން މަޖިލީހަށް ހުށަހެޅި އޭނާގެ އިތުބާރު ނެތް ކަމުގެ މައްސަލަ އަށް ޖަވާބުދާރީ ވުމަށް ފާއިތުވި ހަފްތާގައި މަޖިިލީހަށް ވަޑައިގެންފައެއް ނުވެއެވެ. އެ ހަފްތާގައި އެ މައްސަލަ އެޖެންޑާ ކޮށްފައިވަނިކޮށް، ރިފްޢަތު ޖަވާބު ފޮނުއްވީ ލިޔުމަކުންނެވެ. 

އެއަށްފަހު މައްސަލަ ހޫނުވެ، ސްޕްރީމް ކޯޓާއި ހަމައަށްދާ ގޮތަށް މަޖިލީހުން ނިންމާފައިވަނިކޮށް، ރިފްޢަތު ވަނީ މަޖިލީހަށް ހާޒިރުވުމަށް ނިންމައި މަޖިލީހަށް އެކަން އަންގަވާފައެވެ. އެއާއެކު ރިފްޢަތުގެ އިތުބާރު ނެތް ކަމުގެ މައްސަލަ މަޖިލީހުގެ މިއަދުގެ އެޖެންޑާގެ ފުރަތަމަ ކަމަކަށް ވަނީ ތާވަލްކޮށްފައެވެ. 

Advertisement

އަދި މިއަދު މަޖިލީހުގެ ޖަލްސާ އަށް ރިފްޢަތު ވަނި ވަޑައިގެންފައެވެ.

ނަމަވެސް މިއަދުގެ މަޖިލިސް ފަށައި، ގުޅިފައިވާ އިއްތިހާދުގެ ފަރާތުން މަޑުއްވަރީ ދާއިރާގެ މެންބަރު އާދަމް ޝަރީފް އުމަރުގެ އަރިހުން މަޖިލީހުގެ ތަޅުމުގައި މައްސަލަ ހުށަހެޅުއްވުމަށް ރިޔާސަތުގައި އިންނަވައި، މަޖިލީހުގެ ރައީސް މުހައްމަދު ނަޝީދު އެދިލެއްވުމުން އޭނާ ވަނީ އެކަމަށް ދެކޮޅު ހައްދަވާފައެވެ. 

މިކަމުގައި ކުރިއަށް ދިޔުމުގެ ކުރިން އަޅުގަނޑުމެން ސާފުކޮށްލަން ބޭނުންވޭ، 500 މިލިއަން ޑޮލަރަށް ކަނޑުވިއްކާލި މައްސަލާގައި، ކުރީ ދުވަހު ވަޑައިނުގެންނެވީ ހަމަ ހަގީގަތުގައިވެސް ގޯސްކޮށް ހެއްދުވުނު ކަމެއްކަން ގަބޫލު ކުރައްވާފައިތޯ، މިއަދު މި ވަޑައިގެންނެވީ، ގާނޫނު އަސާސީގެ 101 ވަނަ މާއްދާގެ (ށ) ގައި ބުނާ ގޮތަށް ވަޑައިގަންނަވަންޖެހޭ ކަމަށް ގަބޫލު ކުރައްވާތީތޯ. 

މިއާއެކު ރައީސް ނަޝީދު ވިދާޅުވީ، މެންބަރު ސާފު ކުރައްވަން ބޭނުންވާ ކަން ވަނީ ސާފުވެފައި ކަމަށެވެ. އެހެނީ ބަންޑާރަ ނާއިބު މިވަގުތު އޮންނެވީ މަޖިލީހުގައި ކަމަށާ، އެހެންކަމުން މައްސަލަ ހުށަހެޅުއްވުމަށް އަނެއްކާވެސް ނަޝީދު ވަނީ އެދިލައްވާފައެވެ. 

އެއަށްފަހުވެސް މައްސަލަ ހުށަނޭޅުއްވުމުން ކުރެންދޫ ދާއިރާގެ މެންބަރު އަބްދުލް ޣަނީ ނިޒާމީ ނުކުތާ ނަންގަވައި، މައްސަލަ ހުށަހަޅުއްވަން ކެރިވަޑައިނުގަންނަވާނަމަ އަނބުރާ ގެންދަވަން ވަނީ އެދިލައްވާފައެވެ. 

ނަމަވެސް، ޝަރީފް ތަކުރާރުކޮށް ވަނީ ސުވާލުގެ ޖަވާބު ލިބިނުލައްވަނިސް މައްސަލަ ހުށަނާޅުއްވާނެ ކަމަށް ވިދާޅުވެފައެވެ. އެއާއެކު މަޖިލިސް ހޫނުވެ، ރައީސް ނަޝީދު ވަނީ، މަޖިލީހުގައި ތިއްބަވައިގެން، ޝަރީފް އާއި، ޕާޓީގެ ބޭފުޅުން އެ މައްސަލާގައި ގޮތެއް ނިންމަވަން މަޖިލިސް މެދުކަނޑާލައްވާފައެވެ.